പ്രണയസാഫല്യം നേടാന് വരന്റെ വീട്ടില് ക്വാറന്റീനില്... ഒടുവില് കൊറോണയുടെ പ്രതിബന്ധങ്ങളെ തോല്പ്പിച്ച് മാംഗല്യം!
കോഴിക്കോട് കുണ്ടൂപ്പറമ്പ് 'ഉജ്ജ്വല്കൃഷ്ണ'യില് രാജന് പുത്തന്പുരയിലിന്റെയും അനിത രാജന്റെയും മകന് ഉജ്ജ്വല് രാജിന്റെയും, മുംബൈ സ്വദേശിനി ഹേതല് മോദിയുടെയും വിവാഹമായിരുന്നു വെള്ളിയാഴ്ച.
ഏപ്രില് 5-ന് പുറക്കാട്ടിരി ഹില്ടോപ് ഓഡിറ്റോറിയത്തിലാണു വിവാഹം നടക്കേണ്ടിയിരുന്നത്. വിവാഹത്തിനു ഒരാഴ്ച മുന്പ് നാട്ടില്വരാനായിരുന്നു ഓസ്ട്രേലിയയിലെ സ്വകാര്യ കമ്പനിയില് ജോലി ചെയ്യുന്ന ഉജ്ജ്വല് തീരുമാനിച്ചിരുന്നത്. ആയിരത്തോളം പേരെ ക്ഷണിക്കുകയും ചെയ്തു. എന്നാല് മാര്ച്ച് ആദ്യ ആഴ്ചകളില് കോവിഡ് ഭീതി പടരാന് തുടങ്ങി. 14 ദിവസം ക്വറന്റീനില് കഴിഞ്ഞശേഷം വിവാഹത്തിനു അഞ്ചു ദിവസം മുന്പ് പുറത്തിറങ്ങാവുന്ന രീതിയില് ഉജ്ജ്വല് തന്റെ അവധി പുനഃക്രമീകരിച്ചു. അങ്ങനെ മാര്ച്ച് 17-ന് ഉജ്ജ്വല് വീട്ടിലെത്തി. ആരോഗ്യവകുപ്പ് അധികൃതരെ അറിയിച്ചു. വീട്ടില് ക്വറന്റീനില് പ്രവേശിച്ചു. പിന്നീടാണ് വിദേശത്തുനിന്നു വന്നതിനാല് ഉജ്ജ്വലിന്റെ 14 ദിവസത്തെ ക്വറന്റൈന് 28 ദിവസമാക്കി മാറ്റിയതായി ആരോഗ്യപ്രവര്ത്തകര് അറിയിച്ചത്.
മുംബൈയില്നിന്ന് വരുന്ന വധുവും 14 ദിവസം ക്വറന്റീനില് കഴിയണമെന്ന് ആരോഗ്യപ്രവര്ത്തകര് നിര്ദേശിച്ചു. തുടര്ന്നു വിവാഹത്തലേന്ന് ക്വറന്റീന് അവസാനിക്കുന്ന രീതിയില് മുംബൈയില് സ്വകാര്യ കമ്പനിയുടെ ഐടി മാനേജരായ വധു ഹേതലിന്റെ യാത്രാസമയം ക്രമീകരിച്ചു. മാര്ച്ച് 23-ന് ഹേതല് മോദിയും അമ്മ ചേതനാ മോദിയും കോഴിക്കോട്ടെത്തി.
എന്നാല് അടുത്ത ദിവസം മാര്ച്ച് 24-ന് ലോക്ഡൗണ് പ്രഖ്യാപിച്ചു. ഇവരും ഉജ്ജ്വലിന്റെ വീട്ടില് ക്വറന്റീനില് പ്രവേശിച്ചു. എല്ലാ ദിവസവും ആരോഗ്യപ്രവര്ത്തകര് വിവരങ്ങള് അന്വേഷിച്ച് വിളിച്ചു.
2015/16 വര്ഷത്തില് യുകെയില് ബിരുദാനന്തര ബിരുദ പഠനകാലത്താണ് ഇവര് പ്രണയത്തിലായത്. ലോക്ഡൗണില് ഇളവു വന്നെങ്കിലും കോവിഡ് ഭീതി തുടരുന്നതിനാല് വിവാഹം ഇനിയും നീട്ടിക്കൊണ്ടുപോവേണ്ടെന്ന തീരുമാനത്തിലായിരുന്നു ബന്ധുക്കള്. തുടര്ന്ന് 15 പേര് മാത്രം പങ്കെടുത്ത ചടങ്ങില് ഉജ്ജ്വല് ഹേതലിനു താലി ചാര്ത്തുകയായിരുന്നു. അങ്ങനെ നാലു വര്ഷത്തിലധികം നീണ്ട പ്രണയം സഫലമായി.
ലോക്ഡൗണ്കാലത്ത് നാട്ടില് ഇത്രയും ദിവസം താമസിച്ചതോടെ മലയാളികളുടെ ഇഷ്ടവിഭവമായ ചക്കയും കപ്പയുമൊക്കെ ഹേതലിന്റെയും അമ്മയുടെയും പ്രിയ വിഭവങ്ങളായി. കല്യാണത്തിനു മുന്പ് ഉത്തരേന്ത്യയില് നടക്കാറുള്ള ഹല്ദിയും മൈലാഞ്ചിയിടലുമൊക്കെ വീട്ടില് ആറുപേര് മാത്രം ചേര്ന്ന് നടത്തി. ഉജ്ജ്വലിന്റെ അനിയത്തി ജ്വല്നയാണ് ഹേതലിനെ മൈലാഞ്ചിയണിയിച്ചത്. ക്വാറന്റീന് കാലം പിന്നിട്ടതോടെ ഇരുകുടുംബങ്ങളും കളിതമാശകളുമായി ഒറ്റക്കുടുംബമായി മാറിക്കഴിഞ്ഞെന്ന് ഉജ്ജ്വല് പറഞ്ഞു.
കല്യാണത്തിനു പങ്കെടുക്കാന് കഴിയാത്തവര്ക്കൊക്കെ ഉജ്ജ്വല് ഓണ്ലൈനായി പുതിയ ഇന്വിറ്റേഷന് കാര്ഡ് അയച്ചിരുന്നു. അതില് രാവിലെ എട്ടുമണിക്കുള്ള മുഹൂര്ത്തത്തില് സൂം വിഡിയോ കോണ്ഫറന്സില് പങ്കെടുക്കാനുള്ള 'ഐഡി'യും 'പാസ്വേഡും' ചേര്ത്തിരുന്നു. സാധാരണ ദിവസങ്ങളിലായിരുന്നുവെങ്കില് യുകെയിലെയോ ഓസ്ട്രേലിയയിലെയോ ഉള്ള സുഹൃത്തുക്കള്ക്ക് ഈ വിവാഹത്തില് പങ്കെടുക്കാന് കഴിയുമായിരുന്നില്ല. എന്നാല് ഈ ലോക്ഡൗണ് കാലത്തും വിഡിയോ കോണ്ഫറന്സിലൂടെ എല്ലാവരും വിവാഹം നേരിട്ടുകണ്ടു. ഉജ്ജ്വലിന്റെ എണ്പതു വയസുകാരി അമ്മൂമ്മയും പേരക്കുട്ടിയുടെ വിവാഹം ലാപ്ടോപില് തല്സമയം കണ്ടതിന്റെ സന്തോഷത്തിലാണ്.
https://www.facebook.com/Malayalivartha