ആത്മഹത്യ ചെയ്ത ഹോട്ടല് തൊഴിലാളി രാജു മരണക്കുറിപ്പ് എഴുതിയത് മക്കള്ക്ക് മുന്നില് വച്ച്...!
കടുത്തുരുത്തിയില് മുഖ്യമന്ത്രിക്കു കത്തെഴുതി വച്ച ശേഷം ഹോട്ടല് ജീവനക്കാരന് ആത്മഹത്യ ചെയ്ത സംഭവത്തില് റവന്യൂ വകുപ്പ് അന്വേഷണം ആരംഭിച്ചു. കലക്ടര് എം. അഞ്ജനയുടെ നിര്ദേശനുസരണം വൈക്കം തഹസില്ദാര് എസ്. ശ്രീജിത്ത് ഇന്നു റിപ്പോര്ട്ട് കൈമാറും. കടുത്തുരുത്തി വെള്ളാശേരി കാശാം കാട്ടില് രാജു ദേവസ്യ(55) -യുടെ സംസ്കാരം കടുത്തുരുത്തി സെന്റ് മേരീസ് താഴത്തുപള്ളിയില് നടത്തി.
ലോക്ക്ഡൗണില് ജോലി നഷ്ടപ്പെട്ട നിരാശയും സാമ്പത്തിക പ്രശ്നങ്ങളും മൂലം കുടുംബം അനുഭവിക്കുന്ന ദാരിദ്ര്യം വിവരിച്ച് മുഖ്യമന്ത്രിക്ക് കത്ത് എഴുതിയ ശേഷം തിങ്കളാഴ്ച രാവിലെയാണ് ജീവിതം അവസാനിപ്പിച്ചത്. രാജുവിന്റെ കുടുംബത്തിനു വീട് നിര്മിച്ചു നല്കുമെന്നു കേരള കോണ്ഗ്രസ് എം (ജോസ് വിഭാഗം ) ചെയര്മാന് ജോസ് കെ. മാണി അറിയിച്ചു.രാജു വാങ്ങിയ സ്ഥലത്താണ് വീട് നിര്മിക്കുക.
ഒന്പതാം ക്ലാസുകാരി മകളുടെ പഴയ ബുക്കില് നിന്ന് രാജു ഒരു പേജ് കീറിയെടുക്കുന്നത് കണ്ട മകള് ചോദിച്ചിരുന്നു, അപ്പ എന്താണ് എഴുതുന്നതെന്ന്! മുഖ്യമന്ത്രിക്കുള്ള നിവേദനം തയാറാക്കുകയാണെന്നു രാജു പറഞ്ഞതായി മക്കള് പറഞ്ഞു. രാജു എഴുതിയ കത്ത് വായിച്ചെങ്കിലും അതില് ജീവനൊടുക്കുന്നതിനെപ്പറ്റി ഒന്നും പറയാത്തതിനാല് ഇവര് സംശയിച്ചില്ല. മക്കള്ക്കു ഭക്ഷണം തയാറാക്കി നല്കിയശേഷമാണു രാജു അമ്മയെ കാണാനായി സഹോദരന്റെ വീട്ടിലേക്കു പോയത്. അവിടെയാണ് രാജുവിനെ തൂങ്ങിമരിച്ച നിലയില് കണ്ടെത്തിയത്.
ജോലി നഷ്ടപ്പെട്ടപ്പോള് ലോട്ടറി കച്ചവടം നടത്താനായിരുന്നു രാജുവിന്റെ ശ്രമം. മക്കള് എയ്ഞ്ചലിനും ഇമ്മാനുവലിനും കഴിഞ്ഞ ദിവസം ക്ലാസ് തുടങ്ങിയെങ്കിലും നോട്ട് എഴുതാന് ബുക്കുകള് ഇല്ല. പഠനത്തിനു സ്മാര്ട്ട് ഫോണ് വാങ്ങാന് മകളുടെ കമ്മല് വില്ക്കാന് രാജു നിശ്ചയിച്ചു. ഇതു സഹോദരന് വിലക്കി. രാജുവിന് പ്രമേഹവും മുട്ടുവേദനയും ഉണ്ടായിരുന്നു. ഇതിനുള്ള മരുന്നു വാങ്ങാനുമായില്ല. മകനും അമ്മയും ആശുപത്രിയിലായപ്പോള് പണം കണ്ടെത്തിയത് ഭാര്യ ഷീലയുടെ സ്വര്ണം പണയപ്പെടുത്തിയിട്ടാണ്.
സാമ്പത്തിക പ്രശ്നങ്ങള് രാജു ആരോടും പങ്കിടുമായിരുന്നില്ല. സഹോദരങ്ങള് ഹോട്ടല് ജോലി ചെയ്തും കൂലിപ്പണിയെടുത്തുമാണ് കഴിയുന്നത്. വെള്ളാശേരിയില് 10 സെന്റ് സ്ഥലത്ത് ഏതു സമയവും വീഴാവുന്ന വീടാണ് 8 അംഗ കുടുംബത്തിനുള്ളത്. രാജുവിന്റെ അമ്മ അന്നമ്മ ഒരു വര്ഷമായി തളര്ന്നുകിടപ്പാണ്.
2017-ല് ലൈഫ് പദ്ധതിയില് വീടിനായി അപേക്ഷ നല്കിയതാണെങ്കിലും അപേക്ഷ നല്കുമ്പോള് റേഷന് കാര്ഡ് ഇല്ലായിരുന്നു. അടുത്തിടെയാണ് കാര്ഡ് ലഭിച്ചത്. രാജുവിന്റെ കുടുംബത്തിനു പ്രധാന മന്ത്രി ആവാസ് യോജന പദ്ധതി വഴി വീട് അനുവദിച്ചതായി പഞ്ചായത്ത് പ്രസിഡന്റ് പി. വി. സുനില്. വീട് നിര്മിച്ച് നല്കാന് ഞായറാഴ്ച 3-ന് യോഗം വിളിച്ചെന്നു വൈസ് പ്രസിഡന്റ് സിനി ആല്ബര്ട്ട് പറഞ്ഞു.
രാജുവിന്റെ കുടുംബത്തിന് സാമ്പത്തിക സഹായം ലഭ്യമാക്കുമെന്ന് മസ്കത്തിലെ മലയാളി കൂട്ടായ്മ. പഠനച്ചെലവ്, വീട്ടുവാടക എന്നിവ നല്കും. സുഹൃത്തുക്കളോടു സംസാരിച്ചശേഷം കൂടുതല് സഹായം ലഭ്യമാക്കുമെന്നു ചെങ്ങന്നൂര് സ്വദേശി ജോജി ജോര്ജ് പറഞ്ഞു.
https://www.facebook.com/Malayalivartha