അവധിയെടുക്കാതെ തുടര്ച്ചയായ കോവിഡ് ഡ്യൂട്ടി! മാതാപിതാ ക്കള്, മക്കള്, ബന്ധുക്കള് എല്ലാവരിലും നിന്നും അകന്നിട്ട് മൂന്നുമാസമായി!
ആലപ്പുഴ ജനറല് ആശുപത്രിയിലെ ഹെഡ് നഴ്സ്, തുമ്പോളി കൊച്ചീക്കാരന് വീട്ടില് എം.ഗ്രേസി തുടര്ച്ചയായി 3 മാസത്തെ കോവിഡ് ഡ്യൂട്ടി പിന്നിടുകയാണ്. ജനുവരി 30-ന് ആലപ്പുഴ ജനറല് ആശുപത്രിയില് അടിയന്തരമായി തയാറാക്കിയ ഐസലേഷന് വാര്ഡിന്റെ ചുമതലയായിരുന്നു തുടക്കം. ആലപ്പുഴ ജില്ലയില് അടുത്ത ദിവസം തന്നെ ആദ്യത്തെ കേസ് റിപ്പോര്ട്ട് ചെയ്തു. രോഗിയുമായി അടുത്തു ബന്ധപ്പെട്ട മാതാപിതാക്കള്, പരിശോധിച്ച ഡോക്ടര് എന്നിവരുള്പ്പെടെ ജനറല് ആശുപത്രിയിലെ ഗ്രേസിയുടെ ഐസലേഷന് വാര്ഡിലേക്കെത്തി.
അങ്ങനെ മാര്ച്ച് 14 വരെ തുടര്ച്ചയായി ഐസലേഷന് വാര്ഡില് തന്നെയായിരുന്നു ഗ്രേസി. അക്കാലത്ത് രോഗലക്ഷണങ്ങളുമായി നൂറുകണക്കിനു പേര് വന്നു. ഇവിടെ ഡ്യൂട്ടി കഴിഞ്ഞും ഓഫ് ദിവസങ്ങളില് ഫോണിലൂടെയും ജോലി തുടര്ന്നു. ആദ്യത്തെ കോവിഡ് രോഗി മാര്ച്ച് 24-ന് ശേഷമാണ് ജനറല് ആശുപത്രിയില് എത്തുന്നത്. അപ്പോള് ചികിത്സാ ക്രമീകരണത്തിനും മാര്ഗനിര്ദേശം നല്കാനും ഗ്രേസിയുണ്ടായിരുന്നു.
ഇപ്പോള് മറ്റു നഴ്സുമാര്ക്കും ആശുപത്രി ജീവനക്കാര്ക്കും ആംബുലന്സ് ഡ്രൈവര്മാര്ക്കും പരിശീലനം നല്കുന്ന ഉത്തരവാദിത്തവും ഇന്ഫെക്ഷന് കണ്ട്രോള് യൂണിറ്റിന്റെ ചുമതലയും ഉള്ളതിനാല് സ്ഥിരമായി ഐസലേഷന് വാര്ഡില് നില്ക്കുന്നില്ലെന്നു മാത്രം.
ഗ്രേസി കോവിഡ് വാര്ഡില് നിന്ന ഒന്നര മാസത്തോളം, വീട്ടില് ഗ്രേസിയും ആരോഗ്യ വകുപ്പിലെ ഹെല്ത്ത് സൂപ്പര്വൈസറായ ഭര്ത്താവ് ജസ്റ്റിനും മാത്രം താമസിക്കാമെന്നായിരുന്നു തീരുമാനം. മകനെയും 7 വയസ്സുകാരി മകളെയും ജസ്റ്റിന്റെ മാതാപിതാക്കളെയും മറ്റൊരു വീട്ടിലാക്കി. ഇപ്പോഴും പൊതുപരിപാടികള്ക്കോ ബന്ധുവീടുകള് സന്ദര്ശിക്കാനോ പോകുന്നില്ലെന്നു ഗ്രേസി പറയുന്നു.
https://www.facebook.com/Malayalivartha