സ്വര്‍ണക്കടത്ത് കേസില്‍ എന്‍.ഐ.എ നയിക്കുക എ.പി ഷൗക്കത്തലി ? ഇസ്ലാമിക് സ്റ്റേറ്റിന്റെ കേരള ഘടകത്തിന്റെ വേരറുത്തത് ഷൗക്കത്തലി; ടി.പി ചന്ദ്രശേഖരനെ വധിച്ച പ്രതികളെ സാഹസികമായി പിടികൂടിയ ഉദ്യോഗസ്ഥന്‍; സ്വര്‍ണകടത്തിലെ ഐ.എസ് ബന്ധം അന്വേഷിക്കാന്‍ ഇദ്ദേഹമല്ലാതെ വേറെ ആര് ? അപ്പോള്‍ പലരും കരുതിയിരിക്കണം
തിരുവനന്തപുരം സ്വര്‍ണക്കടത്ത് കേസ് അന്വേഷണം എന്‍.ഐ.എ ഏറ്റെടുത്തിരിക്കുകയാണ്. എന്‍.ഐ.എ ഏറ്റെടുത്ത കേസിന്റെ അന്വേഷണ ചുമതല വഹിക്കുക എസ്.പി റാങ്കിലുള്ള എ.പി ഷൗക്കത്തലിയായിരിക്കുമെന്നാണ് സൂചന. 2014 മുതല്‍ കേരളാ പോലീസിന്‍ നിന്നും എന്‍.ഐ.എയില്‍ ഡെപ്യൂട്ടേഷനില്‍ തുടരുന്ന ഉദ്യോഗസ്ഥനാണ് എ.പി ഷൗക്കത്തലി. നിരവധിക്കേസുകളില്‍ എന്‍.ഐ.ഐയുടെ അഭിമാനമായിമാറാന്‍ അദ്ദേഹത്തിന് സാധിച്ചിട്ടുണ്ട്. കേരളത്തില്‍ ഇസ്ലാമിക് സ്റ്റേറ്റിന്റെ അടിവേരറുത്ത അദ്ദേഹം ടി.പി ചന്ദ്രശേഖരന്‍ വധക്കേസിലെ അന്വേഷണ ഉദ്യോഗസ്ഥന്‍ കൂടിയായിരുന്നു. തലശ്ശേരി ഡി.എസ്.പിയായിരിക്കെയാണ് അദ്ദേഹം എന്‍.ഐ.എയില്‍ ഡെപ്യൂട്ടേഷനില്‍ പോകുന്നത്. സ്വര്‍ണക്കടത്ത് കേസില്‍ ഐ.എസ് ബന്ധം കൂടി ആരോപിക്കപ്പെടുമ്പോള്‍ ഇദ്ദേഹം അന്വേഷണ ഉദ്യോഗസ്ഥനാകാനാണ് സാധ്യത.
രാജ്യത്ത് കോളിളക്കം സൃഷ്ടിച്ച് ഇസ്ലാമിക് സ്‌റ്റേറ്റ് അന്വേഷിച്ച എന്‍.എ.ഐ സംഘത്തിന് നേതൃത്വം നല്‍കിയത് ഷൗക്കത്തലിയായിരുന്നു. കണ്ണൂരിലെ കനകമലയില്‍ സംഘടിപ്പിച്ച ഐ.എസ് ക്യാമ്പിനിടെ ഐ.എസ് അനുഭാവികളെ കൂട്ടതോടെ അറസ്റ്റുചെയ്താണ് അദ്ദേഹം എന്‍.ഐ.എയുടെ ഏറ്റവും സമര്‍ത്ഥനാണെന്ന പേരെടുക്കുന്നത്. 2016 യില്‍ പിടിയിലായ ഐ.എസ്. അനുഭാവികള്‍ ടെലഗ്രാമില്‍ പ്രത്യേക ഗ്രൂപ്പുണ്ടാക്കിയത്. സമീര്‍ അലിയെന്ന വ്യാജപേരുള്ള കണ്ണൂര്‍ സ്വദേശി മന്‍സീദായിരുന്നു സംഘത്തലവന്‍. ഈ ഗ്രൂപ്പ് ശ്രദ്ധയില്‍പ്പെട്ട എന്‍.ഐ.എ തന്ത്രപൂര്‍വ്വം അപേക്ഷ നല്‍കി പങ്കാളിയാവുകയായിരുന്നു. ഇതിനിടെ പ്രമുഖ സാമുദായിക സംഘടനയുടെ കൊച്ചിയിലെ സമ്മേളന സ്ഥലത്തേക്ക് ടിപ്പര്‍ ഇടിച്ച് കയറ്റുന്നത് സംബന്ധിച്ച ചര്‍ച്ച ചോര്‍ന്നതോടെ ടെലഗ്രാം ഗ്രൂപ്പ് നിശ്ചലമായി. ഗ്രൂപ്പിലെ ഒറ്റുകാരനെ കണ്ടെത്താന്‍ ഇവര്‍ ഒത്ത് ചേരാന്‍ തീരുമാനിച്ച സ്ഥലമായിരുന്നു കണ്ണൂരിലെ കനകമല. ഈ വിവരം ചോര്‍ത്തിയാണ് ഷൗക്കത്തലിയുടെ നേതൃത്വത്തിലുള്ള സംഘം യുവാക്കളെ കുടുക്കിയത്. ചാറ്റിംഗ് ഗ്രൂപ്പില്‍ മൊത്തം 12 പേരാണ് അംഗങ്ങള്‍. ഇതില്‍ പകുതി പേരും രാജ്യത്തിന് പുറത്താണ്. കേരളത്തിലെ നാലു പ്രമുഖരെ വധിക്കാനും ഗ്രൂപ്പിലുള്ള ഇവര്‍ പദ്ധതി തയ്യാറാക്കിയിരുന്നു.
വന്‍ പ്രത്യാഘാതമുണ്ടാക്കുമായിരുന്ന വലിയ ദുരന്തമാണ് സമര്‍ത്ഥമായ നീക്കത്തിലൂടെ എന്‍.ഐ.എ അന്ന് തകര്‍ത്തത്. കനകമലയിലെ അറസ്റ്റിനെ തുടര്‍ന്ന് ഐ.എസ്. ബന്ധം സംശയിക്കുന്ന നാലുപേരെ തമിഴ്‌നാട് പോലീസിന്റെ സഹായത്തോടെ എന്‍.ഐ.എ പിടികൂടിയിട്ടുണ്ട്. ഇതില്‍ തൊടുപുഴ സ്വദേശി സുബ്ഹാനിയും ഉള്‍പ്പെടും. യു.എ.പി.എ ഉള്‍പ്പെടെ എട്ട് വകുപ്പുകള്‍ ചേര്‍ത്താണ് ഇവര്‍ക്കെതിരെ കേസെടുത്തിരിക്കുന്നത്.
കനകമലയില്‍ നിന്ന് എന്‍.ഐ.എ അറസ്റ്റ് ചെയ്ത സുബഹാനിയുമായി പാരീസ് ആക്രമണത്തില്‍ പങ്കെടുത്ത തീവ്രവാദികള്‍ക്ക് ബന്ധമുണ്ടെന്ന സൂചനയെത്തുടര്‍ന്ന് അന്വേഷണവുമായി സഹകരിക്കാന്‍ ഫ്രഞ്ച് ഇന്റലിജന്‍സ് ഏജന്‍സി എന്‍.ഐ.എയോട് 2017 യില്‍ അഭ്യര്‍ഥിച്ചിരുന്നു. അന്ന് അന്വേഷണത്തിന് എന്‍.ഐ.എ ചുമതപ്പെടുത്തിയതും ഈ ഉദ്യോഗസ്ഥനെ തന്നെയാണ്. ഇതിന്റെ ചോദ്യം ചെയ്യലില്‍, ഇറാഖിലെ മൊസൂളില്‍ വെച്ച് ഇസ്ലാമിക് സ്‌റ്റേറ്റില്‍ നിന്ന് സുബഹാനിക്ക് ആയുധ പരിശീലനം ലഭിച്ചതായി വ്യക്തമായി. പാരീസ് ആക്രമണത്തില്‍ പങ്കെടുത്തതായി ആരോപിക്കപ്പെടുന്ന രണ്ട് തീവ്രവാദികള്‍ സുബഹാനിയുടെ കമാന്‍ഡറെ കാണാന്‍ എത്തിയിരുന്നു. ഇത് ഫ്രഞ്ച് രഹസ്യാന്വേഷണ വിഭാഗത്തെ എന്‍.ഐ.എ അറിയിക്കുകയും ചെയ്തു. ഇത് അന്താരാഷ്ട്ര തലത്തില്‍ പ്രശസ്തി നേടാന്‍ ഉദ്യോഗസ്ഥനു സാധിച്ചു.
ഇതിന് പുറമേ കേരളത്തില്‍ കോളിളക്കം സൃഷ്ടിച്ച ടി.പി. ചന്ദ്രശേഖരന്‍ വധക്കേസിലെ പ്രതികളെ കണ്ണൂരിലെ മുടക്കോഴി മലയില്‍ നിന്ന് സാഹസികമായി പിടികൂടിയത് ഷൗക്കത്തലിയുടെ നേതൃത്വത്തിലുള്ള പ്രത്യേക അന്വേഷണ സംഘമാണ്. യാതൊരു രാഷ്ട്രീയ ഇടപെടലും വശംവധനാക്കാത്ത ഉദ്യോഗസ്ഥനായ ഇദ്ദേഹം 1995 യില്‍ ഒന്നാം റാങ്കോടെയാണ് കേരളാ പോലീസിന്റെ ഭാഗമാകുന്നത്. നിരവധി കൊലക്കേസുകളില്‍ പ്രതികള്‍ക്ക് രക്ഷപ്പെടാന്‍ സാധിക്കാത്ത വിധം തെളിവുകള്‍ ശേഖരിക്കുന്നതിലുള്ള മികവാണ് അദ്ദേഹത്തെ എന്‍.ഐ.എയില്‍ എത്തിച്ചത്.
https://www.facebook.com/Malayalivartha
