സ്വര്‍ണക്കടത്ത് കേസില്‍ മുഖ്യമന്ത്രിയുടെ രാജി ആവശ്യപ്പെട്ട് പ്രതിപക്ഷം സമരം ശക്തമാക്കുകയാണ്. ഇതിന്റെ ഭാഗമായിയാണ് ഈ മാസം 27ന് ചേരുന്ന നിയമസഭാ സമ്മേളനത്തില്‍ സര്‍ക്കാരിനെതിരെയും സ്പീക്കര്‍ക്കെതിരെയും അവിശ്വാസം കൊണ്ടു വരാന്‍ പ്രതിപക്ഷം തീരുമാനിച്ചത്. സഭയില്‍ വിജയിക്കാന്‍ സാധ്യതയില്ലെങ്കിലും സര്‍ക്കാരിനെതിരായ ആക്രമണം സഭക്കുള്ളില്‍ ആളിക്കത്തിക്കാന്‍ പ്രതിപക്ഷത്തിന് ഇതിലൂടെ സാധിക്കും. അവിശ്വാസ പ്രമേയം ചര്‍ച്ചക്കെടുത്താല്‍ മാധ്യമങ്ങളുടെ ചോദ്യങ്ങളില്‍ നിന്നും ഒഴിഞ്ഞുമാറുന്നതുപോലെ പ്രതിപക്ഷത്തിന്റെ ചോദ്യങ്ങളോട് ഒഴിഞ്ഞു മാറാന്‍ സര്‍ക്കാരിന് സാധിക്കില്ല. കൃത്യമായ മറുപടി നല്‍കാന്‍ ഭരണപക്ഷത്തിന് സാധിച്ചില്ലെങ്കില്‍ അത് സാമാജികരുടെ അവകാശങ്ങള്‍ ലംഘിക്കുന്നതിന് തുല്ല്യമാകും. ഇത് കാര്യങ്ങള്‍ കൂടുതല്‍ സങ്കീര്‍ണമാക്കുകയും ചെയ്യും. കൂടാതെ വരും ദിവസങ്ങളില്‍ മുഖ്യമന്ത്രിയുടെ മുന്‍ പ്രിന്‍സിപ്പള്‍ സെക്രട്ടറി എം. ശിവശങ്കറിനെതിരെ കൂടുതല്‍ തെളിവുകള്‍ എന്‍.ഐ.എക്ക് ലഭിക്കുകയാണെങ്കില്‍ അത് സര്‍ക്കാരിനെ കൂടുതല്‍ പ്രതിരോധത്തിലാക്കുകയും ചെയ്യും.

ഇന്നലെ ചേര്‍ന്ന മന്ത്രിസഭാ യോഗത്തില്‍ ഈ മാസം 27 ന് ഒരു ദിവസം സഭാ ചേരാന്‍ ഗവര്‍ണറോട് സര്‍ക്കാര്‍ അനുമതി ചോദിക്കാന്‍ തീരുമാനിച്ചു. അവിശ്വാസത്തിന്റെ പേരില്‍ സഭാ സമ്മേളനം മാറ്റി വച്ചാല്‍ അത് ദോഷകരമാകുമെന്ന നിലപാടാണ് എല്‍.ഡി.എഫിനുള്ളത്. അതുകൊണ്ടു തന്നെ കരുതലോടെയാണ് സര്‍ക്കാര്‍ ഈ വിഷയത്തെ സമീപിക്കുന്നത്. സര്‍ക്കാരിന്റെ നിര്‍ദേശം മാനിച്ച് സഭാ ചേരാന്‍ ഗവര്‍ണര്‍ അനുമതി നല്‍കി വിജ്ഞാപനമിറങ്ങിയാലുടന്‍ പ്രതിപക്ഷ നേതാവ് രമേശ് ചെന്നിത്തല സര്‍ക്കാരിനും സ്പീക്കര്‍ക്കെതിരെയുമുള്ള പ്രമേയത്തിന് നോട്ടീസ് നല്‍കും. കോവിഡ് സാഹചര്യത്തില്‍ ധനബില്‍ പാസാക്കാന്‍ ഒരു ദിവസത്തേക്കാണ് സഭാ സമ്മേളനം നടക്കുക. സമ്മേളത്തിന്റെ അജഢ പക്ഷേ തീരുമാനിച്ചിട്ടുമില്ല. ഈ സാഹചര്യത്തില്‍ പ്രമേയത്തിനുള്ള നോട്ടീസ് നല്‍കാനാണ് തീരുമാനം.

സ്പീക്കര്‍ക്കെതിയ പ്രമേയത്തിന് 14 ദിവസം മുമ്പ് നോട്ടീസ് നല്‍കണമെന്നാണ് നിബന്ധന. 27 ന് നിയമസഭാ സമ്മേളനം നടത്താന്‍ തീരുമാനിക്കുകയാണെങ്കില്‍ ഈ സാവകാശം പ്രതിപക്ഷത്തിന് ലഭിക്കില്ല. ഈ സാഹചര്യത്തില്‍ പ്രതിപക്ഷത്തിന്റെ പ്രമേയം പരിഗണിക്കാതെ വേറെ സമയം നിശ്ചയിക്കും. പ്രമേയം പരിഗണിക്കാത്താവില്ലെന്ന നിലപാട് സര്‍ക്കാര്‍ തീരുമാനിച്ചാല്‍ അത് പ്രതിപക്ഷം ആയുധമാക്കുകയും ചെയ്യും. എന്നാല്‍ സര്‍ക്കാരിനെതീരായ അവിശ്വാസ പ്രമേയത്തിന് മൂന്ന് ദിവസം മുമ്പ് മത്രം നോട്ടീസ് നല്‍കിയാല്‍ മതി. പക്ഷേ ധനബില്ല് ഒരു ദിവസം കൊണ്ട് ചര്‍ച്ച ചെയ്ത് പാസേക്കണ്ടതിനാല്‍ രണ്ടും പ്രമേയങ്ങളും അനുവദിക്കുമോയെന്നകാര്യത്തില്‍ ഒരു ഉറപ്പുമില്ല. സഭയില്‍ പ്രതിപക്ഷത്തിന് 47യും ഭരണപക്ഷത്തിന് 93 അംഗങ്ങളാണുള്ളത്. ഇതില്‍ ജോസ് വിഭാഗം യു.ഡി.എഫില്‍ നിന്നും പുറത്താക്കിയതിനാല്‍ അവരുടെ നിയമസഭാംഗങ്ങള്‍ എന്തു നിലപാട് സ്വീകരിക്കുമെന്നതിലും വ്യക്തയില്ല.

കേരള ചരിത്രത്തില്‍ ഇതുവരെ 20 തവണയാണ് സര്‍ക്കാരിനെതിരെ അവിശ്വാസ പ്രമേയം അവതരിപ്പിക്കപ്പെട്ടിട്ടുള്ളതില്‍ ഇതിന്‍ 1964 യില്‍ ആര്‍ ശങ്കര്‍ മന്ത്രിസഭക്കെതിരെയായ അവിശ്വാസ പ്രമേയം മാത്രമാണ് വിജയിക്കപ്പെട്ടിട്ടുള്ളത്. ഇതാണ് പിന്നീട് കേരള കോണ്‍ഗ്രസിന്റെ രൂപീകരണത്തിന് കാരണമായത്. അന്ന് കോണ്‍ഗ്രസിന്റെ ചാക്കോ ഗ്രൂപ്പിലുണ്ടായിരുന്ന നിയമസഭാ സാമാജികരില്‍ 15 പേര്‍ മന്ത്രിസഭയ്‌ക്കെതിരായി വോട്ടു ചെയ്തു. അങ്ങനെ അവിശ്വാസ പ്രമേയം പാസാകുകയും ശങ്കര്‍ രാജിവയ്ക്കുകയും ചെയ്തു. വിഘടിത വിഭാഗം കെ എം ജോര്‍ജിന്റെ നേതൃത്വത്തില്‍ 'കേരള പ്രദേശ് കോണ്‍ഗ്രസ് സമുദ്ധാരണസമിതി' എന്ന പേരില്‍ ഒരു പുതിയ രാഷ്ട്രീയ പാര്‍ട്ടിക്ക് രൂപം കൊടുത്തു. ഈ പാര്‍ട്ടി 1964 ഒക്ടോബര്‍ 9ന് 'കേരളകോണ്‍ഗ്രസ്' എന്ന പേരു സ്വീകരിച്ച് രാഷ്ട്രീയ കക്ഷിയായി. സ്പീക്കര്‍ക്കെതിരെ ആറു തവണയാണ് അവിശ്വാസ പ്രമേയം അവതരിപ്പിക്കപ്പെട്ടിട്ടുള്ളത്. എന്നാല്‍ ഒരിക്കലും ഈ അവിശ്വാസ പ്രമേയങ്ങള്‍ പാസിയിട്ടില്ല.