വേദന മറന്ന് അലന്‍ വീല്‍ച്ചെയറില്‍ എത്തി, പ്രതീക്ഷയുടെ തെളിച്ചത്തോടെ മടങ്ങി!
മാന്നാനം കെഇ സ്‌കൂളില്‍ ഇന്നലെ കേരള എന്‍ജിനീയറിങ് പ്രവേശന പരീക്ഷ എഴുതിയവരുടെ കൂട്ടത്തില്‍ വീല്‍ച്ചെയറില്‍ ഇരുന്നു പരീക്ഷ എഴുതിയ അലന്‍ ആന്റണി(18) വേദന കടിച്ചമര്‍ത്തി എത്തിയത് കംപ്യൂട്ടര്‍ എന്‍ജിനീയര്‍ ആകാനുള്ള ആഗ്രഹത്തിന് ഒരു പ്രതിബന്ധവും ഉണ്ടാകാതിരിക്കാനാണ്.
അരീപ്പറമ്പ് തൈനാംവീട്ടില്‍ ഷിജോ ജോസിന്റെയും ഷാന്റി ഷിജോയുടെയും മകനായ അലന്‍ സുഹൃത്തുക്കള്‍ക്കൊപ്പം ഫുട്‌ബോള്‍ കളിക്കുന്നതിനിടെ കാലിലെ ലിഗമെന്റിനു ഗുരുതര പരുക്ക് ഏല്‍ക്കുകയായിരുന്നു. തെള്ളകത്തെ സ്വകാര്യ ആശുപത്രിയില്‍ നടത്തിയ ശസ്ത്രക്രിയയില്‍ എല്ലുകള്‍ സ്‌ക്രൂ ചെയ്തു ഘടിപ്പിച്ചു.
അലനും മാതാപിതാക്കളും സഹോദരി അലീന ഷിജോയും അരീപ്പറമ്പില്‍ നിന്നു കാറിലാണ് കെഇ സ്‌കൂളില്‍ എത്തിയത്. സ്‌കൂള്‍ അധികൃതര്‍ അലനെ ലിഫ്റ്റില്‍ പരീക്ഷാഹാളില്‍ എത്തിച്ചു. പരീക്ഷയ്ക്കു ശേഷം ഹാളില്‍ നിന്നു വീല്‍ച്ചെയറില്‍ ഇറങ്ങിയ അലന്റെ മുഖത്തു കാലിനേറ്റ പരുക്കിന്റെ വേദനയ്ക്കപ്പുറം പ്രതീക്ഷയുടെ തെളിച്ചമായിരുന്നു.
https://www.facebook.com/Malayalivartha
