കൊല്ലം കടപ്പാക്കട പീപ്പിള്‍സ് നഗര്‍/7- ല്‍ മഹേഷ്‌കുമാറും ഭാര്യ ഗിരിജാംബികയും (ബിന്ദു) തങ്ങളുടെ വിവാഹ വാര്‍ഷികം വ്യത്യസ്തമാക്കണമെന്ന് തീരുമാനിച്ചിരുന്നു. അതിനായി വളരെ കൗതുകകരമായ ഒരു കാര്യമാണ് അവര്‍ ചെയ്തത്. വിവാഹ വാര്‍ഷിക ദിവസം 25 കിലോമീറ്റര്‍ ദൂരം ഓടി ഈ ദമ്പതികള്‍.

മുന്‍ അത്ലറ്റും 'സോള്‍സ് ഓഫ് കൊല്ലം' എന്ന ഗ്രൂപ്പിലെ അംഗവുമായ മഹേഷാണ് ഈ ആശയം മുന്നോട്ടു വച്ചത്. ഭാര്യയും പൂര്‍ണ പിന്തുണയുമായി എത്തിയതോടെ വിവാഹ വാര്‍ഷിക ദിനമായ ഇന്നലെ ഇവര്‍ ഓടി സന്തോഷം പങ്കിട്ടു. 2015-ലെ നാഷനല്‍ ഗെയിംസില്‍ റഗ്ബി കേരള ടീമിന്റെ മാനേജരായിരുന്നു മഹേഷ്.

വെളുപ്പിന് 4-മണിക്ക് ആശ്രാമം മൈതാനത്തിനു സമീപത്തെ തങ്ങള്‍ക്കുഞ്ഞ് മുസല്യാര്‍ പാര്‍ക്കിനു മുന്‍പില്‍ നിന്നും ആരംഭിച്ച ഓട്ടം കടപ്പാക്കട, ചിന്നക്കട, കാവനാട്, വീണ്ടും ചിന്നക്കട, ബീച്ച്, ആശ്രാമം പാര്‍ക്കിനു മുന്‍പില്‍ സമാപിച്ചു. 3 മണിക്കൂര്‍ 12 മിനിറ്റ് കൊണ്ടാണ് ഇത്രയും ദൂരം ഓടി പൂര്‍ത്തിയാക്കിയത്. 'സ്റ്റാര്‍വ' എന്ന ആപ്ലിക്കേഷന്‍ ഉപയോഗിച്ചാണ് ഇവര്‍ ദൂരം കണക്കാക്കിയത്.

മാതാപിതാക്കളുടെ തീരുമാനത്തിനു പൂര്‍ണ പിന്തുണമായി മക്കളായ അഖില്‍.ഡി.മഹേഷും അമല്‍.ഡി.മഹേഷും ഒപ്പമുണ്ടായിരുന്നു. മഹേഷ് ഇപ്പോള്‍ ഫാര്‍മസ്യൂട്ടിക്കല്‍ ബിസിനസ് രംഗത്താണ്.