പപ്പടവട്ടത്തിനപ്പുറം അമ്പിളിവട്ടം സ്വപ്നം കാണുന്ന രാംകുമാര്; പഠനത്തിലും പണിയിലും നമ്പര് വണ്!
പുന്നയൂര്ക്കുളം കിഴക്കേ ചെറായി കൊഴപ്പമഠം കടാംമ്പുളി അനില്കുമാറിന്റെ മകനായ രാംകുമാര് ചമ്മന്നൂര് അമല് സ്കൂളിന്റേയും നാടിന്റേയും വീടിന്റേയും അഭിമാനമാണ്. വീടിനോടു ചേര്ന്ന ഷെഡില് വീട്ടുകാര്ക്കൊപ്പം പപ്പടം നിര്മിക്കുന്ന രാംകുമാറിന്റെ സിബിഎസ്ഇ പത്താം ക്ലാസ് ഫലം വന്നപ്പോള് രാംകുമാര് പപ്പടം പണിയിലെ നമ്പര് വണ് എന്ന പേര് പഠനത്തിലും ഉണ്ടെന്ന് തെളിയിച്ചു. രാംകുമാറിന് ഫുള് എ വണ്.
പാഠ്യേതര പ്രവര്ത്തനങ്ങളിലും മിടുക്കനായ രാംകുമാര് സ്കൂളിനു വേണ്ടി രണ്ട് ഡോക്യുമെന്ററി ചെയ്തു. അറബി ഭാഷ കൈകാര്യം ചെയ്യുന്ന മികവില് ഇസ്ലാമിക് വിജ്ഞാന മത്സരങ്ങളിലും സമ്മാനങ്ങള് നേടിയിട്ടുണ്ട്. പഠനത്തിലും സ്വഭാവത്തിലും സ്കൂളിന്റെ അഭിമാനമാണ് രാംകുമാറെന്ന് പ്രിന്സിപ്പല് എസ്.സുബൈദ ബീവി സാക്ഷ്യപ്പെടുത്തുന്നു. പണമില്ലെങ്കിലും പ്ലസ് വണ് പ്രവേശനത്തിനു എത്താന് പറഞ്ഞെങ്കിലും ഫീസ് അടച്ച ശേഷം മാത്രമേ രാം എത്തിയുള്ളൂ.
പിതാവ് അനില്കുമാറിന്റെ പപ്പടം ബിസിനസിലെ പരാജയമാണ് എല്ലാം തകിടം മറച്ചത്. ലോക്ഡൗണ് വന്നതോടെ പ്രതിസന്ധി രൂക്ഷമായി. പപ്പടം തെക്കന് ജില്ലകളില് എത്തിച്ചായിരുന്നു വ്യാപാരം. മകള്ക്ക് എന്ജനീയറിങ് കഴിഞ്ഞ് ഒരു സ്വകാര്യ സ്ഥാപനത്തില് ജോലി ലഭിച്ചെങ്കിലും കോവിഡ് കാരണം പോകാന് കഴിയുന്നില്ല.
രാംകുമാറിന്റെ മോഹങ്ങള് പപ്പട വട്ടത്തോളം ചെറുതല്ല, പ്ലസ്ടുവിനൊപ്പം സിവില് സര്വീസ് പരിശീലനത്തിനു ചേരണം. ഐഎഎസുകാരനാകണം. പക്ഷേ വീട്ടിലെ സാഹചര്യങ്ങള് അനുവദിക്കുന്നില്ലെന്ന ദുഃഖമുണ്ട്. രാം കുമാറിന്റെ സ്വപ്നം സഫലമാകാന് സഹായമെത്തും എന്ന പ്രതീക്ഷയിലാണ് ഈ കുടുംബം.
https://www.facebook.com/Malayalivartha