മറ്റൊരു കാര്ഗില് ദിവസ് കൂടി; ജൂലൈ 26 ന് ഇന്ത്യന് വിജയത്തിന് 21 വയസു തികയുന്നു; ചരിത്രത്തിലെ ഏറ്റവും വലിയ വിജയങ്ങളിലൊന്ന്; ഇന്ത്യ ചൊറിയുന്നവര് അത് ഇപ്പോള് പാകിസ്ഥാന് ആയാലും ചൈന ആയാലും ഇതൊക്കെ ഓര്മ്മയിലുണ്ടാകണം
ഇന്ത്യ-പാക് പോരാട്ട ചരിത്രത്തിലെ ഏറ്റവും വലിയ വിജയങ്ങളില് ഒന്നായിരുന്നു 1999 ജൂലൈ 26 ലെ കാര്ഗില് യുദ്ധ വിജയം. 1999 മെയ് എട്ടു മുതല് ജൂലൈ 26 വരെയായിരുന്നു കാര്ഗില് യുദ്ധം. പാക് സൈന്യത്തെയും ഭീകരരെയും തുരത്താനായി ഇന്ത്യന് സൈന്യം ഓപ്പറേഷന് വിജയ് ആരംഭിച്ചു. മൂന്നു മാസത്തോളം ഓപ്പറേഷന് നീണ്ടുനിന്നു. പാക്കിസ്ഥാന് സൈന്യത്തെയും നുഴഞ്ഞു കയറ്റക്കാരെയും ഇന്ത്യന് അതിര്ത്തിയില് നിന്നും സൈന്യം പൂര്ണമായി തുരത്തി. 1999 ജൂലൈ 14 ന് ഓപ്പറേഷന് വിജയ് വിജയകരമെന്ന് അന്നത്തെ പ്രധാനമന്ത്രിയായിരുന്ന എ.ബി.വാജ്പേയി പ്രഖ്യാപിച്ചു. ജൂലൈ 26 ന് കാര്ഗില് യുദ്ധം അവസാനിച്ചതായി ഔദ്യോഗിക പ്രഖ്യാപനം ഉണ്ടായി. 527 ജവാന്മാര് കാര്ഗിലില് വീരചരമം പ്രഖ്യാപിച്ചു. കാര്ഗിലില് ഇന്ത്യ വിജയക്കൊടി നാട്ടിയതിന്റെ ഓര്മ പുതുക്കലാണ് കാര്ഗില് ദിനം.
കാണാതായ തന്റെ ആടിനെ തേടിയിറങ്ങിയ താഷി നംഗ്യാള് എന്ന ആട്ടിടയനാണ് കൂട്ടത്തോടെ അതിര്ത്തി കടന്നെത്തുന്ന പാക് പട്ടാളത്തെ ആദ്യം കണ്ടത്. സൈന്യത്തിന് ലഭിച്ച ആദ്യ ജാഗ്രതാ നിര്ദ്ദേശമായിരുന്നു അത്. ദ്രാസ് മേഖലയില് വിഘടനവാദികള് നടത്തുന്ന നുഴഞ്ഞുകയറ്റ ശ്രമമാണെന്നാണ് ആദ്യം കരുതിയത്. എന്നാല് അതിര്ത്തിയില് പലഭാഗത്തും പാക് സൈന്യം നിയന്ത്രണരേഖ പിന്നിട്ടിരുന്നു. അതിശൈത്യത്തെ തുടര്ന്ന് പലഭാഗത്തുനിന്നും സൈനികരെ പിന്വലിച്ച തക്കം നോക്കിയായിരുന്നു പാക് പട്ടാളം അതിര്ത്തി കടന്നത്. നിയന്ത്രണരേഖ പിന്നിട്ട് കിലോമീറ്ററോളം കടന്ന് പാകിസ്താനി പട്ടാളവും കാശ്മീര് തീവ്രവാദികളും ഇന്ത്യന് പ്രദേശത്തേക്ക് നുഴഞ്ഞു കയറി. ഇവരെ തുരത്താന് സൈന്യം ഓപ്പറേഷന് വിജയ് ആരംഭിച്ചു. 72 ദിവസത്തോളമാണ് സൈനികര് യുദ്ധത്തില് പോരാടിയത്.
കാര്ഗില് യുദ്ധത്തിന്റെ ആദ്യഘട്ടത്തില് ശത്രുവിന്റെ ശേഷിയെ കുറച്ചുകണ്ട ഇന്ത്യയ്ക്ക് കനത്ത തിരിച്ചടി നേരിട്ടു. മെയ് 27ന് ഇന്ത്യയുടെ മിഗ്27 വിമാനം വെടിവച്ചിട്ട് ഫ്ലൈറ്റ് ലഫ്. കെ. നചികേതയെ പാകിസ്ഥാന് തടവുകാരനാക്കി. നചികേതയെ അന്വേഷിച്ചുപോയ മിഗ്21 വിമാനത്തെ നിയന്ത്രണരേഖയില് വെടിവച്ചിട്ടു. സ്ക്വാഡ്രണ് ലീഡര് അജയ് അഹൂജ കൊല്ലപ്പെട്ടു. മെയ് 28ന് ഇന്ത്യയുടെ മിഗ്17 ഹെലികോപ്റ്റര് വെടിയേറ്റുവീണ് നാലു പേര് കൊല്ലപ്പെട്ടു. ഇതോടെ വ്യോമസേന ഹെലികോപ്റ്ററുകള് പിന്വലിച്ചു. യുദ്ധത്തിന്റെ തന്ത്രം മാറ്റി.
ഇന്ത്യന് സൈന്യം ജൂണ് ആദ്യ ആഴ്ചയില് കാര്ഗിലിലും ദ്രാസിലും ആക്രമണം ശക്തമാക്കി. ജാട്ട് റജിമെന്റിലെ ആറു സൈനികരുടെ മൃതദേഹം ദിവസങ്ങള്ക്കുശേഷം പാകിസ്ഥാന് ഇന്ത്യയെ ഏല്പിച്ചത് അംഗഭംഗം വരുത്തിയ നിലയിലാണ്. ജൂണ് 13ന് ഇന്ത്യന് സേന ടോലോലിങ് കൊടുമുടി പിടിച്ചെടുത്തു. ജൂണ് 20ന് പോയിന്റ് 5140 പിടിച്ചെടുത്തതോടെ ടോലോലിങ് കുന്നുകള് പൂര്ണമായും ഇന്ത്യന് അധീനത്തിലായി. ജൂലൈ 4ന് ടൈഗര് ഹില്ലും തിരിച്ചുപിടിച്ചു. അന്താരാഷ്ട്ര രംഗത്തെ കടുത്ത സമ്മര്ദ്ദം കാരണം പാകിസ്ഥാന് ജൂലൈ പതിനൊന്നോടെ കാര്ഗിലില്നിന്ന് നുഴഞ്ഞുകയറ്റക്കാരെ പിന്വലിക്കാന് തുടങ്ങി. 'ഓപ്പറേഷന് വിജയ്' എന്നു പേരുള്ള കാര്ഗില് യുദ്ധം വിജയിച്ചതായി ജൂലൈ 14ന് വാജ്പേയി പ്രഖ്യാപിച്ചു.
കാര്ഗില് യുദ്ധകാലത്ത് പാര്ലമെന്റില് ഭൂരിപക്ഷം തെളിയിക്കാനാകാതെ വാജ്പേയ് സര്ക്കാര് പടിയിറങ്ങിയ സമയമായിരുന്നു. അടുത്ത തിരഞ്ഞെടുപ്പ് വരെ കാവല് പ്രധാനമന്ത്രിയായി വാജ്പേയ് നില്ക്കുന്ന സമയത്താണ് ഇന്ത്യയുടെ രാഷ്ട്രീയ അന്തരീക്ഷം മുതലാക്കി പാക്കിസ്ഥാന് നുഴഞ്ഞു കയറ്റത്തിലൂടെ യുദ്ധതിന് വരുന്നത്. അന്ന് ആദ്യമായി ആണ് ഒരു രാഷ്ട്രപതി സര്വ്വസൈനാതിപന് എന്ന സ്ഥാനം കൃത്യമായി വിനിയോഗിക്കുന്നത്. മലയാളിയായ കെ.ആര് നാരായണനായിരുന്ന അന്നത്തെ രാഷ്ട്രപതി. യുദ്ധത്തിന്റെ നിര്ണായക തീരുമാനങ്ങള് എടുക്കുന്നതില് പ്രധാനമന്ത്രിക്കൊപ്പം രാഷ്ട്രപതിയും നിലകൊണ്ടും. രാഷ്ട്രപതിയും പ്രധാനമന്ത്രിയും രണ്ട് രാഷ്ട്രീയ ചേരയില് നിന്നുള്ളവരാണെങ്കിലും ഈ ഒത്തൊരുമ ഇന്ത്യന് വിജയത്തിന് നിര്ണായകമാകുകയും ചെയ്തു. പിന്നീട് എ.ബി വാജ്പേയ് തന്നെ ഈ നീക്കളെ വിവരിക്കുകയും ചെയ്യുന്നുണ്ട്.
ഇന്ന് രാജ്യത്തിന് കോവിഡ് മൂലം രാജ്യം പ്രതിസന്ധി നേരിടുമ്പോഴാണ് അതിര്ത്തിയില് ചൈനീസ് അധിക്രമമുണ്ടായത്. രാജ്യത്തിന്റെ വിഴ്ചകള് വിദേശ രാജ്യങ്ങള് മുതലെടുപ്പിന് ശ്രമിക്കുമെന്നതിന് തെളിവാണിത്. ഇതൊഴുവാക്കാന് രാജ്യം ഒറ്റക്കെട്ടായി നില്ക്കേണ്ടതിന്റെ ആവശ്യം കാര്ഗില് വിജയ് ദിവസ് നമ്മെ ഓര്മ്മപ്പെടുത്തുന്നുണ്ട്.
https://www.facebook.com/Malayalivartha