കള്ളക്കടത്തിനെക്കുറിച്ച് വിവരം നല്കുന്നവര്ക്ക് കസ്റ്റംസ് നല്കുന്ന പാരിതോഷികം ഒരു കിലോയ്ക്ക് ഒന്നരലക്ഷം രൂപ; പക്ഷേ വിവരം നല്കുന്നവര് പാരിതോഷികം വാങ്ങാനെത്താറില്ല!
ഒരു കിലോയ്ക്ക് ഒന്നരലക്ഷം രൂപയാണ് വിമാനത്താവളങ്ങള് വഴി നടത്തുന്ന കള്ളക്കടത്തിനെക്കുറിച്ച് വിവരം നല്കുന്നവര്ക്ക് കസ്റ്റംസ് പാരിതോഷികമായി നല്കാറ്. എന്നാല് രഹസ്യവിവരങ്ങള് നല്കുന്നവരില് ഭൂരിഭാഗംപേരും കസ്റ്റംസില്നിന്നുള്ള പാരിതോഷികം വാങ്ങാനെത്താറില്ല.
സ്വര്ണക്കടത്ത് മാഫിയാസംഘങ്ങള് രഹസ്യവിവരം നല്കുന്ന വ്യക്തിയെ തിരിച്ചറിയാനുള്ള സാധ്യത കണക്കിലെടുത്താണ് പലരും രംഗത്ത് എത്താത്തത്.
കൂടാതെ സ്വര്ണക്കടത്ത് സംഘങ്ങള് തമ്മിലുള്ള മത്സരം കാരണവും ചില വിവരങ്ങള് ഒറ്റിക്കൊടുക്കാറുണ്ട്. ഇവിടെ പാരിതോഷികമല്ല ലക്ഷ്യമെന്നതിനാല് അവരും രംഗത്ത് എത്തില്ല.
എന്നാല് ഉദ്യോഗസ്ഥരുമായുണ്ടാക്കുന്ന ധാരണപ്രകാരം വിവരങ്ങള് കൈമാറി സ്ഥിരമായി പാരിതോഷികം കൈപ്പറ്റുന്ന ചിലരുമുണ്ട്. ഈ ഉദ്യോഗസ്ഥന് സ്ഥലംമാറ്റമുണ്ടായാല് ഇന്ഫോര്മര് താല്പര്യമറിയിക്കുകയാണെങ്കില് മാത്രം വിശ്വസ്തരായ മറ്റേതെങ്കിലും ഉദ്യോഗസ്ഥരെ ബന്ധപ്പെടുത്തിക്കൊടുക്കും.
കരിപ്പൂര് വിമാനത്തവളത്തില് 60 ലക്ഷം രൂപയുടെ സ്വര്ണവുമായി ഇന്നലെ രണ്ടുപേര് പിടിയിലായതില് ഒരാളെ വിദേശത്തുനിന്നും രഹസ്യവിവരം ലഭിച്ചതിന്റെ അടിസ്ഥാനത്തിലാണ് പിടികൂടിയത്. വിമാനത്തവളത്തിലെ കസ്റ്റംസിന് പുറമെ, കസ്റ്റംസ് പ്രിവന്റീവും, ഡി.ആര്.ഐക്കും ഇത്തരത്തില് സ്ഥിരം വിവരങ്ങള് കൈമാറുന്ന ആളുകളുണ്ട്.
വിവരം ലഭിച്ച് വ്യക്തിയെ പിടികൂടുന്നതോടെ പാരിതോഷികത്തിന്റെ 50 ശതമാനം തുക ദിവസങ്ങള്ക്കുള്ളില് കസ്റ്റംസ് നല്കണമെന്നാണ് ചട്ടം. പണമായിതന്നെയാണ് പാരിതോഷികം കൈമാറല്. ഇത്തരത്തില് വിവരങ്ങള് അറിയിക്കുന്നവരുടെ വിശദാംശങ്ങള് ഒന്നും ശേഖരിച്ച് വെക്കില്ല. പണം നല്കുന്നത് കസ്റ്റംസ് കമ്മീഷണര് റാങ്കിലുള്ള ഒരാള് ആയിരിക്കും.
അതേസമയം, കസ്റ്റംസ് ഉദ്യോഗസ്ഥര് തന്നെയാണ് സ്വര്ണം പിടിക്കുന്നതെങ്കില് പരമാവധി 20 ലക്ഷം രൂപ പാരിതോഷികം ലഭിക്കും. ഇത് അന്വഷണ സംഘത്തിലെ ഉദ്യോഗസ്ഥര്ക്കെല്ലാം വീതിച്ചുനല്കും. എന്നാല് ക്ലാസ് എ യില് വരുന്ന ഉദ്യോഗസ്ഥര്ക്ക് പാരിതോഷികത്തിന് അര്ഹതയുണ്ടാകില്ല.
https://www.facebook.com/Malayalivartha