കാഴ്ചപരിമിതിയെ തോല്പിച്ച് ജീവിതത്തിനു പുതിയ അര്ഥം കണ്ടെത്തിയവരുടെ കരുതലിന്റെ'ഹലോ'!
കാഴ്ചപരിമിതിയെ തോല്പിച്ചു ജീവിതത്തിനു പുതിയ അര്ഥം കണ്ടെത്തിയവര്. എന്വിഷന് ട്രസ്റ്റിലെ ജീവനക്കാര്. അവര് 20 പേരുടെ ശബ്ദം ഇടപാടുകാരെ സംതൃപ്തിയിലേക്കാണു നയിക്കുന്നത്. ആവശ്യങ്ങളും പരാതികളുമായി ഫോണ് വിളിയെത്തുമ്പോള് ചെറുചിരിയോടെ ഇപ്പുറത്ത് അവരുണ്ടാകും.
എന്വിഷന് ട്രസ്റ്റിലെ ജീവനക്കാര് പ്രമുഖ കമ്പനികളുടെ കോള് സെന്റര്, ബാക്ക് ഓഫിസ് പ്രവര്ത്തനം നടത്തുന്നത് എറണാകുളം കാരിക്കാമുറി മൊണാസ്ട്രി റോഡിലെ ചാവറ കള്ചറല് സെന്റര് കെട്ടിടത്തിലാണ്. ഇവിടത്തെ 100% ജോലികളും ചെയ്യുന്നതു ഭിന്നശേഷിക്കാരാണ്. ഒരുപക്ഷേ, ദക്ഷിണേന്ത്യയില് തന്നെ ഇത്തരത്തിലുള്ള പ്രഥമ സംരംഭം.
എന്വിഷന് ട്രസ്റ്റ്, ചാവറ കള്ചറല് സെന്ററും സൊസൈറ്റി ഫോര് റിഹാബിലിറ്റേഷന് ഓഫ് വിഷ്വലി ചാലഞ്ച്ഡും (എസ്ആര്വിസി) ചേര്ന്നുള്ള സംയുക്ത സംരംഭമാണ്. 2016 ജൂണ് മുതല് ഇവര് രംഗത്തുണ്ട്. 19 പേരും അവരുടെ ടീം ലീഡറും ഇവിടെ പ്രവര്ത്തിക്കുന്നു. തുടക്കത്തില് സ്വകാര്യ ടെലികോം കമ്പനിയുടെ കോള് സെന്ററായായിരുന്നു പ്രവര്ത്തനം. ഇപ്പോള് മറ്റൊരു സ്ഥാപനവുമായാണു കരാര്.
ഇവിടെ പരിശീലനം നേടിയശേഷം ബാങ്കുകളിലും മറ്റും ജോലി നേടിയവരുമേറെ. ലോക്ഡൗണ് തുടങ്ങിയതു മുതല് ഓരോരുത്തരും താമസസ്ഥലത്തിരുന്നാണു ജോലി ചെയ്യുന്നതെന്നു ടീം ലീഡറും കോട്ടയം സ്വദേശിനിയുമായ ഷബ്ന റഷീദ് പറഞ്ഞു. കാഴ്ചപരിമിതരുടെ ഓര്ക്കസ്ട്ര, ബ്ലൈന്ഡ് ഫുട്ബോള്, നൈപുണ്യ വികസന പരിശീലനം, ശാക്തീകരണം തുടങ്ങിയവ ലക്ഷ്യമിട്ടാണ് എസ്ആര്വിസിയുടെ പ്രവര്ത്തനമെന്ന് കോ ഓര്ഡിനേറ്റര് മുഹമ്മദ് റഷാദ് പറയുന്നു.
https://www.facebook.com/Malayalivartha