ലോകത്തില്‍ മലയാളിയില്ലാത്ത ഒരിടവുമുണ്ടാകില്ലെന്നാണ് പറയപ്പെടുന്നത്. ഇക്കാര്യം നമ്മുടെ പ്രധാനമന്ത്രി നരേന്ദ്രമോദിക്കും അറിയാം. അതുകൊണ്ടാകാം ഓണം ഒരു അന്താരാഷ്ട്ര ഉത്സവമാണെന്ന അഭിപ്രായം അദ്ദേഹം പറഞ്ഞത്. മലയാളികള്‍ ഒന്നാം ഓണം ആഘോഷിക്കുന്ന വേളയില്‍ തന്നെയാണ് അദ്ദേഹത്തിന്റെ പ്രതിമാസ റേഡിയോ പരിപാടിയായ മന്‍ കി ബാത്തും എത്തിയത്. അപ്പോള്‍ ഓണത്തിനെ കുറിച്ച് രണ്ടു വാക്ക് പറയാതെ എങ്ങനെ. ഓണത്തിന് ആശംസകള്‍ നല്‍കുക മാത്രമല്ല ആഘോഷത്തിനിടെ സ്വീകരിക്കേണ്ട കരുതലിനെ കുറിച്ചും പ്രധാനമന്ത്രി മലയാളികളെ ഉപദേശിച്ചു. ഓണം ഒരു അന്താരാഷ്ട്ര ഉത്സവമാറി മാറികൊണ്ടിരിക്കുകയാണെന്നാണ് പ്രധാനമന്ത്രി പറയുന്നത്. 'ഓണത്തിന്റെ ആവേശം വിദേശ രാജ്യങ്ങളുടെ വിദൂരയിടങ്ങളില്‍ വരെ എത്തിയിരിക്കുന്നു. അമേരിക്ക, യൂറോപ്പ്, ഗള്‍ഫ് രാജ്യങ്ങള്‍ തുടങ്ങി ഓണത്തിന്റെ സ്പര്‍ശം എല്ലായിടത്തും അനുഭവപ്പെടും. ഓണം ഒരു അന്താരാഷ്ട്ര ഉത്സവമായി മാറുന്നു' മന്‍ കി ബാത്തിനിടെ ഓണാശംസകള്‍ നേര്‍ന്നുകൊണ്ട് പ്രധാനമന്ത്രി പറഞ്ഞു. ഇത് ഉത്സവങ്ങളുടെ സമയമാണെങ്കിലും കോവിഡ് കാരണം ആളുകള്‍ക്കിടയില്‍ അച്ചടക്കബോധമുണ്ടെന്നും പ്രധാനമന്ത്രി ആവശ്യപ്പെട്ടു.

കളിപ്പാട്ട നിര്‍മ്മാണത്തില്‍ ചൈനയാണ് ലോകത്തിലെ എന്നല്ല ഇന്ത്യയുടെ മാര്‍ക്കറ്റും നിയന്ത്രിച്ചിരുന്നത്. ചൈനീസ് കളിപ്പാട്ടളെ സ്വീകര്യമാക്കിയത് അവയുടെ വിലക്കുറവാണ്. ചൈനീസ് ഉപകരണങ്ങള്‍ ബഹിഷ്‌കരിച്ചതോടെ ഈ വിപണിയില്‍ ഒരു ഒഴിവ് വന്നിരിക്കുകയാണ്. ഇത് ഇന്ത്യയുടെ മാത്രം കാര്യമല്ല ലോകത്തിലെ ഭൂരിപക്ഷം രാജ്യങ്ങളും ചൈനീസ് ഉത്പന്നങ്ങള്‍ ബഹിഷ്‌കരിക്കുകയാണ്. അതുകൊണ്ടു തന്നെ ഈ കളിപ്പാട്ട വിപണി പിടിക്കാന്‍ ആത്മനിര്‍ഭര്‍ പദ്ധതിയിലൂടെ തദ്ദേശീയമായി കളിപ്പാട്ടങ്ങള്‍ നിര്‍മിക്കാനാണ് പ്രധാനമന്ത്രിയുടെ ഇത്തവണത്തെ മന്‍ കി ബാത്തിലെ പ്രധാന ആവശ്യം. തദ്ദേശീയ കളിപ്പാട്ട നിര്‍മ്മാണ മേഖലയെ പ്രോത്സാഹിപ്പിച്ച് നമ്മുടെ രാജ്യത്തെ ഒരു കളിപ്പാട്ട കേന്ദ്രമാക്കി മാറ്റുന്നതിനായി ഇന്ത്യയിലെ കളിപ്പാട്ട ക്ലസ്റ്ററുകള്‍ വികസിപ്പിക്കുന്നു. ലോകത്തെല്ലായിടത്തേക്കും കളിപ്പാട്ടങ്ങള്‍ നിര്‍മിക്കുന്ന കളിപ്പാട്ട കേന്ദ്രമായി മാറാനുള്ള കഴിവും പ്രാപ്തിയും ഇന്ത്യക്കുണ്ടെന്നും അദ്ദേഹം അറിയിച്ചു. കളിപ്പാട്ട നിര്‍മ്മാണമേഖലയില്‍ ഇന്ത്യയെ വന്‍ശക്തിയാക്കുമെന്നും അന്താരാഷ്ട്ര തലത്തില്‍ ഇന്ത്യ ശ്രദ്ധിക്കപ്പെടണമെന്നും പ്രധാനമന്ത്രി പറഞ്ഞു. ഇതിലൂടെ ചൈന കീഴടക്കി വച്ചിരുന്ന ഒരു വലിയ വിപണി പിടിച്ചെടുക്കനാണ് ഇന്ത്യ ആഗ്രഹിക്കുന്നതെന്ന് വ്യക്തം.

'ഇപ്പോള്‍ തന്നെ ഇന്ത്യയുടെ ചില ഭാഗങ്ങള്‍ കളിപ്പാട്ട ക്ലസ്റ്ററുകളായിട്ടുണ്ട് അതായത് കളിപ്പാട്ടങ്ങളുടെ കേന്ദ്രങ്ങളായി അത് വികസിക്കുകയാണ്. രാംനഗരത്തിലെ ചന്നപട്ടണം (കര്‍ണാടക), കൃഷ്ണയിലെ കോണ്ടപള്ളി (ആന്ധ്രാപ്രദേശ്), തമിഴ്‌നാട്ടിലെ തഞ്ചാവൂര്‍, അസമിലെ ധുബ്രി, യുപിയിലെ വരാണസി എന്നിവ പോലുള്ള നിരവധി സ്ഥലങ്ങളുണ്ട്. പ്രാദേശിക കളിപ്പാട്ടങ്ങളുടെ സമ്പന്നമായ പാരമ്പര്യം നമ്മുടെ രാജ്യത്ത് ഉണ്ട്. നല്ല കളിപ്പാട്ടങ്ങള്‍ നിര്‍മ്മിക്കുന്നതില്‍ വൈദഗ്ദ്ധ്യം നേടിയ നിരവധി പ്രഗത്ഭരായ കരകൗശലപ്പണിക്കാരുണ്ട്' പ്രധാനമന്ത്രി പറഞ്ഞു. കളിപ്പാട്ടങ്ങള്‍ വെറും വിനോദ ഉപകരണങ്ങള്‍ മാത്രമല്ല. കുട്ടികളുടെ സര്‍ഗ്ഗാത്മക പുറത്തെടുക്കുന്നവയാണ് മികച്ച കളിപ്പാട്ടങ്ങളെന്നും അദ്ദേഹം കൂട്ടിച്ചേര്‍ത്തു. കമ്പ്യൂട്ടര്‍ ഗെയിമുകളുടെ കാര്യത്തിലും ആത്മനിര്‍ഭര്‍ ആകണമെന്ന് മോദിയുടെ ആഹ്വാനം ചെയ്തു. പ്രതികൂല സാഹചര്യത്തിലും പിടിച്ചു നിന്ന കര്‍ഷകരെ അഭിനന്ദിക്കുന്നുവെന്നും പ്രധാനമന്ത്രി പറഞ്ഞു.