അഞ്ചിരി ആനക്കയം പട്ടിയാര്‍മറ്റത്തില്‍ സുഗതന്റെയും റീനയുടെയും മകള്‍ ഒന്‍പതാംക്ലാസുകാരി ഗായത്രി കരഞ്ഞുകൊണ്ടാണ് സ്റ്റുഡന്റ്സ് പൊലീസ് കെഡറ്റിന്റെ 'ചിരി'യിലേക്ക് വിളിച്ചത്. പുല്ലു തിന്നാനായി റോഡരികില്‍ കെട്ടിയിട്ടിരുന്ന തന്റെ ജീവനായ മണിക്കുട്ടി എന്ന ആടിനെ ആരോ മോഷ്ടിച്ചു എന്നും എത്രയും വേഗം കള്ളനെ പിടിച്ച് മണിക്കുട്ടിയെ തിരികെത്തരണമെന്നുമായിരുന്നു ആവശ്യം. 'കള്ളനെ പിടിക്കും' എന്ന പൊലീസുകാരുടെ ഉറപ്പിലാണ് ഗായത്രി കരച്ചില്‍ നിര്‍ത്തിയത്. 

ആടിനെ 23 ദിവസം മുന്‍പാണ് ആരോ മോഷ്ടിച്ചത്. 2 ദിവസം പരിസരം മുഴുവന്‍ അന്വേഷിച്ചെങ്കിലും ആടിനെ കണ്ടെത്താനായില്ല. അങ്ങനെയാണു സ്റ്റുഡന്റ്സ് പൊലീസ് കെഡറ്റിന്റെ 'ചിരി' പദ്ധതിയിലേക്കു ഗായത്രി വിളിച്ചു വിവരം പറഞ്ഞത്.

തൊടുപുഴ എസ്‌ഐ ബൈജു പി.ബാബുവും സംഘവും പരാതി അന്വേഷിക്കാന്‍ സ്ഥലത്തെത്തി. എല്ലായിടവും അന്വേഷിച്ചെങ്കിലും മണിക്കുട്ടിയെ കണ്ടെത്താനായില്ല. ഒടുവില്‍ മറ്റൊരു ആടിനെ ഗായത്രിക്കു വാങ്ങിനല്‍കിയാലെന്തെന്ന ആലോചനയിലായി സിഐ സുധീര്‍ മനോഹറും എസ്‌ഐ ബൈജു പി.ബാബുവും. പൊലീസ് ഉദ്യോഗസ്ഥരായ അനീഷ്, സുനില്‍, സന്ദീപ് ദത്തന്‍, ജെസി ജോര്‍ജ്, സെബാസ്റ്റ്യന്‍, രോഹിത് തുടങ്ങിയവരും പങ്കാളികളായി. അങ്ങനെ മണിക്കുട്ടിക്കു പകരമാവില്ലെങ്കിലും ഇന്നലെ ഒരു ആട്ടിന്‍കുട്ടിയെ കിട്ടി ഗായത്രിക്ക്.

കരിങ്കുന്നത്തു നിന്ന് 4 മാസം പ്രായമായ ആട്ടിന്‍കുട്ടിയെ വാങ്ങി ഇന്നലെ ഗായത്രിക്കു വീട്ടിലെത്തിച്ചു നല്‍കി. തൊടുപുഴയിലെ പൊലീസ് ഉദ്യോഗസ്ഥരുടെ സ്‌നേഹസമ്മാനം. മണിക്കുട്ടി എന്നു തന്നെയാണു ഗായത്രി പുതിയ കൂട്ടുകാരിയെയും വിളിക്കുന്നത്. ഇരുവരും നല്ല കൂട്ട് ആയിക്കഴിഞ്ഞു. യഥാര്‍ഥ മണിക്കുട്ടിയുടെ കള്ളനെ ഉടന്‍ പിടിക്കുമെന്നു തൊടുപുഴ പൊലീസ് ഉറപ്പിച്ചുപറയുന്നു.