തീവ്രവാദികള്ക്ക് പെന്ഷന് കൊടുക്കുന്നവര് ഇന്ത്യയെ ഉപദേശിക്കണ്ട; പാകിസ്ഥാനെയും തുര്ക്കിയെയും പൊളിച്ചടുക്കി ഇന്ത്യ; ഐക്യരാഷ്ട്ര മനുഷ്യാവകാശ സമിതിയില് ഇന്ത്യ കൈയടി നേടി; കാശ്മീര് ഇന്ത്യയുടെ ആഭ്യന്തര വിഷയമെന്ന് വീണ്ടും വ്യക്തമാക്കി
ഐക്യരാഷ്ട്ര സഭയില് പാക്കിസ്ഥാന്റെയും തുര്ക്കിയുടെയും വാദങ്ങളെ പൊളിച്ചടുക്കി ഇന്ത്യന് സ്ഥിരം വക്താവ്. ജനീവ ആസ്ഥാനമായുള്ള സമിതിയില് വച്ച് കശ്മീര് വിഷയം ഉന്നയിച്ചതിനെ തുടര്ന്ന് ഐക്യരാഷ്ട്ര മനുഷ്യാവകാശ സമിതിയില് പാകിസ്ഥാന്, തുര്ക്കി, ഓര്ഗനൈസേഷന് ഓഫ് ഇസ്ലാമിക് കോഓപ്പറേഷന് എന്നിവര്ക്കെതിരെയാണ് ഇന്ത്യ ആഞ്ഞടിച്ചത്. മനുഷ്യാവകാശ കൗണ്സിലിന്റെ 46-ാമത് സെഷനില് ഇന്ത്യയുടെ ആഭ്യന്തര കാര്യങ്ങളെക്കുറിച്ചുള്ള പരാമര്ശങ്ങള്ക്ക് ഇന്ത്യ കഴിഞ്ഞ ദിവസം പാകിസ്ഥാന്, തുര്ക്കി, ഓര്ഗനൈസേഷന് ഓഫ് ഇസ്ലാമിക് കോഓപ്പറേഷന് എന്നിവരെ അതി നിശിതമായാണ് വിമര്ശിച്ചത്.
ജനീവയിലെ പെര്മനന്റ് മിഷന് ഓഫ് ഇന്ത്യയുടെ പ്രഥമ സെക്രട്ടറി പവന് ബാദെ പാകിസ്ഥാനെ കുറിച്ച് ഇങ്ങനെ പറഞ്ഞു, 'വംശീയവും മതപരവുമായി ന്യൂനപക്ഷങ്ങളെ നിരന്തരം ഉപദ്രവിക്കുന്ന ഒരു രാജ്യത്ത് നിന്ന് മനുഷ്യാവകാശങ്ങളെക്കുറിച്ച് അനാവശ്യമായ ഒരു പ്രഭാഷണം ഇന്ത്യക്ക് ആവശ്യമില്ല', 'തീവ്രവാദത്തിന്റെ പ്രഭവകേന്ദ്രം ആണ് പാകിസ്ഥാന് കൂടാതെ യുഎന് ഉപരോധ പട്ടികയില് ഉള്പ്പെട്ട തീവ്രവാദികള്ക്ക് പെന്ഷനും മറ്റു സൗകര്യങ്ങളും നല്കുന്ന ഒരു രാജ്യമാണ് ഇന്ത്യയെ കുറിച്ച് ഒരു നാണവും ഇല്ലാതെ ഇത്തരം വാദങ്ങള് പറയുന്നത്. കൂടാതെ തീവ്രവാദികളെ പരിശീലിപ്പിച്ചതായി അഭിമാനത്തോടെ അംഗീകരിക്കുന്ന ഒരു പ്രധാനമന്ത്രിയും സ്വന്തമായി ഉള്ള രാജ്യമാണ് പാകിസ്ഥാന്.
തനിക്കു സംസാരിക്കാനുള്ള അവസരത്തില് പാകിസ്ഥാന് മനുഷ്യാവകാശങ്ങളെ കുറിച്ച് നടത്തിയ പരാമര്ശത്തെ കുറിച്ച് ഇന്ത്യന് നയതന്ത്ര പ്രതിനിധി ഇങ്ങനെ പറഞ്ഞു. സ്വയം പടച്ചുണ്ടാക്കിയ അപവാദ പ്രചരണങ്ങള് എന്റെ രാജ്യത്തെ കുറിച്ച് ഉന്നയിക്കുക എന്നത് പാകിസ്ഥാന് ഒരു ശീലമാക്കിയിരിക്കുകയാണ് , ഇത് അവരുടെ സ്വന്തം കുടില തന്ത്രങ്ങള്ക്കും ആവശ്യങ്ങള്ക്കും വേണ്ടിയാണു അവര് ഉപയോഗിക്കുന്നത്. വംശീയവും മതപരവുമായി ന്യൂനപക്ഷങ്ങളെ നിരന്തരം ഉപദ്രവിക്കുന്ന ഒരു രാജ്യത്ത് നിന്നുള്ള മനുഷ്യാവകാശങ്ങളെക്കുറിച്ചുള്ള ഈ ആവശ്യപ്പെടാത്ത പ്രഭാഷണത്തിന് ചെവി കൊള്ളുവാന് ഊര്ജ്ജം ചിലവഴിക്കുക എന്നത് ഇന്ത്യയോ മറ്റുള്ളവരോ അര്ഹിക്കുന്നില്ല ആയിരക്കണക്കിന് സിഖ്, ഹിന്ദു, ക്രിസ്ത്യന് ന്യൂനപക്ഷ സ്ത്രീകളെയും പെണ്കുട്ടികളെയും പാക്കിസ്ഥാനില് തട്ടിക്കൊണ്ടുപോകുന്നു, നിര്ബന്ധിത വിവാഹം, മതപരിവര്ത്തനം എന്നിവ പാകിസ്ഥാനില് സര്വ്വ സാധാരണമാണ്. പാകിസ്ഥാന് അധിനിവേശ കശ്മീര്, ബലൂചിസ്ഥാന്, ഖൈബര് പഖ്തുന്ഖ്വ എന്നിവിടങ്ങളില് ഭരണകൂട പിന്തുണയുള്ള പീഡന വിഷയങ്ങളും ഇന്ത്യ ഉന്നയിച്ചു. പാക്കിസ്ഥാനിലെ ലിബറല് ശബ്ദങ്ങള്ക്കും മാധ്യമപ്രവര്ത്തകര്ക്കും നേരെയുള്ള ആക്രമണവും ഇന്ത്യ ഉയര്ത്തിക്കാട്ടി.
ഇന്ത്യന് കേന്ദ്രഭരണ പ്രദേശങ്ങളായ ജമ്മു കശ്മീരിലെയും ലഡാക്കിലെയും അധിനിവേശ ഭാഗങ്ങളില് പാകിസ്ഥാന്റെ നേതൃത്വത്തിലുള്ള കുടിലമായ പ്രവൃത്തികള് തുടരുകയാണ്. പുറത്തുനിന്നുള്ളവരുടെ വന്തോതിലുള്ള പ്രവാഹം കാരണം കശ്മീരികളുടെ എണ്ണം പാക്കിസ്ഥാനില് കൈവശമുള്ള കാശ്മീര് ഭാഗങ്ങളില് ഗണ്യമായി കുറഞ്ഞിട്ടുണ്ട്. ബലൂചിസ്ഥാന്, ഖൈബര് പഖ്തുന്ഖ്വ, സിന്ധ് എന്നിവിടങ്ങളിലെ സ്ഥിതിഗതികള് പാകിസ്ഥാന്റെ കീഴിലുള്ള ആളുകളുടെ അവസ്ഥയെ നന്നായി പ്രതിനിധീകരിക്കുന്നു. ബലൂചിസ്ഥാനിലെ ഏതെങ്കിലും ഒരു കുടുംബത്തിലെ ഒരംഗത്തെയെങ്കിലും പാക്കിസ്ഥാന്റെ സുരക്ഷാ സേന എടുക്കുകയോ തട്ടിക്കൊണ്ടുപോകുകയോ ചെയ്യാത്ത ഒരു ദിവസം പോലും കടന്നുപോയിട്ടില്ല, അദ്ദേഹം പറഞ്ഞു. മാധ്യമ പ്രവര്ത്തകര്, മനുഷ്യാവകാശ സംരക്ഷകര്, രാഷ്ട്രീയ വിമതര് എന്നിവര്ക്കെതിരായ ഭീഷണികളും ആക്രമണങ്ങളും പാകിസ്ഥാനില് ദേശിയ സ്ഥാപനങ്ങള് ഉപയോഗിച്ചാണ് നടപ്പില് വരുത്തുന്നത്. മാധ്യമപ്രവര്ത്തകരെ കൊന്നൊടുക്കുകയും കൊലയാളികള് സ്വതന്ത്രരായിത്തീരുകയും ചെയ്യുന്ന രാജ്യമായി പാകിസ്ഥാനെ അന്താരാഷ്ട്ര സംഘടനകള് ഉയര്ത്തിക്കാട്ടിയത് വെറുതെയല്ല എന്നത് തര്ക്കരഹിതമായ വസ്തുതയാണ് 'ബാദെ കൂട്ടിച്ചേര്ത്തു.
ജമ്മു കശ്മീരിനെക്കുറിച്ച് തുര്ക്കി നടത്തിയ പരാമര്ശത്തിന് മറുപടിയായി, തുര്ക്കി തുര്ക്കിയുടെ പണി നോക്കിയാല് മതിയെന്നും ഇന്ത്യയുടെ ആഭ്യന്തര കാര്യങ്ങളെക്കുറിച്ച് പ്രതികരിക്കുന്നതില് നിന്ന് വിട്ടുനില്ക്കുന്നതാണ് നിങ്ങള്ക്ക് നല്ലതെന്നും ആദ്യം ജനാധിപത്യ രീതികളെക്കുറിച്ച് നിങ്ങള് നന്നായി മനസ്സിലാക്കിയിട്ടു വരൂവെന്നും ഇന്ത്യന് സ്ഥിരം പ്രതിനിധി തുര്ക്കിയോട് പറഞ്ഞു. തുര്ക്കിയെ ലക്ഷ്യമാക്കി ഇന്ത്യന് സ്ഥിരം പ്രതിനിധി നടത്തിയ ജനാധിപത്യ നടപടികളുടെ പരാമര്ശം തുര്ക്കി പ്രസിഡന്റ് എര്ദോഗന് എങ്ങനെ സ്ഥിരമായി തന്റെ അധികാരം ഉറപ്പിക്കാന് തിരഞ്ഞെടുപ്പുകളില് കൃത്രിമം കാണിക്കുന്നു എന്നതിനെ ഉദ്ദേശിച്ചുള്ളതായിരിന്നു. എന്നാല് ഇസ്ലാമിക രാജ്യങ്ങളുടെ കൂട്ടായ്മ നടത്തിയ പരാമര്ശങ്ങളോട് ഇന്ത്യന് പ്രതിനിധി അല്പം മയപ്പെടുത്തിയിട്ടാണ് കാര്യങ്ങള് പറഞ്ഞത്. കാശ്മീര് ഇന്ത്യയുടെ ആഭ്യന്തര കാര്യമാണ്, അതില് ഇടപെടാന് നിങ്ങള്ക്ക് ഒരു അധികാരവും ഇല്ല, നിങ്ങളുടെ പരിഗണനയുടെ ഭാഗമല്ല കാശ്മീര്. എന്തുകൊണ്ടാണ് പാകിസ്ഥാന് തങ്ങളുടെ കുടില തന്ത്രങ്ങള്ക്ക് വേണ്ടി നിങ്ങളെ ഉപയോഗിച്ചത് എന്ന് നിങ്ങള് സ്വയം പരിശോധിക്കേണ്ടതാണ്. സ്വന്തം സങ്കുചിത താല്പര്യങ്ങള്ക്കു വേണ്ടി പാകിസ്ഥാനാല് എങ്ങനെ സംഘടന ദുരുപയോഗം ചെയ്യപ്പെട്ടു എന്ന് സംഘടനയിലെ അംഗങ്ങള് സ്വയം പരിശോധിക്കേണ്ടതാണ്.
ചുരുക്കത്തില് പാകിസ്ഥാനെ ഐക്യരാഷ്ട്രസഭയുടെ മനുഷ്യാവകാശ സമിതിയുടെ മുന്നില് വച്ച് അങ്ങേയറ്റം നാണം കെടുത്താനും തുര്ക്കി എന്ന രാജ്യത്തെ അതിന്റെ നിലക്ക് നിര്ത്തുവാനും മറ്റു രാജ്യങ്ങളെ കാര്യങ്ങള് പറഞ്ഞു മനസ്സിലാക്കുവാനും ഇന്ത്യക്കു സാധിച്ചു. കാശ്മീര് ഇന്ത്യയുടെ പരമാധികാര പരിധിയില്പ്പെട്ട അവിഭാജ്യ ഘടകമാണെന്നും മറ്റാരും അതില് ഇന്ത്യയുടെ പരമാധികാരത്തില് തലയിടേണ്ട ആവശ്യം ഇല്ലെന്നും ചില സങ്കുചിത താല്പര്യക്കാരോട് ശക്തമായി പ്രസ്ഥാവിക്കുവാന് ഇന്ത്യന് നയതന്ത്ര പ്രതിനിധി ഈ അവസരത്തെ കാര്യക്ഷമമായി വിനിയോഗിച്ചു എന്ന് നിസംശയം പറയാവുന്നതാണ്.
https://www.facebook.com/Malayalivartha