ഒരു താര രാജാവിന്റെ അധ:പതനം ആരാധകര്‍ക്കും കുടുംബത്തിനും ഉള്‍ക്കൊള്ളാന്‍ കഴിയുന്നില്ല. 2002ല്‍ റോഡരികില്‍ ഉറങ്ങിക്കിടന്നയാളെ മദ്യലഹരിയില്‍ വാഹനം ഇടിപ്പിച്ച് കൊലപ്പെടുത്തിയ കേസില്‍ സല്‍മാന് 5 വര്‍ഷം ജയില്‍ വാസം വിധിച്ചതോടെ കുടുംബാംഗങ്ങള്‍ വേദനയിലായി. ടെന്‍ഷന്‍ താങ്ങാനാകാതെ സല്‍മാന്റെ മാതാവ് ബോധം കെട്ടുവീണു. 
വീട്ടിലായിരുന്ന സല്‍മാന്റെ മാതാവ് മാദ്ധ്യമങ്ങള്‍ വഴിയാണ് സല്‍മാന്‍ കുറ്റക്കാരനാണെന്ന വിധി ശ്രവിച്ചത്. ഇതോടെ അതുവരെ പ്രാര്‍ത്ഥനകളുാമായി കഴിഞ്ഞ അമ്മ സുശീല ഖാന്‍ മോഹാലസ്യപ്പെട്ട് വീഴുകയായിരുന്നു.
അമ്മയുടെ വിവരം അറിഞ്ഞ സല്‍മാന്റെ സഹോദരന്‍ സൊഹൈല്‍ ഖാന്‍ കോടതി മുറി വിട്ട് വീട്ടിലേയ്ക്ക് തിരിച്ചു. സല്‍മാന്റെ സഹോദരിമാര്‍ കോടതിയിലായിരുന്നു അന്നേരം. സഹോദരിമാരായ അല്‍വിരയും അര്‍പ്പിതയും വിധി കേള്‍ക്കുമ്പോള്‍ കോടതി മുറിയില്‍ ഉണ്ടായിരുന്നു. സഹോദരന്‍ കുറ്റക്കാരനാണെന്ന് ജഡ്ജി പറഞ്ഞതോടെ ഇവര്‍ ഏങ്ങലടക്കാന്‍ പാടുപെട്ടു. ഈ സമയം തലകുനിച്ച് നിന്ന സല്‍മാന്റെ കണ്ണില്‍ നിന്നും കണ്ണീരു പൊഴിയുകയും ചെയ്തു.
വിധി കേള്‍ക്കാനായി വീട്ടില്‍ നിന്നും സല്‍മാനൊപ്പം പിതാവ് സലിംഖാനും എത്തിയിരുന്നു. കോടതിമുറിയിലേക്ക് കടക്കും മുമ്പ് സല്‍മാന്‍ പിതാവിനെ കെട്ടിപ്പിടിച്ച ശേഷമാണ് പോയത്. വെളുത്ത ഷര്‍ട്ട് ധരിച്ചെത്തിയ സര്‍മാന്‍ കറുത്ത കൂളിങ് ഗ്ലാസും ധരിച്ചിരുന്നു
വിധി അറിഞ്ഞ് സല്‍മാന്റെ വീടിന് പുറത്ത് ആരാധകരുടെ ഒരുവന്‍തിര തന്നെയാണ് തടിച്ചുകൂടിയിരിക്കുന്നത്. ബോളിവുഡ് സിനിമാരംഗത്തു നിന്ന് വിധി കേട്ട് നിരവധി പേര്‍ പ്രാര്‍ത്ഥനയും ആശ്വാസവാക്കുകളുമായി രംഗത്തെത്തി.
എല്ലാ രാജകീയ സൗകര്യങ്ങളോടെ വാണ സല്‍മാന്‍ ഖാന്‍ എന്ന ബോളിവുഡ് രാജാവിന് ജയിലാണ് ഇനി ശരണം. പെട്ടന്നുള്ള ഈ മാറ്റം ആരാധകരേയും ധര്‍മ്മസങ്കടത്തിലാക്കുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha