കെട്ടുകഥകളേക്കാള്‍ വിചിത്രമായിരിക്കും ചിലപ്പോള്‍ സത്യങ്ങള്‍. ആര്‍ക്കും വിശ്വസിക്കാനോ സമ്മതിക്കാനോ തോന്നുകയേ ഇല്ല. അത്തരമൊരു സംഭവമാണ് ബ്രസീലില്‍ ഈയിടെ നടന്നത്.

ബ്രസീലിലെ പറൈബ - യില്‍ നിന്നാണ് ഇത് റിപ്പോര്‍ട്ട് ചെയ്യപ്പെട്ടത്. തന്റെ വീടിന്റെ ജനാലയിലൂടെ പുറത്തേക്ക് നോക്കിയിരിക്കുകയായിരുന്നു മധ്യവയസ്സിലെത്തിയ ഒരു വ്യക്തി. അപ്പോഴാണ് അപ്പോള്‍ ജനിച്ചതെന്നു തോന്നുന്ന ഒരു ആണ്‍കുഞ്ഞിനെയും കൊണ്ട് ഒരു യുവതി അവിടെയുള്ള ചവറുവീപ്പയ്ക്കരികിലേക്കു വരുന്നത് കണ്ടത്. ആ ചവറുവീപ്പയ്ക്കരികിലായി തീര്‍ത്തും നഗ്നനായി ആ പിഞ്ചുകുഞ്ഞിനെ കിടത്തിയിട്ട് ആ യുവതി നടന്നു മറഞ്ഞു.

ഈ കാഴ്ച കണ്ടുകൊണ്ടിരുന്ന ആള്‍ ഓടിവന്ന് ആ കുഞ്ഞിനെ എടുത്തിട്ട് പോലീസില്‍ വിവരം അറിയിച്ചു.
പോലീസെത്തി കുഞ്ഞിനെ ഏറ്റുവാങ്ങിയശേഷം, സി.സി. ടിവി ദൃശ്യങ്ങളില്‍ കണ്ട യുവതിയുടെ ചിത്രം പരസ്യപ്പെടുത്തി. ഈ യുവതിയെക്കുറിച്ച് എന്തെങ്കിലും വിവരം അറിയുന്നവര്‍ പോലീസുമായി ബന്ധപ്പെടാനാവശ്യപ്പെട്ടു. ഏറ്റെടുത്ത കുട്ടിയ്ക്ക് പോലീസുകാര്‍ വെറുതെ ഒരു പേരുമിട്ടു; മോസസ് എന്ന്.

അധികം വൈകാതെ തന്നെ ഒരു യുവാവ് പോലീസ് സ്റ്റേഷനിലെത്തി. ചില മാസങ്ങള്‍ക്കു മുമ്പ് താന്‍ ഉപേക്ഷിച്ച തന്റെ ഗേള്‍ഫ്രണ്ടാണ് സി.സി. ടിവിയില്‍ കണ്ട യുവതിയെന്നും, അവള്‍ ഗര്‍ഭിണി ആയിരുന്നുവെന്ന് തനിയ്ക്കറിയില്ലായിരുന്നുവെന്നും അയാള്‍ പറഞ്ഞു. ആ കുഞ്ഞ് തന്റെ കുഞ്ഞായിരിക്കാനാണ് സാധ്യതയെന്ന് തന്റെ പുതിയ ഗേള്‍ഫ്രണ്ടിനോടൊപ്പം പോലീസ് സ്റ്റേഷനിലെത്തിയ ആ യുവാവ് പറഞ്ഞു.

പോലീസുകാര്‍ യുവാവിനെ വിശദമായി ചോദ്യം ചെയ്തു. വന്ന യുവാവിന്റെ പേര് മോസസ് എന്നാണെന്നറിഞ്ഞപ്പോള്‍ പോലീസുകാര്‍ക്ക് അതിശയം അടക്കാനായില്ല. അവര്‍ കുഞ്ഞിനിട്ട പേര് അതായിരുന്നല്ലോ.? അതു കൂടാതെ, തന്റെ മകന്റെ കുഞ്ഞിനേയാണ് ആ യുവതി റോഡില്‍ കളഞ്ഞിട്ടു പോകുന്നതെന്ന് അറിയാതെ പോലീസിനെ വിവരമറിയിച്ചത് മോസസിന്റെ അച്ഛനായിരുന്നു.

ആ കുഞ്ഞിനെ ഏറ്റെടുത്ത് വളര്‍ത്താന്‍ തന്നെയാണ് മോസസിന്റെ തീരുമാനം. തന്റെ പേരക്കുട്ടിയെ തെരുവില്‍ നിന്ന് കോരിയെടുത്ത അപ്പൂപ്പനും, പുതിയ ഗേള്‍ഫ്രണ്ടും എല്ലാം പൂര്‍ണ്ണ പിന്തുണയുമായി മോസസിനോടൊപ്പമുണ്ട്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha