പടിയിറങ്ങാന്‍ ദിവസങ്ങള്‍ മാത്രം; വീണ്ടും ചൈനക്ക് പണികൊടുത്ത് ട്രംപ്; ഇത്തവണ ഷിയോമി അടക്കം ഒന്‍പത് കമ്പനികള്‍ക്ക് കിട്ടിയത് മുട്ടന്‍ പണി; കഴിഞ്ഞ ആഴ്ച ചൈനീസ് ആപ്ലിക്കേഷനുകള്‍ ഇപ്പോള്‍ കമ്പനികള്‍
ചൈനയോട് അമേരിക്കല്‍ പ്രസിഡന്റ് ഡോണാള്‍ഡ് ട്രംപിന് വല്ലാത്ത പകയുണ്ടെന്ന കാര്യത്തില്‍ സംശയമില്ല. അതുതന്നെയാണ് അമേരിക്കന്‍ പ്രസിഡന്റ് പദവിയില്‍ നിന്ന് സ്ഥാനമൊഴിയാന്‍ ദിവസങ്ങള്‍ മാത്രം ബാക്കിനില്‍ക്കേ ചൈനയ്ക്ക് വീണ്ടും പണികൊടുത്ത് പടിയിറങ്ങാന്‍ ട്രംപിന് പ്രരണനല്‍കിയത്. കനത്ത പ്രഹരമാണ് ട്രംപ് തന്റെ അവസാന നടപടിയിലൂടെ ചൈനക്ക് മേല്‍ ഏല്‍പ്പിച്ചിരിക്കുന്നത്. ദക്ഷിണ ചൈനാക്കടലിലെ ചൈനയുടെ നീക്കങ്ങളുടെ പേരില്‍ ഉദ്യോഗസ്ഥര്‍ക്കും ചൈനീസ് കമ്പനികള്‍ക്കും ഉപരോധമേര്‍പ്പെടുത്തി. കമ്പനികളില്‍ നിക്ഷേപം നടത്തുന്നതിനും നിരോധനം ഏര്‍പ്പെടുത്തിയിട്ടുണ്ട്. നിയുക്ത പ്രസിഡന്റ് ജോ ബൈഡന്‍ അധികാരമേല്‍ക്കാന്‍ ദിവസങ്ങള്‍ ശേഷിക്കേയാണ് ട്രംപ് ഭരണകൂടത്തിന്റെ നിര്‍ണായക നീക്കം.
കൊമാക്, ഷവോമി എന്നിവ അടക്കമുളള ഒമ്പതു കമ്പനികളെയാണ് പെന്റഗണിന്റെ പട്ടികയില്‍ ഉള്‍പ്പെടുത്തിയിരിക്കുന്നത്. ചൈനീസ് സൈന്യവുമായി ബന്ധമുണ്ടെന്നാരോപിച്ചാണ് നടപടി. ഈ കമ്പനികളില്‍ നിക്ഷേപം നടത്തുന്നത് യു.എസ്. നിരോധിക്കും. ആ കമ്പനികള്‍ പുതിയ യു.എസ്. നിക്ഷേപ നിരോധനത്തിന് വിധേയമാക്കും, ഇത് 2021 നവംബര്‍ 11 നകം കരിമ്പട്ടികയില്‍ പെടുത്തിയ കമ്പനികളില്‍ നിക്ഷേപം നടത്തുന്നത് നിരോധിക്കും. കരിമ്പട്ടികയില്‍ പെട്ട ഈ കമ്പനികളില്‍ നിന്ന് ഓഹരികള്‍ പിന്‍വലിക്കുന്നതിന് അമേരിക്കന്‍ നിക്ഷേപകര്‍ ഇതോടെ നിര്‍ബന്ധിതരാകും.
കൊമാക്, ഷവോമി എന്നീ കമ്പനികള്‍ക്ക് പുറമേ അഡ്വാന്‍സ്ഡ് ഫാബ്രിക്കേഷന്‍ എക്യുപ്മെന്റ് ഇന്‍കോര്‍പറേഷന്‍സ്, ലുവോകുങ് ടെക്നോളജി കോര്‍പ്, ബീജിങ് ഷോങ്കുവാന്‍കുങ് ഡെവലപ്പ്മെന്റ് ഇന്‍വെസ്റ്റ്മെന്റ് സെന്റര്‍, ഗോവിന്‍ സെമികണ്ടക്ടര്‍ കോര്‍പ്, ഗ്രാന്‍ഡ് ചൈന എയര്‍ കോ ലിമിറ്റഡ്, ഗ്ലോബല്‍ ടോണ്‍ കമ്യൂണിക്കേഷന്‍ ടെക്നോളജി കോ.ലിമിറ്റഡ്, ചൈന നാഷണല്‍ ഏവിയേഷന്‍ ഹോള്‍ഡിങ് ടോ ലിമിറ്റഡ് എന്നിവരെയും പട്ടികയില്‍ ഉള്‍പ്പെടുത്തിയിട്ടുണ്ട്. യുഎസ് നടപടിയോട് ചൈനീസ് കമ്പനികളുടെ പ്രതിനിധികള്‍ പ്രതികരിച്ചിട്ടില്ല.
കഴിഞ്ഞ ആഴ്ച്ച അലിപെയ്, വിചാറ്റ് പേ ഉള്‍പ്പെടെയുള്ള ചൈനീസ് ആപ്ലിക്കേഷനുകള്‍ ചൈന ആസ്ഥാനമായുള്ള കമ്പനികളുടെ ഉടമസ്ഥതയിലുള്ള മറ്റ് ആപ്ലിക്കേഷനുകള്‍ എന്നിവ നിരോധിക്കാനുള്ള എക്‌സിക്യൂട്ടീവ് ഉത്തരവില്‍ ട്രംപ് ഒപ്പിട്ടിയിരുന്നു. ജാക്ക് മായുടെ ഉടമസ്ഥതയിലുള്ള ആന്റ് ഗ്രൂപ്പിന്റെ അലിപെയ്, ടെന്‍സെന്റിന്റെ ക്യുക്യു, വിചാറ്റ് പേ, ക്യാംസ്‌കാനര്‍ എന്നിവയും ഇതില്‍ ഉള്‍പ്പെടും. എക്‌സിക്യൂട്ടീവ് ഉത്തരവ് 45 ദിവസത്തിനുള്ളില്‍ പ്രാബല്യത്തില്‍ വരും.
ചൈനീസ് ആപ്ലിക്കേഷനുകള്‍ക്കെതിരെ നിരോധനം ഏര്‍പ്പെടുത്താന്‍ ട്രംപ് സര്‍ക്കാരില്‍ നിന്ന് വലിയ നീക്കം നടന്നിട്ടുണ്ട്. എക്‌സിക്യൂട്ടീവ് ഉത്തരവില്‍ ഇന്ത്യയുടെ മാതൃക പോലും ട്രംപ് ഉദ്ധരിച്ചു. രാജ്യത്തൊട്ടാകെയുള്ള 200 ലധികം ചൈനീസ് ബന്ധമുള്ള ആപ്ലിക്കേഷനുകള്‍ ഇന്ത്യ നിരോധിച്ചിരിക്കുന്നു എന്നും ഉത്തരവില്‍ സൂചിപ്പിക്കുന്നുണ്ട്. ചൈനീസ് ആപ്ലിക്കേഷനുകള്‍ ഡേറ്റ മോഷ്ടിക്കുകയും രഹസ്യമായി, അനധികൃതമായി സെര്‍വറുകളിലേക്ക് കൈമാറുകയും ചെയ്യുന്നുവെന്ന് ഇന്ത്യന്‍ ഇലക്ട്രോണിക്‌സ് ആന്‍ഡ് ഇന്‍ഫര്‍മേഷന്‍ ടെക്നോളജി മന്ത്രാലയം വ്യക്തമാക്കിയിരുന്നു.
അമേരിക്കയില്‍ നിരോധിക്കാന്‍ ആഗ്രഹിക്കുന്ന ചില ആപ്ലിക്കേഷനുകള്‍ ഇതിനകം ഇന്ത്യയില്‍ നിരോധിച്ചിരിക്കുന്നു. ആപ്ലിക്കേഷനുകളില്‍ കാംസ്‌കാനര്‍, ക്യുക്യു വാലറ്റ്, ഷെയര്‍ഇറ്റ്, ടെന്‍സെന്റ് ക്യുക്യു, വിമേറ്റ്, വിചാറ്റ് പേ, ഡബ്ല്യുപിഎസ് ഓഫിസ് എന്നിവയും ഉള്‍പ്പെടുന്നു എന്നും റിപ്പോര്‍ട്ടിലുണ്ട്.
https://www.facebook.com/Malayalivartha
