'വീട്ടില് അപ്പൂപ്പനും അമ്മൂമ്മയും മക്കളും കൊച്ചുമക്കളും ചേര്ന്ന് നൃത്തം ചെയ്യുന്ന രംഗം എത്ര രസരമായിരിക്കും. കുടുംബാന്തരീക്ഷം ഊഷ്മളമാകും. ആഴ്ചയില് ഒരുദിവസം ഇത്തരത്തില് ആഘോഷങ്ങള്ക്കായി മാറ്റിവെക്കാം....' വൈറലായി കുറിപ്പ്
വെറും മുപ്പത് സെക്കൻഡ് ചടുലനൃത്തത്തിലൂടെ സാമൂഹിക മാധ്യമങ്ങൾ കീഴടക്കിയ തൃശൂർ മെഡിക്കൽ കോളജ് വിദ്യാർത്ഥികളായ ജാനകിക്കും നവീനുമെതിരെ സമൂഹമാധ്യമങ്ങളിൽ വിദ്വേഷ പ്രചാരണം. ലവ് ജിഹാദ് ആരോപിച്ചാണ് ഇരുവർക്കുമെതിരെ പല പ്രൊഫൈലുകളിൽ നിന്ന് ആക്രമണം നടക്കുന്നത്. എന്നാൽ നൃത്തം ജീവിതത്തെ എത്രത്തോളം സഹായിക്കുന്നു എന്ന് വ്യക്തമാക്കി രംഗത്ത് എത്തിയിരിക്കുകയാണ് ഡോ.പി പി വിജയൻ.
ഫേസ്ബുക്ക് കുറിപ്പിന്റെ പൂര്ണരൂപം ഇങ്ങനെ;
അപ്പൂപ്പനും കൊച്ചുമക്കളും ചേര്ന്ന് ഡാന്സ് കളിച്ചാലോ?
ഇസ്രായേലിലെ പ്രമുഖ സാമ്പത്തിക ശാസ്ത്രജ്ഞനായ റാഫി എല്ഡോര് വളരെ ഞെട്ടലോടെയാണ് തനിക്ക് പാര്ക്കിന്സണ്സ് രോഗമാണെന്ന് തിരിച്ചറിഞ്ഞത്. രോഗത്തെ മറികടക്കാന് അദ്ദേഹം പലവഴികള് ആലോചിച്ചു. അങ്ങനെ തനിക്ക് ഒരു ബന്ധവുമില്ലാത്ത നൃത്തത്തില് ഒരു കൈ നോക്കാന് തീരുമാനിച്ചു. ആദ്യം ചെറുതായി തുടങ്ങിയ അദ്ദേഹം പിന്നീട് പ്രശസ്ത ടെലിവിഷന് ഷോകളില് വരെ പങ്കെടുത്ത് ഒടുവില് ഒരു പ്രൊഫഷണല് ഡാന്സറായി മാറി. അങ്ങനെ അദ്ദേഹം തന്റെ രോഗത്തെ പൂര്ണ്ണമായും തോല്പ്പിച്ചു. അതുമാത്രമോ ലോകത്തെ നിരവധി പാര്ക്കിന്സണ്സ് രോഗികള്ക്ക് അദ്ദേഹം നൃത്തത്തിലൂടെ പ്രചോദനവും ആത്മവിശ്വാസവും പകരുന്നു. അദ്ദേഹത്തിന്റെ ജീവിതകഥയും നൃത്തവുമൊക്കെ യൂട്യൂബില് കാണാന് കഴിയും.
ഒരു സാമ്പത്തികശാസ്ത്രജ്ഞന് പ്രൊഫഷണല് ഡാന്സര് ആകാമെങ്കില് മെഡിക്കല് വിദ്യാര്ത്ഥികള്ക്ക് എന്തുകൊണ്ട് ഡാന്സ് കളിച്ചുകൂടാ? വീട്ടമ്മക്കും ആകാം, 90 പിന്നിട്ടവര്ക്കും ആകാം.
ഡാന്സ് ചെയ്യുന്നത് എന്തോ മോശപ്പെട്ട കാര്യമായാണ് കേരളത്തില് പൊതുവേ കരുതുന്നത്. പ്രത്യേകിച്ച് പഴയ തലമുറയില്പ്പെട്ടവര്. അത്തരം ചിന്തകളൊന്നും വേണ്ട. നൃത്തം ചെയ്യാനുള്ള ഒരു അവസരവും വിട്ടുകളയരുത്. മനസിലുള്ള എല്ലാ അസ്വസ്ഥതകളും ഉല്കണ്ഠകളും നെഗറ്റീവ് ചിന്തകളും വെറുപ്പും ഭയവും നിരാശയുമെല്ലാം നൃത്തത്തിലൂടെ അലിഞ്ഞുപോകാന് അനുവദിക്കാം.
വീട്ടില് അപ്പൂപ്പനും അമ്മൂമ്മയും മക്കളും കൊച്ചുമക്കളും ചേര്ന്ന് നൃത്തം ചെയ്യുന്ന രംഗം എത്ര രസരമായിരിക്കും. കുടുംബാന്തരീക്ഷം ഊഷ്മളമാകും. ആഴ്ചയില് ഒരുദിവസം ഇത്തരത്തില് ആഘോഷങ്ങള്ക്കായി മാറ്റിവെക്കാം. ഒറ്റയ്ക്കാണെങ്കിലും കുഴപ്പമില്ല. വീട്ടില് മുറിയടച്ചിരുന്ന് ഹെഡ്സെറ്റില് ഇഷ്ടമുള്ള പാട്ട് കേട്ട് ഡാന്സ് ചെയ്തു നോക്കൂ. ഡാന്സിന്റെ സ്റ്റെപ്പിലേക്കൊന്നും ശ്രദ്ധിക്കേണ്ട.
എന്റെ ക്ലാസുകളില് ആദ്യം മസില് പിടിച്ച് ആരോടും മിണ്ടാതിരിക്കുന്നവര് ഒരു ഡാന്സ് കഴിയുന്നതോടെ മൊത്തത്തില് മാറും. ക്ലാസില് വളരെ ആക്റ്റീവ് ആകുന്നത് കാണാറുണ്ട്. സ്കൂളുകളിലും കോളെജുകളിലും ഇത്തരത്തില് ക്ലാസുകള്ക്ക് ഇടയില് ഒരു 'ഡാന്സ് ബ്രേക്ക്' ആകാം. ക്ലാസുകളില് കൂടുതലായി ശ്രദ്ധ കേന്ദ്രീകരിക്കാന് ഇത് കുട്ടികളെ സഹായിക്കും. എല്ലാം മറന്ന് നൃത്തം ചെയ്യുന്നത് ശരീരത്തിലും മനസിലും അല്ഭുതകരമായ മാറ്റങ്ങളുണ്ടാകും. നൃത്തം ചെയ്യുന്നതിലൂടെ,
1. കാര്ഡിയോ വാസ്കുലാര് ഹെല്ത്ത് മെച്ചപ്പെടും. വ്യായാമം ചെയ്യാന് മടിയുള്ളവര്ക്ക് സൂമ്പ പോലെയുള്ള നൃത്തരൂപങ്ങള് പരിശീലിക്കാം.
2. തലച്ചോറിന്റെ ശേഷി കൂടുന്നു. തല്ഫലമായി വേഗത്തില് മികച്ച രീതിയില് ജോലികള് പൂര്ത്തീകരിക്കാന് സാധിക്കുന്നു. നമ്മള് കൂടുതല് പ്രൊഡക്റ്റീവ് ആകുന്നു.
3. ഒരു സോഷ്യല് ആക്റ്റിവിറ്റി എന്ന നിലയില് ഡാന്സ് മനസുകളെ തമ്മില് അടുപ്പിക്കുന്നു. ബന്ധങ്ങള് കൂടുതല് ഊഷ്മളമാക്കുന്നു.
4. നിങ്ങളുടെ മൂഡ് മെച്ചപ്പെടുത്തുന്നു. വിഷാദത്തിനുള്ള സാധ്യതകള് കുറയ്ക്കുന്നു. സംഗീതത്തിനൊപ്പം നൃത്തം ചെയ്യുമ്പോള് ഉല്കണ്ഠ കുറയ്ക്കുന്ന ഹോര്മോണുകള് ശരീരത്തില് കൂടുതലായി ഉല്പ്പാദിപ്പിക്കപ്പെടുന്നു.
5. സ്ഥിരമായി നൃത്തം ചെയ്യുന്നത് പ്രായത്തെ മറികടക്കാന് നിങ്ങളെ സഹായിക്കും.
6. സെല്ഫ് കോണ്ഫിഡന്സും സെല്ഫ് എസ്റ്റീമും കൂട്ടുന്നു.
നൃത്തത്തിന്റെ പ്രയോജനങ്ങള് എഴുതിയാല് തീരില്ല. അപ്പോള് നിങ്ങളും നൃത്തം ചെയ്യാന് തുടങ്ങുകയല്ലേ?
ഡോ. പിപി വിജയൻ
https://www.facebook.com/Malayalivartha