ടെലിവിഷന്‍ പ്രേക്ഷകരുടെ പ്രിയ നായകനാണ് അനൂപ് കൃഷ്ണന്‍. സീതാകല്ല്യാണത്തിലെ നായകന്‍ ഷോയിലേക്ക് എത്തിയതോടെ ആരാധകരും സന്തോഷത്തിലായിരുന്നു. പരമ്പരയില്‍ നിന്നും അപ്രത്യക്ഷനായ കല്യാണ്‍ ബിഗ് ബോസിലുണ്ടെന്നായിരുന്നു ട്രോളര്‍മാര്‍ പറഞ്ഞത്. പ്രിയപ്പെട്ട മത്സരാര്‍ത്ഥിയെക്കുറിച്ച് ചോദിച്ചപ്പോള്‍ അഭിനേത്രിയായ രേഷ്മ നായര്‍ പറഞ്ഞത് അനൂപിന്റെ പേരായിരുന്നു.

കുടുംബവിളക്കിലൂടെയാണ് രേഷ്മ പ്രേക്ഷക ഹൃദയത്തില്‍ ഇടം നേടിയത്. ആരാധകരുമായി സംവദിക്കുന്നതിനിടയിലായിരുന്നു രേഷ്മ അനൂപിനോടുള്ള ഇഷ്ടത്തെക്കുറിച്ച് പറഞ്ഞത്.

ഡിംപലിനേയും മണിക്കുട്ടനേയും കൂടാതെ ആരെയാണ് ഇഷ്ടമെന്നായിരുന്നു ചോദ്യം. എന്നാണ് കുടുംബവിളക്കിലേക്ക് തിരിച്ചുവരുന്നതെന്ന് ചോദിച്ചപ്പോൾ ഞാനും അതിനായാണ് കാത്തിരിക്കുന്നതെന്നായിരുന്നു തിരിച്ചുള്ള മറുപടി.

മികച്ച പിന്തുണ സ്വന്തമാക്കി മുന്നേറുകയാണ് അനൂപ്. ടാസ്‌ക്കുകളില്‍ തന്റേതായ കഴിവ് തെളിയിച്ച് വിജയിക്കാറുണ്ടെങ്കിലും ക്യാപ്റ്റനാവാനുള്ള അവസരം താരത്തിന് ലഭിച്ചിരുന്നില്ല. ക്യാപ്റ്റന്‍സി ടാസ്‌ക്കില്‍ മത്സരിക്കാറുണ്ടെങ്കിലും പൊരുതി തോല്‍ക്കുന്ന പതിവായിരുന്നു. അനൂപിന്റെ ക്യാപ്റ്റന്‍സി കാണാനാഗ്രഹമുണ്ടെന്നായിരുന്നു സഹ മത്സരാര്‍ത്ഥികള്‍ പറഞ്ഞത്.

എലിമിനേഷനിലൂടെ അഡോണി പുറത്തേക്ക് പോയതോടെയായിരുന്നു അനൂപിന് ക്യാപ്റ്റന്‍ സ്ഥാനം ലഭിച്ചത്. അദ്ദേഹം എങ്ങനെയാണ് കാര്യങ്ങള്‍ ചെയ്യുന്നതെന്നറിയാനായി കാത്തിരിക്കുകയാണ് എല്ലാവരും.

ഫിനാലെ വേദിയില്‍ മോഹന്‍ലാലിന്റെ കൈ പിടിച്ച് നില്‍ക്കുന്ന നിമിഷമാണ് താനെപ്പോഴും ഓര്‍ക്കുന്നതെന്ന് നേരത്തെ അനൂപ് പറഞ്ഞിരുന്നു. ഇടയ്ക്ക് മത്സരത്തില്‍ നിന്നും പിന്നോട്ടായിരുന്നുവെങ്കിലും ശക്തമായ തിരിച്ചു വരവ് നടത്തുകയായിരുന്നു. മണിക്കുട്ടന്‍ തിരിച്ചു വന്നതോടെ ഏറെ സന്തോഷമായിരുന്നു അനൂപിന്.

ഇനി നീ പുറത്തേക്ക് പോവരുതെന്നായിരുന്നു അനൂപ് പറഞ്ഞത്. നിന്റെ ഉപ്പുമാവ് കഴിക്കാനായാണ് താന്‍ തിരിച്ചെത്തിയതെന്നായിരുന്നു മണിക്കുട്ടന്റെ ട്രോള്‍. ബിഗ് ബോസിലെ കാര്യങ്ങളെക്കുറിച്ചും മറ്റ് വിഷയങ്ങളെക്കുറിച്ചുമെല്ലാം ഇവര്‍ സംസാരിക്കാറുണ്ട്. എല്ലാവരുമായും മികച്ച സൗഹൃദമാണ് അനൂപ് നിലനിര്‍ത്തുന്നത്.