കൊവിഡ് വാക്സിനായ കോവിഷീല്‍ഡിന്റെ ഉത്പാദകരായ സിറം ഇന്‍സ്റ്റിറ്റ്യൂട്ട് ഓഫ് ഇന്ത്യ ചീഫ് എക്സിക്യൂട്ടീവ് ഓഫീസര്‍ അദാര്‍ പൂനെവാലയ്ക്കും കുടുംബാംഗങ്ങള്‍ക്കും എതിരെ ഭീഷണി എന്ന വാര്‍ത്ത നേരത്തെ തന്നെ പുറത്ത് വന്നിരുന്നു. ഭീഷണിയെ തുടര്‍ന്ന് അദ്ദേഹം ഇന്ത്യ വിട്ടതായും റിപ്പോര്‍ട്ടുകളുണ്ടായിരുന്നു. ഇതിനിടെയാണ് അദ്ദേഹത്തിനും കുടുംബത്തിനും 'സെഡ് പ്ലസ്' വിഭാഗത്തിലുള്ള സുരക്ഷ നല്‍കണമെന്ന് ആവശ്യപ്പെട്ട് ബോംബെ ഹൈക്കോടതിയില്‍ റിട്ട് ഹര്‍ജി ഫയല്‍ ചെയ്തിരിക്കുന്നത്. അഭിഭാഷകനായ ദത്താ മനെയാണ് അപേക്ഷ നല്‍കിയത്.

ഇദ്ദേഹത്തെ ഭീഷണിപ്പെടുത്തുന്നവര്‍ക്കെതിരെ എഫ്ഐആര്‍ രജിസ്റ്റര്‍ ചെയ്യാന്‍ പൂനെ പൊലീസ് കമ്മിഷണര്‍ക്കും മഹാരാഷ്ട്ര പൊലീസ് ഡയറക്ടര്‍ ജനറലിനും നിര്‍ദേശം നല്‍കണമെന്നും ഹര്‍ജിയില്‍ ആവശ്യപ്പെടുന്നു. നിലവില്‍ ലണ്ടനിലുള്ള പൂനെവാലയ്ക്ക് കേന്ദ്രസര്‍ക്കാര്‍ അടുത്തിടെ വൈ കാറ്റഗറി സുരക്ഷ അനുവദിച്ചിരുന്നു.

അതേസമയം, ഭീഷണിപ്പെടുത്തിയതാരെന്ന വ്യക്തമാക്കാന്‍ പൂനെവാല തയാറയിട്ടില്ല. ചില സംസ്ഥാനങ്ങളുടെ മുഖ്യമന്ത്രിമാരും കോര്‍പ്പറേറ്റുകളും ഭീഷണിപ്പെടുത്തിയവരില്‍ ഉള്‍പ്പെടുന്നുവെന്നാണ് റിപ്പോര്‍ട്ടുകള്‍. അദ്ദേഹത്തിന്റെ സ്വന്തം സംസ്ഥാനത്ത് നിന്നു തന്നെയാണ് ഭീഷണിയില്‍ ഏറിയ പങ്കും. മഹാരാഷ്ട്ര ഭരിക്കുന്ന ശിവസേനയും എന്‍.സി.പിയും കോണ്‍ഗ്രസും ഉള്‍പ്പെടുന്ന മഹാസഖ്യത്തിലെ ശക്തരായ നേതാക്കള്‍ പുനെവാലയെ ഭീഷണിപ്പെടുത്തിയെന്നാണ് വിവരം. രാജ്യത്തെ കൊവിഡ് വ്യാപനം ഏറ്റവും രൂക്ഷമായ സംസ്ഥാനമാണ് മഹാരാഷ്ട്ര. സിറം ഇന്റ്സ്റ്റിറ്റിയൂട്ട് മഹാരാഷ്ട്രക്ക് പരമാവധി വാക്‌സിന്‍ നല്‍കി സഹായിക്കണമെന്ന് പൂനെവാലെയോട് മഹാരാഷ്ട്ര മുഖ്യമന്ത്രി ഉദ്ധവ് താക്കറെ ആവശ്യപ്പെട്ടിയിരുന്നു.

എല്ലാവര്‍ക്കും വാക്‌സിന്‍ വേണം. പക്ഷേ അത് ഉണ്ടാക്കാനുള്ള ബുദ്ധിമുട്ട ആര്‍ക്കും അറിയില്ല. വാക്‌സിന്‍ ലഭിച്ചില്ലെങ്കില്‍ ഒന്നും നല്ല രീതിയില്‍ മുന്നോട്ട് പോകില്ലെന്നാണ് പലരും പറയുന്നത്. ഇത് ശരിയായ ഭാഷയല്ലെന്നും പൂനെവാല പറഞ്ഞു. എല്ലാം ഇപ്പോള്‍ എന്റെ ചുമലിലാണ്. തനിക്ക് മാത്രമായി ഒന്നും ചെയാനാവില്ലെന്നും അദാര്‍ പൂനെവാല കൂട്ടിചേര്‍ത്തു.

സംസ്ഥാനങ്ങള്‍ക്ക് 400 രൂപക്ക് വാക്‌സിന്‍ നല്‍കുമെന്ന് പറഞ്ഞ സിറം ഇന്‍സ്റ്റിറ്റ്യൂട്ട് പിന്നിട് കേന്ദ്ര സര്‍ക്കാരിന്റെ നിര്‍ദ്ദേശത്തെ തുടര്‍ന്ന് 300 രൂപയാക്കി കുറച്ചിരുന്നു. അതേസമയം രണ്ട് മാസത്തേക്കുള്ള കൊവിഡ് വാക്‌സിന് വേണ്ടി കേന്ദ്രസര്‍ക്കാരും സിറം ഇന്‍സ്റ്റിറ്റ്യൂട്ട് ഓഫ് ഇന്ത്യയും ധാരണയിലെത്തിയിരുന്നു. മെയ്, ജൂണ്‍, ജൂലൈ മാസങ്ങളില്‍ 11 കോടി ഡോസ് കൊവിഷീല്‍ഡ് വാക്‌സിന്‍ ലഭിക്കുന്നതിനായി കേന്ദ്രസര്‍ക്കാര്‍ 1,732.50 കോടി രൂപ കമ്പനിയ്ക്ക് മുന്‍കൂറായി നല്‍കിയെന്നാണ് സിറം ഇന്‍സ്റ്റിറ്റ്യൂട്ട് വ്യക്തമാക്കി.

മെയ്, ജൂണ്‍, ജൂലൈ എന്നിങ്ങനെ മൂന്ന് മാസത്തേക്ക് 11 കോടി ഡോസ് കൊവിഷീല്‍ഡ് വാക്സിനായി 1,732.50 കോടി രൂപ മുന്‍കൂറായി സിറം ഇന്‍സ്റ്റിറ്റ്യൂട്ടിന് നല്‍കിയിട്ടുണ്ടെന്ന് ആരോഗ്യ മന്ത്രാലയം നേരത്തെ വ്യക്തമാക്കിയിരുന്നു. ഇതില്‍ ടിഡിഎസിന് ശേഷം 1,699.50 കോടി രൂപയാണ് ഏപ്രില്‍ 28 ന് എസ്‌ഐഐക്ക് ലഭിച്ചത്. ഇതില്‍ മെയ് മൂന്നു വരെ 744 കോടി ഡോസ് വാക്‌സിനാണ് വിതരണം ചെയ്തിട്ടുള്ളത്. കൊവിഡ് വാക്സിനുകള്‍ക്കായി കേന്ദ്രം പുതിയ ഓര്‍ഡറുകളൊന്നും നല്‍കിയിട്ടില്ലെന്ന് ആരോപിക്കുന്ന മാധ്യമ റിപ്പോര്‍ട്ടുകള്‍ തെറ്റാണെന്ന് മന്ത്രാലയം അറിയിച്ചു.