കെ കെ ശൈലജയ്ക്കെതിരെ ആസൂത്രിത നീക്കം; രണ്ടാം പിണറായി സര്ക്കാര് മന്ത്രിസഭയില് ശൈലജ ഉണ്ടാകില്ല? മട്ടന്നൂരിലെ സീറ്റിലെ വടംവലിയുടെ തുടര്ച; കണ്ണൂര് ലോബിയോട് യോജിക്കാതെ മുഖ്യമന്ത്രി പിണറായി വിജയന്
ഒന്നാം പിണറായി മന്ത്രിസഭയിലെ സ്റ്റാര് ആരെന്ന് ചോദിച്ചാല് ആര്ക്കും തര്ക്കമുണ്ടാകില്ല അത് കെ കെ ശൈലജയാണ് പറയാന്. എന്നാല് രണ്ടാം പിണറായി സര്ക്കാര് മന്ത്രിസഭയിലേക്ക് അവരെ പരിഗണിക്കാത്തിരിക്കാന് ചരടു വലി നടക്കുന്നതായിയാണ് വിവരം. സിപിഎം മന്ത്രിമാരില് മുഖ്യമന്ത്രി പിണറായി വിജയന് ഒഴികെ എല്ലാവരും പുതുമുഖങ്ങളാകട്ടെ എന്ന നിര്ദേശം സംസ്ഥാന സെക്രട്ടേറിയറ്റില് ഉയര്ന്നതിനെച്ചൊല്ലി പാര്ട്ടിയില് കൊണ്ടുപിടിച്ച ചര്ച്ചയാണ് നടക്കുന്നത്. പുതുമുഖം എന്ന ആശയം ഉയര്ന്നപ്പോള് കെ.കെ ശൈലജക്ക് ഇതില് ഇളവ് ലഭിക്കുമെന്നാണ് ആദ്യം ലഭിച്ച സൂചന. എന്നാല് അതിനുള്ള സാധ്യത ഇല്ലാതാക്കുന്നതാണ് ഇപ്പോള് പുറത്ത് വരുന്ന വിവരം.
മട്ടന്നൂര് സീറ്റില് മത്സരിക്കുന്നതിനെച്ചൊല്ലി നേരത്തെ നടന്ന വടംവലിയുടെ തുടര്ച്ചയാണ് ഇപ്പോഴത്തെ നീക്കങ്ങള്ക്ക് പിന്നില്. മന്ത്രി കെ.കെ.ശൈലജയ്ക്കെതിരെ കഴിഞ്ഞ ദിവസം ചേര്ന്ന സംസ്ഥാന സെക്രട്ടേറിയറ്റില് കണ്ണൂരില്നിന്നുള്ള ചിലര് നടത്തിയതായാണു വിവരം. നിയമസഭാ തിരഞ്ഞെടുപ്പിലേക്കു രണ്ടു ടേം നിബന്ധന നടപ്പാക്കിയതു പരക്കെ അംഗീകരിക്കപ്പെട്ടതിനു തെളിവാണു തിരഞ്ഞെടുപ്പിലെ വന് വിജയമെന്നും ആ മാതൃകയില് മന്ത്രിസഭയിലും പാര്ട്ടിയുടെ മന്ത്രിമാര് എല്ലാവരും പുതുമുഖങ്ങളാവട്ടെ എന്നുമായിരുന്നു ഒരു കേന്ദ്ര കമ്മിറ്റിയംഗത്തിന്റെ നിര്ദേശം. എന്നാല് മുഖ്യമന്ത്രിതന്നെ ഈ ചര്ച്ചയ്ക്കു വിലങ്ങിട്ടുവെന്നാണു സൂചന.
സ്ഥാനാര്ഥിത്വത്തിലെ തലമുറമാറ്റം മന്ത്രിസഭയിലും പ്രതിഫലിക്കണമെന്നാണു സിപിഎമ്മില് ഉടലെടുത്തിട്ടുള്ള ധാരണ. പുതിയ മന്ത്രിസഭയില് അംഗങ്ങളായ നിലവിലെ മന്ത്രിമാരെയെല്ലാം നിലനിര്ത്തണോ, അതല്ല കേന്ദ്രകമ്മിറ്റിയംഗം ശൈലജ ഒഴികെ മറ്റെല്ലാവരെയും പൊതുമാനദണ്ഡം അടിസ്ഥാനമാക്കി മാറ്റണോ എന്നതാണു പാര്ട്ടിയില് ഇനി തീരുമാനിക്കാനുള്ളത്. പുതുമുഖങ്ങളെ ഉള്പ്പെടുത്തണമെന്ന് ഏതാണ്ടു ധാരണയുണ്ടെങ്കിലും അക്കൂട്ടത്തില് ശൈലജയെക്കൂടി ഒഴിവാക്കണമെന്ന ലക്ഷ്യത്തോടെയാണത്രെ സംസ്ഥാന സെക്രട്ടേറിയറ്റില് കേന്ദ്ര കമ്മിറ്റിയംഗം ചര്ച്ച നടത്തിയത്.
കണ്ണൂര് ജില്ലാ സെക്രട്ടേറിയറ്റില് സീറ്റു വിഭജനം സംബന്ധിച്ച ചര്ച്ച നടന്നപ്പോള് മട്ടന്നൂര് ഇല്ലെങ്കില് താന് മത്സരിക്കുന്നില്ലെന്നു കെ.കെ.ശൈലജ കടുപ്പിച്ച ഭാഷയില് വ്യക്തമാക്കിയത് ഈ നീക്കം മുന്നില് കണ്ടാണ്. മട്ടന്നൂരില് ജനവിധി തേടാന് ആഗ്രഹിച്ച ചിലരാണ് ഈ നീക്കത്തിനു പിന്നിലെന്നാണ് വിലയിരുത്തപ്പെടുന്നത്. മുന് മന്ത്രി ഇ.പി.ജയരാജന് 2016ല് കിട്ടിയ ഭൂരിപക്ഷത്തേക്കാള് പതിനേഴായിരത്തില്പ്പരം വോട്ടിന്റെ ഭൂരിപക്ഷത്തിലാണു ശൈലജ ഇക്കുറി മട്ടന്നൂരില് തിരഞ്ഞെടുക്കപ്പെട്ടത്. ജയരാജനാകട്ടെ, ടേം നിബന്ധനയില് തട്ടി സീറ്റു ലഭിച്ചതുമില്ല.
ശൈലജയ്ക്കു പുറമെ എം.വി.ഗോവിന്ദന്, കെ.രാധാകൃഷ്ണന്, പി.രാജീവ്, കെ.എന്.ബാലഗോപാല് എന്നിവര് മന്ത്രിസഭയില് ഉണ്ടാകുമെന്ന് ഏതാണ്ടുറപ്പാണ്. വി.ശിവന്കുട്ടി, വി.എന്.വാസവന്, പി.പി.ചിത്തരഞ്ജന്, സജി ചെറിയാന്, പി.നന്ദകുമാര്, സി.എച്ച്.കുഞ്ഞമ്പു, വീണാ ജോര്ജ്, എം.ബി.രാജേഷ്, കാനത്തില് ജമീല, ആര്.ബിന്ദു, എ.എന്.ഷംസീര്, കെ.ടി.ജലീല് എന്നീ പേരുകളും പരിഗണനയിലുണ്ട്. ഇവരില് ഒരാള് സ്പീക്കര് ആകാനാണു സാധ്യത.
https://www.facebook.com/Malayalivartha