ഇനി കോണ്‍ഗ്രസില്‍ കെ.സി, വി.ഡി അച്ചുതണ്ട്; കെ സുധാകരന്‍ കൂടി എന്തുമ്പോള്‍ എ, ഐ. ഗ്രൂപ്പുകളുടെ അസ്തമയം പൂര്‍ണമാകും; കേരളത്തിലെ കോണ്‍ഗ്രസിനുള്ളില്‍ ഇനി പുതിയ ഗ്രൂപ്പ് സമവാക്യങ്ങള്‍; പാര്‍ട്ടിയുടെ താഴെത്തട്ടിലെ സമഗ്രമായ അഴിച്ചുപണി നയിക്കുക ഇതിലേക്ക്
വി.ഡി. സതീശന്റെ കടന്ന് വരവ് തലമുറമാറ്റം തന്നെയാണ്. സംസ്ഥാന കോണ്‍ഗ്രസില്‍ ഉമ്മന്‍ ചാണ്ടി-രമേശ് ചെന്നിത്തല യുഗത്തിനും എ, ഐ. ഗ്രൂപ്പ് ബലാബലത്തിനും ഏറെക്കുറേ വിരാമം ആകുന്ന തീരുമാനം. ഇനി കോണ്‍ഗ്രസില്‍ പുതിയ ഗ്രൂപ്പ് സമവായങ്ങള്‍ക്കുള്ള സമയമാണ്. ഡല്‍ഹിയില്‍ നിന്ന് കെ.സി വേണുഗോപാലും കേരളത്തില്‍ വി.ഡി സതീശനും ഇവരുടെ നിരയിലേക്ക് കെ. സുധാകരന്‍ കെ.പി.സി.സി പ്രസിഡന്റായി കൂടി എത്തുമ്പോള്‍ ഇനി ഈ അച്ചുതണ്ടിലായിരിക്കും കേരളത്തിലെ കോണ്‍ഗ്രസിന്റെ മുന്നോട്ട് പോക്ക് എന്ന കാര്യത്തില്‍ സംശയമില്ല.
പരാജയത്തിന്റെ പശ്ചാത്തലത്തിലും അനുഭവസമ്പത്തിന്റെ ബലത്തില്‍ തലമുറമാറ്റത്തിനു തടയിടാനിറങ്ങിയ ഉമ്മന്‍ ചാണ്ടിക്കും ചെന്നിത്തലയ്ക്കും തൊട്ടതെല്ലാം പിഴച്ചു. പ്രതിപക്ഷ നേതാവിനെ മാറ്റാന്‍ ഹൈക്കമാന്‍ഡിന്റെ ബലത്തില്‍ കെ.സി. വേണുഗോപാല്‍ നടത്തിയ കരുനീക്കം തടയാന്‍ എ, ഐ ഗ്രൂപ്പുകള്‍ക്കായില്ല. രണ്ട് ഗ്രൂപ്പിലും ചോര്‍ച്ചയുണ്ടാക്കിയ വേണുഗോപാല്‍ കൂടുതല്‍ കരുത്തനായി മാറിയിരിക്കുകയാണ്.
ഐ ഗ്രൂപ്പില്‍ കെ. സുധാകരനും ചെന്നിത്തലയെ കൈവിട്ടതോടെ സതീശന്റെ വഴി സുഗമമായി. എ ഗ്രൂപ്പിലെ യുവനേതാക്കള്‍ മാത്രമല്ല, തിരുവഞ്ചൂര്‍ രാധാകൃഷ്ണനും പി.ടി. തോമസും ഉള്‍പ്പെടെയുള്ള മുതിര്‍ന്നനേതാക്കളും ചെന്നിത്തലയെ പിന്തുണയ്ക്കാനുള്ള ഉമ്മന്‍ ചാണ്ടിയുടെ നീക്കത്തിനൊപ്പം നിന്നില്ല. ബെന്നി ബെഹന്നാന്‍ ഒഴികെയുള്ള എം.പിമാരും ഉമ്മന്‍ ചാണ്ടിക്ക് ഒപ്പമായിരുന്നില്ല. കെ. മുരളീധരനും കൊടിക്കുന്നില്‍ സുരേഷുമെല്ലാം മാറ്റത്തിനു കൈയടിച്ചതോടെ ഹൈക്കമാന്‍ഡിനു തീരുമാനം എളുപ്പമായി.
ഇനി രണ്ടു വിഭാഗങ്ങളില്‍നിന്നും വേണുഗോപാല്‍ നയിക്കുന്ന പക്ഷത്തേക്ക് ഒഴുക്കുണ്ടാവും. എ ഗ്രൂപ്പ് ഉമ്മന്‍ ചാണ്ടിയുടെ നേതൃത്വത്തില്‍ പേരിനു നിലനില്‍ക്കുമെങ്കിലും വേണുഗോപാലും സുധാകരനും സതീശനും ചെന്നിത്തല ക്യാമ്പ് വിട്ടതോടെ ഐ ഗ്രൂപ്പിന്റെ പതനം പൂര്‍ത്തിയാവുകയാണ്. തകര്‍ന്നു പോയ സംഘടന സംവിധാനത്തിന് ഊര്‍ജം നല്‍കാന്‍ ഡി.സി.സി തലത്തിലടക്കം താഴെത്തട്ടില്‍ സമഗ്രമായ അഴിച്ചുപണി വരുന്നതോടെ ഗ്രൂപ്പു സമവാക്യങ്ങളില്‍ കാതലായ മാറ്റങ്ങള്‍ സംഭവിക്കും.
കെ. സുധാകരന്‍ കെ.പി.സി.സി. പ്രസിഡന്റ് ആകുന്നതോടെ ജംബോ കമ്മിറ്റികള്‍ പിരിച്ചുവിട്ട് സുധാകരന്റെ നേതൃത്വത്തില്‍ ഒരു ടീം കെ.പി.സി.സിയുടെ തലപ്പത്തേക്ക് വരാനുള്ള സാധ്യത. പി.സി വിഷ്ണുനാഥ്, ഷാഫി പറമ്പില്‍, മാത്യു കുഴല്‍നാടന്‍, ഹൈബി ഈഡന്‍, റോജി എം. ജോണ്‍, സി.ആര്‍. മഹേഷ്, ടി. സിദ്ദീഖ് എന്നിങ്ങനെ പോകുന്ന യുവനിരയായിരിക്കും വി.ഡി. സതീശനും സുധാകരനും ഒപ്പം കോണ്‍ഗ്രസിനെ ഇനി നയിക്കുക. ഇവരോടൊപ്പം പി.ടി. തോമസ് യു.ഡി.എഫ് കണ്‍വീനറായി മുഖ്യധാരയില്‍ ഉണ്ടാകണമെന്നും കരുതപ്പെടുന്നു.
ഒന്നരപ്പതിറ്റാണ്ട് നീണ്ടുനിന്ന ഗ്രൂപ്പ് നിയന്ത്രിത വടംവലിക്കാണ് വി.ഡി. സതീശനിലൂടെ ഹൈക്കമാന്‍ഡ് അപ്രതീക്ഷിത സഡന്‍ബ്രേക്കിട്ടത്. 2004-ല്‍ എ.കെ. ആന്റണി രാജിവച്ച് ഉമ്മന്‍ ചാണ്ടി നിയമസഭാകക്ഷി നേതാവായി വരികയും ഒത്തുതീര്‍പ്പ് സ്ഥാനാര്‍ഥിയായി രമേശ് ചെന്നിത്തല വരികയും ചെയ്തതോടെയാണ് ഗ്രൂപ്പ് സമവാക്യങ്ങള്‍ മാറിയത്. അതുമുതല്‍ എ-ഐ ഗ്രൂപ്പുകള്‍ ഉമ്മന്‍ ചാണ്ടിക്കും രമേശ് ചെന്നിത്തലയ്ക്കും പിന്നിലായി.
1970കളില്‍ ആന്റണി, വയലാര്‍ രവി, ഉമ്മന്‍ ചാണ്ടി എന്നിങ്ങനെ അന്നത്തെ യുവനിര ഒന്നിച്ചുനിന്ന് തലമുറ മാറ്റത്തിനായി വാദിച്ചു. അന്നത്തെ മുതിര്‍ന്ന നേതാക്കളെ വെട്ടിമാറ്റി യുവത്വം കോണ്‍ഗ്രസിന്റെ നേതൃത്വം പിടിച്ചെടുക്കുകയും ചെയ്തു എന്നതാണ് ചരിത്രം. ഇതിന്റെ ആവര്‍ത്തമായിയാണ് ഇപ്പോഴത്തെ സംഭവങ്ങളെ രാഷ്ട്രീയ നിരീക്ഷകര്‍ കാണുന്നത്.
https://www.facebook.com/Malayalivartha
