ഓര്മ്മകള് ഉണ്ടാവണം… ഞങ്ങളുടെ മനസിലും ഉണ്ട് ആ മരിക്കാത്ത ഊഞ്ഞാല് ഓര്മ്മകള്
ഓണം അടുത്തതോടെ മലയാളികള് സൗകര്യ പൂര്വം ഓര്മ്മിക്കുന്ന ഒന്നാണ് ഊഞ്ഞാല്. ഓണം വരുന്നതിന്റെ മുന്നോടിയായി പണ്ട്കാലത്ത് ഒട്ടുമിക്ക വീടുകളിലും ഊഞ്ഞാല് കെട്ടുക പതിവായിരുന്നു. ഓണത്തിന് പത്ത് ദിവസം അവധി കിട്ടുന്ന കുട്ടികളെ സംബന്ധിച്ച് ഈ ഓണ നാളുകളില് ഏറ്റവും അധികം സമയം കളയുന്ന സ്ഥലങ്ങളില് ഒന്നായിരുന്നു ഈ ഊഞ്ഞാല്.
ഒന്ന് ഊഞ്ഞാലില് കയറിയിരുന്ന് ആടാനായി ഊഴവും കാത്ത് എത്ര നേരമാ കാത്തിരുന്നിട്ടുള്ളത്. ചിലപ്പോഴൊക്കെ അത് ചില്ലറ വഴക്കിലും കലാശിക്കും. എങ്കിലും അതെല്ലാം താല്ക്കാലികം. അടുത്ത ഘട്ടത്തില് ഊഞ്ഞാല് ആട്ടിക്കൊടുക്കുകയും ചെയ്യുംഊഞ്ഞാലാട്ടുന്നതിനോടൊപ്പം പലതരം പാട്ടുകളും പാടും. ചിലപ്പോള് അത് സിനിമാപ്പാട്ടും ആകാം. അടിപിടി ഉണ്ടാകാതിരിക്കാന് ഒരാള്ക്ക് ഇത്ര ആട്ടം എന്ന കണക്കേ എണ്ണി ഊഞ്ഞാലാടുകയും ചെയ്യും. എണ്ണത്തില് കള്ളം വന്നാല് കുശാല്. ചിലവിരുതന്മാരാകട്ടെ ഊഞ്ഞാലില് കയറിയാല് ഇറങ്ങത്തില്ല.
പലതരത്തിലാണ് ഊഞ്ഞാല് ആടുന്നത്. കാല് വച്ച് തൊന്നി ആടും. അതിനൊരു പ്രത്യേക സുഖമാണ്. ചെറിയൊരു മൂളിപ്പാട്ടും പാടി എന്തെങ്കിലും ആലോചിച്ചുള്ള ആടല് ഒരനുഭവം തന്നെയാണ്. ഊഞ്ഞാലാട്ടത്തില് ഏറ്റവും രസകരമാണ് കുടം ഇടുക. അതിപ്പോള് എത്രപേര്ക്ക് അറിയാം എന്നറിയില്ല. ആട്ടിക്കൊടുക്കുന്ന ആള് ശക്തിയായി ഊഞ്ഞാല് പിടിച്ച് ആട്ടി ഊഞ്ഞാലിനോടൊപ്പം പോയി, ഊഞ്ഞാല് പൊക്കമെത്തുമ്പോള് ഊഞ്ഞാലിന്റ അടിയിലൂടെ ഓടുന്നതാണ് കുടം ഇടുക എന്നത്. പിന്നെയുള്ളത് ഊഞ്ഞാലിന്റെ കയര് മൊത്തത്തില് കറക്കി വിടും. കാല് ഉയര്ത്തുമ്പോള് അത് തിരികെ കറങ്ങുന്നു. അത് ഒരു പ്രത്യേക സുഖമുള്ള അനുഭൂതിയാണ്. തല കറങ്ങിയില്ലെങ്കില് ഭാഗ്യം.
ഒരാള്ക്കിരിക്കാവുന്ന ഊഞ്ഞാല് മുതല് ഉലക്ക വച്ചുള്ള വലിയ ഊഞ്ഞാല് പോലുമുണ്ട്.
കാലം മാറിയതോടെ ഊഞ്ഞാല് കെട്ടാന് മരവും സ്ഥവും ഇല്ലാതെയായി. പലരും ഊഞ്ഞാല് കാര് ഷെഡിലോ വീട്ടിനകത്തോ കെട്ടി. ചകിരി കയറിന് പകരം പ്ലാസ്റ്റിക് കയറും ഉലക്കയ്ക്ക് പകരം വല്ല ചൂരല് കസേരയോ മറ്റോ ആക്കി.
ഇന്ന് സിറ്റിയില് ഊഞ്ഞാല് കാണണമെങ്കില് വല്ല പാര്ക്കിലോ കാമ്പസിലോ പോകണം. അവിടെ ഊഞ്ഞാല് ആടാന് കാണുന്ന ആവേശം മാത്രം മതി ആ നല്ല നാളുകളെ ഓര്ത്തെടുക്കാന്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha