2കോടി രൂപ പിഴയടച്ചോളാം,അവരിവിടെ വേണ്ട!
സ്വിറ്റ്സര്ലണ്ട്, ഗവണ്മെന്റ് 50,000 അഭയാര്ത്ഥികളെ അവരുടെ രാജ്യത്തു സ്വീകരിച്ചുകൊള്ളാം എന്ന് സമ്മതിച്ചതിനെ തുടര്ന്ന്, അവരുടെ രാജ്യത്തെ 26 പ്രവിശ്യകളിലെ ജനങ്ങളോട, കടന്നു വരുന്ന അഭയാര്ത്ഥികളെ അവരുടെ പ്രദേശത്ത് അധിവസിപ്പിക്കുന്നതിനെ കുറിച്ച് എന്താണഭിപ്രായമെന്ന് ചോദിച്ചു കൊണ്ടുള്ള ജനഹിത പരിശോധന നടത്താറുണ്ടായിരുന്നു.
ഇക്കഴിഞ്ഞ ദിവസമാണ് സ്വിറ്റ്സര്ലണ്ടിലെ ഏറ്റവും ധനിക ഗ്രാമമായ ഒബെര്വില്-ലിയെലി ഗ്രാമത്തില് ജനഹിത പരിശോധന നടത്തിയത്. 2200 പേര് മാത്രം താമസിക്കുന്ന ആ ഗ്രാമത്തിലുള്ളവരില് 300 പേര് ശതകോടീശ്വരന്മാരാണ്. അവരോടാണ് അവരുടെ പ്രദേശത്ത് 10 അഭയാര്ത്ഥികളെ കൊണ്ടു വന്ന് താമസിപ്പിക്കുന്നതിനെ കുറിച്ചുള്ള അഭിപ്രായം ചോദിച്ചത്.
48 ശതമാനം പേര് അതിന് അനുകൂലമായി വോട്ടു ചെയ്തപ്പോള് 52% പേര് അതിനോടു വിയോജിപ്പ് പ്രകടിപ്പിച്ചതിനാല് അവരുടെ ഗ്രാമത്തില് അഭയാര്ത്ഥികളെ അധിവസിപ്പിക്കാന് സര്ക്കാരിനു കഴിയില്ല. എന്നാല് ആ ഗ്രാമത്തിലുള്ളവര് 2 കോടി രൂപ സര്ക്കാരിനു പിഴയിനത്തില് കൊടുക്കേണ്ടതായി വരും. ഈ വിവരം ഗ്രാമവാസികള്ക്ക് മുന്കൂട്ടി അറിയാമായിരുന്നു. എന്നിട്ടും പിഴയടച്ചോളാം എന്നാലും നമ്മുടെ സ്ഥലത്ത് അന്യദേശക്കാരെ കൊണ്ടു വന്ന് താമസിപ്പിക്കാന് അനുവദിക്കില്ല എന്നു തന്നെയായിരുന്നു ഭൂരിപക്ഷാഭിപ്രായം.
ഒരു ജീവിതകാലം മുഴുവന് അത്യധ്വാനം ചെയ്തുണ്ടാക്കി വാങ്ങിയ വീടും സ്ഥലവുമൊക്കെയാണിത്. ഞങ്ങളുടെ സുന്ദരമായ ഈ ഗ്രാമത്തില് മറ്റാരും കടന്നു വന്ന് ഞങ്ങളുടെ സ്വസ്ഥത നഷ്ടപ്പെടുത്താന് അനുവദിക്കില്ല എന്നായിരുന്നു ഒരു ഗ്രാമവാസിയുടെ പക്ഷം.
എന്നാല് എല്ലാവര്ക്കും ആ അഭിപ്രായമല്ല ഉള്ളത്. നമ്മളേക്കാള് ഭാഗ്യം കുറഞ്ഞവരെ സഹായിക്കാന് അവസരം കിട്ടുമ്പോള് അത് പ്രയോജനപ്പെടുത്തണമെന്നാണ് മറ്റു ചിലരുടെ അഭിപ്രായം.
എന്നാല്, ഈ കൊണ്ടു വരുന്ന അഭയാര്ത്ഥികള് സിറിയയില് നിന്നുള്ളവരാണോ, അതോ സാമ്പത്തിക ശേഷി ഇല്ലാത്തവരാണോ എന്നിങ്ങനെയുള്ള ഒരു വിവരവും നമ്മെ അറിയിച്ചിരുന്നില്ലെന്നും, 10 അഭയാര്ത്ഥികള് എന്നു മാത്രമാണ് അറിയിച്ചതെന്നും അവിടത്തെ മേയര് ആന്ഡ്രിയാസ് ഗ്ലാര്നെര് പറഞ്ഞു.
അവര്ക്ക് എന്തു സാമ്പത്തിക സഹായം വേണമെങ്കിലും ചെയ്തു കൊടുക്കാന് ഇവിടെയുള്ളവര് ഒരുക്കമാണ്. എന്നാല് നമ്മുടെ ഗ്രാമത്തില് അവരെ ഒപ്പം പാര്പ്പിക്കുന്നതിനോട് യോജിക്കാനാവില്ലെന്നായിരുന്നു മേയറും അഭിപ്രായപ്പെട്ടത്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha