കഴിഞ്ഞ ദിവസം പ്രമുഖ നടിയെ തട്ടിക്കൊണ്ട് പോകുകയും കാറില്‍ വച്ച് പീഡിപ്പിക്കാന്‍ ശ്രമിക്കുകയും ചെയ്തത് ക്വട്ടേഷന്‍ സംഘമാണെന്ന തിരിച്ചറിവ് ഞെട്ടലോടെയാണ് മലയാളികള്‍ കേട്ടത്. സംഘാംഗളെല്ലാം അറിയപ്പെടുന്ന ക്വട്ടേഷനില്‍പ്പെട്ട ആള്‍ക്കാരാണ്. വടിവാള്‍ സലിം, കണ്ണൂര്‍ പ്രദീപ്, കൊരട്ടി മാര്‍ട്ടിന്‍, പള്‍സര്‍ സുനി തുടങ്ങിയ കൊടികെട്ടിയ ക്വട്ടേഷന്‍ സംഘമാണിവര്‍. ഇതില്‍ വടിവാള്‍ സലിം, കണ്ണൂര്‍ പ്രദീപ്, കൊരട്ടി മാര്‍ട്ടിന്‍ എന്നിവരെ പോലീസ് പിടികൂടിയിട്ടുണ്ട്. വിജീഷ്, മണികണ്ഠന്‍, പള്‍സര്‍ സുനി എന്നിവരേയാണ് ഇനി പിടികൂടാനുള്ളത്.

ഇവരെല്ലാം തമ്മനം ക്വട്ടേഷന്‍ സംഘത്തിന്റെ അംഗങ്ങളാണ്. സിനിമാക്കാര്‍ക്കും വലിയ ആള്‍ക്കാര്‍ക്കും വേണ്ടി ഗുണ്ടാ പണി ഏറ്റെടുക്കുന്ന സംഘമാണ് തമ്മനം സംഘം. ആലപ്പുഴ ക്വട്ടേഷന്‍ ഗ്രൂപ്പു വഴിയാണ് ഈ ക്വട്ടേഷന്‍ വന്നത്. ഒരു മാസം മുമ്പേയാണ് ഇവര്‍ ക്വട്ടേഷന്‍ ഏറ്റെടുത്തത്. മൂന്ന് ദിവസം മുമ്പ് കാറ്ററിംഗ് സര്‍വീസുകാരുടെ ടെമ്പോ ട്രാവലര്‍ വാടകയ്ക്ക് എടുത്ത് നടിയെ പിന്തുടര്‍ന്നു വന്നു. കഴിഞ്ഞ ദിവസമാണ് അവസരം ഒത്തുവന്നത്. 

അതേസമയം ഈ കേറ്ററിംഗ് വാഹനത്തില്‍ നിന്നും ഒരു സ്ത്രീയുടെ മുടി ഫോറന്‍സിക് വിഭാഗം കണ്ടെത്തിയിരുന്നു. നാലുചുറ്റും അടച്ചു മൂടിയ കാറ്ററിംഗ് വണ്ടിയില്‍ ഒരീച്ച പോലും കടക്കില്ല. ഇതും ദുരൂഹത വര്‍ധിപ്പിക്കുന്നു.

പള്‍സര്‍ സുനി മുകേഷിന്റെ ഡ്രൈവറായിരുന്നതായി മുകേഷ് തന്നെ വെളിപ്പെടുത്തി. സിനിമയിലും മറ്റ് പലതിനും പള്‍സര്‍ സുനി എക്ട്രാ നടിമാരെയും ജൂനിയര്‍ ആര്‍ട്ടിസ്റ്റുകളേയും സപ്ലൈ ചെയ്യാറുമുണ്ട്. ഡ്രൈവര്‍മാരുമായി നടിമാര്‍ക്ക് എപ്പോഴും ആത്മ ബന്ധമുണ്ടാകും. ഈ ബന്ധം പല ഡ്രൈവര്‍മാരും മുതലെടുക്കുകയും ചെയ്യും. 

ഈ നടിയുടെ അച്ഛന്റെ മരണം കാരണം വിവാഹം നീട്ടിവച്ചിരുന്നു. അച്ഛന്റെ വലിയൊരു സ്വപ്നമായിരുന്നു മകളുടെ വിവാഹം. ഇപ്പോള്‍ വിവാഹത്തിലേക്ക് തയ്യാറെടുത്തുകൊണ്ടിരുന്ന സമയത്താണ് ക്വട്ടേഷന്‍ സംഘത്തിന്റെ ആക്രമണമെന്നതാണ് ദുരൂഹത വര്‍ധിപ്പിക്കുന്നത്. 

പണം വാങ്ങി എതിരാളികളെ വകവരുത്തുകയോ ഭീഷണിപ്പെടുത്തുകയോ ചെയ്യുന്ന ആളുകളുടെ സംഘത്തെയാണ് ക്വട്ടേഷന്‍ സംഘം എന്ന് പറയുന്നത്. രാഷ്ട്രീയക്കാരും, വ്യാവസായികളും എന്തിന് വ്യക്തികള്‍ പോലും ക്വട്ടേഷന്‍ സംഘത്തെ ഉപയോഗപ്പെടുത്തുന്നുണ്ട്. നല്ല പ്രതിഫലവും ആഡംബര ജീവിതവും നയിക്കുന്ന സംഘങ്ങള്‍ക്ക് പോലീസും, രാഷ്ട്രീയ നേതാക്കളും തമ്മിലുള്ള അടുപ്പം പലപ്പോഴും വിവാദമായിട്ടുണ്ട്.

പെണ്‍കുട്ടികളെ അപമാനിക്കാനും ക്വട്ടേഷന്‍ സംഘത്തിനെ വിളിക്കുന്നു എന്ന ഞെട്ടലുളവാക്കുന്ന വാര്‍ത്തയാണിത്. പേരും പ്രശസ്തിയുമുള്ള നടിയായതു കൊണ്ടു മാത്രമാണ് ഈ വാര്‍ത്ത പുറം ലോകമറിഞ്ഞത്. അല്ലെങ്കില്‍ ആരാരുമറിയില്ലായിരുന്നു.