സൂപ്പര്‍ ഓവറിലേക്കു നീണ്ട മല്‍സരത്തില്‍ മുംബൈ ഇന്ത്യന്‍സിനെതിരെ ബാംഗ്ലൂര്‍ റോയല്‍ ചാലഞ്ചേഴ്‌സിന് ജയം.

ആദ്യം ബാറ്റ് ചെയ്ത ബാംഗ്ലൂര്‍ ആരോണ്‍ ഫിഞ്ച്, ദേവ്ദത്ത് പടിക്കല്‍, എബി ഡിവില്ലിയേഴ്‌സ് എന്നിവരുടെ അര്‍ധ സെഞ്ചുറികളുടെ മികവില്‍ 3 വിക്കറ്റ് നഷ്ടത്തില്‍ 201- റണ്‍സിലെത്തി. ദേവ്ദത്ത് പടിക്കല്‍ (40 പന്തില്‍ 54 5 ഫോര്‍, 2 സിക്‌സ്), ആരോണ്‍ ഫിഞ്ച് (35 പന്തില്‍ 52 7 ഫോര്‍, ഒരു സിക്‌സ്), എബി ഡിവില്ലിയേഴ്‌സ് (24 പന്തില്‍ 55 4 ഫോര്‍, 4 സിക്‌സ്) എന്നിവര്‍ അര്‍ധ സെഞ്ചുറി നേടി. അവസാനം ഇറങ്ങിയ ശിവം ദുബെയും (10 പന്തില്‍ 27 ഒരു ഫോര്‍, 3 സിക്‌സ്) മോശമാക്കിയില്ല. കോലി 11 പന്തില്‍ 3 റണ്‍സ് മാത്രമെടുത്തു പുറത്തായി.

ട്രെന്റ് ബോള്‍ട്ടിന്റെ 3-ാം ഓവറിലെ 4-ാം പന്ത് സിക്‌സിനു പറത്തിയ ഫിഞ്ച് പാറ്റിന്‍സന്റെ 5-ാം ഓവറില്‍ തുടരെ 3 ഫോറും നേടിയതോടെ ദേവ്ദത്ത് സ്‌ട്രൈക് റൊട്ടേറ്റ് ചെയ്ത് സപ്പോര്‍ട്ടിങ് റോളിലേക്ക് മാറി. ഇരുവരും പരസ്പര ധാരണയോടെ മുന്നേറിയപ്പോള്‍ ബാംഗ്ലൂരിന്റെ തുടക്കം അസ്സല്‍; ഓപ്പണിങ് വിക്കറ്റില്‍ 81 റണ്‍സ്. ഫിഞ്ച് പുറത്തായതിനു ശേഷം ക്രീസിലെത്തുമ്പോള്‍ കോലിക്കു സാഹചര്യങ്ങളെല്ലാം അനുകൂലമായിരുന്നു. എന്നാല്‍, രാഹുല്‍ ചാഹറിനെതിരെ പാടുപെട്ട കോലി ഒടുവില്‍ 13-ാം ഓവറില്‍ മുംബൈ സ്പിന്നര്‍ക്ക് വിക്കറ്റും സമ്മാനിച്ചു.

മറുപടിയില്‍ ഇഷന്‍ കിഷന്റെയും (58 പന്തുകളില്‍ 99) കീറോണ്‍ പൊള്ളാര്‍ഡിന്റെയും (24 പന്തുകളില്‍ 60) മാസ്മരിക ബാറ്റിങ്ങാണു മുംബൈയ്ക്കു ജീവന്‍ നല്‍കിയത്. മുംബൈ 5ന് 201-ല്‍ എത്തിയതോടെ മത്സരം ടൈ ആയി. പിന്നീടു സൂപ്പര്‍ ഓവര്‍. സൂപ്പര്‍ ഓവറില്‍ ആദ്യം ബാറ്റ് ചെയ്ത മുംബൈയ്ക്ക് 7 റണ്‍സെടുക്കാനേ കഴിഞ്ഞുള്ളൂ. കീറോണ്‍ പൊള്ളാര്‍ഡിന്റെ വിക്കറ്റെടുത്ത് നവ്ദീപ് സൈനി തിളങ്ങി. ബാംഗ്ലൂരിനായി ഇറങ്ങിയതു ക്യാപ്റ്റന്‍ വിരാട് കോലിയും എബി ഡിവില്ലിയേഴ്‌സും. ജസ്പ്രീത് ബുമ്രയുടെ ഓവറിലെ അവസാന പന്തില്‍ ഫോറടിച്ച് കോലി ബാംഗ്ലൂരിനു ജയം സമ്മാനിച്ചു.