അന്തർസംസ്ഥാന യാത്രയ്‌ക്കൊരുങ്ങി കെഎസ്ആർടിസി ബജറ്റ് ടൂറിസം സെൽ. സഞ്ചാരികളുടെ ഇഷ്ടയിടമായ ഗോവയിലേക്കുള്ള യാത്രയാണു പ്രധാനം. മൂന്നു രാത്രിയും രണ്ടു പകലുമായുള്ള യാത്രയാണ്. ഗോവയിലെ ബീച്ചുകളും ചരിത്രസ്മാരകങ്ങളും രാത്രിജീവിതവും ഗോവൻ ഭക്ഷണവും ആസ്വദിക്കാവുന്ന തരത്തിലാണ് യാത്രയുള്ളത്.

ബജറ്റ് ടൂറിസത്തിന്റെ ഭാഗമായി തമിഴ്‌നാട്ടിലേക്ക് നടത്തിയ പരീക്ഷണയാത്രകളുടെ വിജയത്തെ തുടർന്നാണ് കെഎസ്ആർടിസി ഗോവ ടൂർ പാക്കേജ് തുടങ്ങുന്നത്.

യുവാക്കളുടെ പ്രിയപ്പെട്ട വിനോദ സഞ്ചാര കേന്ദ്രമാണ് ഗോവ. അതുകൊണ്ടുതന്നെ ഈ പാക്കേജിന് മികച്ച പ്രതികരണം ലഭിക്കുമെന്നാണ് പ്രതീക്ഷ. ദൂരയാത്രകൾക്കായി ഉപയോഗിക്കുന്ന സൂപ്പർ ഡീലക്‌സ് ബസുകളാകും ഗോവയിലേക്കുള്ള യാത്രയ്ക്കും ഉപയോഗിക്കുക.

കാസർകോടു വരെ കെ.എസ്ആർടിസി. ബസിലും അവിടെ നിന്ന് ഗോവ വരെ സ്വകാര്യ ആഡംബര എസി ബസിലുമാകും യാത്ര. താമസത്തിനു മികച്ച ഹോട്ടലുകളാകും. കേരള ടൂറിസം ഡെവലപ്‌മെന്റ് കോപ്പറേറ്റീവ് സൊസൈറ്റി(കെടിഡിഎസ്.)യുമായി ചേർന്നാണു പദ്ധതി. യാത്രാനിരക്കു തീരുമാനിച്ചിട്ടില്ല. എല്ലാ ഡിപ്പോകളിൽ നിന്നും യാത്രയുണ്ടാകുന്നതാണ്.