ഹൈഡല് ടൂറിസം സെന്ററുകളില് ഏറ്റവും കൂടുതല് സഞ്ചാരികളെത്തുന്ന കേന്ദ്രം, ആനയിറങ്കല് ജലാശയം
തേയിലത്തോട്ടങ്ങള് നിറഞ്ഞ മലനിരകള്ക്ക് മധ്യത്തില് നീലാകാശത്തിന്റെ പ്രതിബിംബമെന്നോണം നിറഞ്ഞുകിടക്കുന്ന ആനയിറങ്കല് ജലാശയം മനോഹരകാഴ്ച്ചകളുടെ പറുദീസയാണ്. മൂന്നാറില് നിന്നു തേക്കടിയിലേക്കു പോകുമ്പോള് പൂപ്പാറയ്ക്കു സമീപമാണ് ദൈവത്തിന്റെ കയ്യൊപ്പ് പതിഞ്ഞ ഈ മനോഹര ദേശം. അനന്തമായ വിനോദസഞ്ചാര സാധ്യതകള് തിരിച്ചറിഞ്ഞാണ് കേരള ഹൈഡല് ടൂറിസം സെന്റര് ആനയിറങ്കലില് ബോട്ടിങ് ഏര്പ്പെടുത്തിയത്.
ആനയിറങ്കല് ടൂറിസം പദ്ധതി വന്വിജയമായതിന്റെ പ്രധാന കാരണം ഇവിടത്തെ ബോട്ട് യാത്രയാണ്. പച്ചപരവതാനി വിരിച്ചപോലത്തെ വൃഷ്ടിപ്രദേശങ്ങളും മലയിറങ്ങിയെത്തുന്ന വന്യമൃഗങ്ങളും ബോട്ട് യാത്രയിലെ അമൂല്യകാഴ്ചകളാണ്.
മൂന്നാറില് നിന്ന് 26 കിലോമീറ്റര് അകലെയാണ് ആനയിറങ്കല്. സാഹസികരായ സഞ്ചാരികള്ക്കായി പൊളാരിയസ് വാഹന റൈഡും ഒരുക്കിയിട്ടുണ്ട്. സഞ്ചാരികള്ക്ക് മെച്ചപ്പെട്ട താമസസൗകര്യം വാഗ്ദാനം ചെയ്യുന്ന അനവധി സ്വകാര്യ റിസോര്ട്ടുകള് പൂപ്പാറ, ശാന്തന്പാറ എന്നിവിടങ്ങളിലുണ്ട്.
ശക്തമായ മഴയില് ആനയിറങ്കല് ജലാശയത്തില് ജലനിരപ്പുയര്ന്ന് ബോട്ടിംഗ് പുനരാരംഭിച്ചതോടെ ഇവിടേക്ക് സഞ്ചാരികളുടെ കടന്നുവരവും വര്ധിച്ചു. പച്ചവിരിച്ച തേയിലക്കാടുകള്ക്കും മൊട്ടക്കുന്നുകള്ക്കും ഇടയില് സ്ഥിതിചെയ്യുന്ന ജലാശയത്തിലൂടെയുള്ള ബോട്ടു യാത്രയില് കാഴ്ചയ്ക്ക് വിരുന്നൊരുക്കി കാട്ടാനക്കൂട്ടം പ്രത്യക്ഷപ്പെടുന്നതും സഞ്ചാരികളെ ഇവിടേക്ക് ആകര്ഷിക്കുന്ന ഒരു പ്രധാന കാരണമാണ്.
ജില്ലയിലെ ഹൈഡല് ടൂറിസം സെന്ററുകളില് ഏറ്റവും കൂടുതല് സഞ്ചാരികളെത്തുന്ന കേന്ദ്രമാണ് മൂന്നാര് കുമളി റൂട്ടില് ദേശീയപാതയോരത്ത് സ്ഥിതിചെയ്യുന്ന ആനയിറങ്കല് ഹൈഡല് ടൂറിസം സെന്റര്. ഇത്തവണത്തെ കടുത്ത വരള്ച്ചയില് ജലാശയത്തിലെ ജലനിരപ്പ് ഗണ്യമായി താഴ്ന്നതോടെ ഇവിടുത്തെ ബോട്ട് സര്വ്വീസ് നിര്ത്തിവച്ചിരുന്നു. ഇതോടെ ഇവിടേക്കുള്ള സഞ്ചാരികളുടെ വരവും നിലച്ചു.
എന്നാല് കഴിഞ്ഞദിവസങ്ങളില് ശക്തമായി പെയ്യുന്ന മഴയില് അണക്കെട്ടില് ജലനിരപ്പ് ഉയര്ന്നതോടെ ഹൈഡല് ടൂറിസം ഡിപ്പാര്ട്ട്മെന്റ് വീണ്ടും ഇവിടെ ബോട്ടിംഗ് ആരംഭിച്ചു. ഇതോടെ അവധിദിവസങ്ങളിലടക്കം നൂറുകണക്കിന് സഞ്ചാരികളാണ് ഇവിടെയെത്തുന്നത്.
നിലവില് രണ്ട് സ്പീഡ് ബോട്ടുകളും ഒരു ഹൗസ് ബോട്ടും രണ്ട് കുട്ടവഞ്ചികളും രണ്ട് കയാക്കിംഗ് ബോട്ടുകളുമാണ് ഇവിടെയുള്ളത്. സഞ്ചാരികളുടെ തിരക്കേറിയതോടെ മണിക്കൂറുകള് കാത്തുനിന്നാണ് സഞ്ചാരികള് ജലയാത്ര നടത്തുന്നത്. മറ്റ് ഹൈഡല് ടൂറിസം സെന്ററുകളെ അപേക്ഷിച്ച് കൂടുതല് ദൂരത്തില് ജലയാത്ര നടത്താമെന്നതാണ് ഇവിടുത്തെ പ്രത്യേകത.
https://www.facebook.com/Malayalivartha