കാനഡയില് ജൂണില് ജി-7 മീറ്റിംഗ് നടക്കാനിരിക്കവേ, ടൊറന്റോയില് കാല് നടയാത്രക്കാര്ക്കിടയിലേക്ക് വാന് ഇടിച്ചു കയറ്റി 10 മരണം, 15 പേര്ക്ക് പരിക്ക്, ഡൈവര് അറസ്റ്റില്
ടൊറന്റോയിലെ യംഗ് സ്ട്രീറ്റില് കാല് നടയാത്രക്കാര്ക്കിടയിലേക്ക് വാന് ഓടിച്ചു കയറ്റി 10 പേരെ കൊലപ്പെടുത്തുകയും 15 പേര്ക്ക് പരിക്കേല്ക്കുകയും ചെയ്ത സംഭവത്തില് 25-കാരനായ അലെക് മിനസിയാനെ പോലീസ് അറസ്റ്റു ചെയ്തു.
മനപൂര്വ്വമായി അയാള് ആളുകള്ക്കു നേരെ വാനിടിച്ചു കയറ്റുകയാണെന്ന് തോന്നും വിധമായിരുന്നു അയാള് പെരുമാറിയത് എന്ന് അത് കണ്ടു നിന്നവരിലൊരാള് പിന്നീട് പറഞ്ഞു. ഇങ്ങനെ ചെയ്യാന് എന്താണ് പ്രകോപനമായത് എന്ന് അന്വേഷിച്ചു കൊണ്ടിരിക്കുകയാണെന്ന് പോലീസ് പറഞ്ഞു. അറസ്റ്റിലായ പ്രതി മറ്റു കേസുകളില് പെട്ട് മുമ്പ് പോലീസ് പിടിയിലായിട്ടുള്ള ആള് അല്ല എന്ന് പോലീസ് അറിയിച്ചു.
സെനേകാ കോളേജിലെ പൂര്വ്വ വിദ്യാര്ത്ഥിയായ പ്രതിയുടെ മനോനില പണ്ടു മുതലേ സ്ഥിരതയില്ലാത്തതായിരുന്നുവെന്നാണ് മുന് സഹപാഠികള് പറയുന്നത്.തനിക്ക് പരിചയമുണ്ടായിരുന്ന കാലത്ത് മിനസിയാന് ഡ്രൈവിംഗ് ചെയ്യാന് അറിയില്ലായിരുന്നുവെന്ന് മറ്റൊരു ക്ലാസ്മേറ്റ് പറഞ്ഞു.
ജി7 രാജ്യങ്ങളിലെ കാബിനറ്റ് മന്ത്രിമാര് വിവിധ അന്താരാഷ്ട്ര വിഷയങ്ങളെ കുറിച്ച് കൂടിയാലോചന നടത്തുന്നതിനായി കാനഡയില് ഒത്തു കൂടിയിരിക്കവേ നടന്ന ഈ സംഭവം അന്തര്ദ്ദേശീയ തീവ്രവാദവുമായി ബന്ധപ്പെട്ടുള്ളതാണെന്നു കരുതുന്നുണ്ടോ എന്ന ചോദ്യത്തിന് വിശദമായ അന്വേഷണത്തിനൊടുവിലെ അതൊക്കെ വ്യക്തമാകൂ എന്നായിരുന്നു പോലീസ് ഉദ്യോഗസ്ഥന്റെ മറുപടി.
പോലീസ് ഇപ്പോള് പുറത്തു വിട്ടിരിക്കുന്ന വീഡിയോ ദൃശ്യങ്ങളില്, തിങ്കളാഴ്ച ഉച്ച കഴിഞ്ഞ നേരത്ത് വെളുത്ത വാനില് നിന്നും പുറത്തിറങ്ങി നിന്നു കൊണ്ട് പോലീസിനു നേരെ ഗണ് പോലെ ഒരു വസ്തു ചൂണ്ടി കൊണ്ട് ആക്രോശിക്കുന്ന ആളെയാണ് കാണുന്നത്. നിലത്ത് കിടക്കൂ അല്ലെങ്കില് ഞാന് വെടിവയ്ക്കും എന്ന് പോലീസുദ്യോഗസ്ഥന് പ്രതിയോട് പറയുന്നതും കാണാം. അല്പനേരത്തിനു ശേഷം റോഡില് കമിഴ്ന്നു കിടക്കുന്ന അയാളെ പോലീസ് കൈയ്യാമം വയ്ക്കുന്നതും കാഴ്ചക്കാരിലൊരാള് പകര്ത്തിയ ദൃശ്യങ്ങളില് കാണുന്നുണ്ട്.എന്നാല് പ്രതിയുടെ കൈവശം ഗണ് ഉണ്ടായിരുന്നില്ലെന്ന് പിന്നീട് പോലീസ് കേന്ദ്രങ്ങള് വെളിപ്പെടുത്തി.
അലി ഷകേര് എന്ന മറ്റൊരു ഡ്രൈവര് ഈ വാനിനോടൊപ്പം ആ സമയത്ത് റോഡിലുണ്ടായിരുന്നു. പ്രതി മനപൂര്വ്വം ആളുകളുടെ ഇടയിലേക്ക് വാന് ഓടിച്ചു കൊണ്ടേയിരുന്നതാണെന്ന് മനസിലാക്കാനാവുമായിരുന്നു എന്നും അത് അപകടമായിരുന്നെങ്കില് വാന് നില്ക്കുമായിരുന്നുവെന്നും അയാള് പറഞ്ഞു. കാല് നടക്കാര്ക്കുള്ള പാതയിലേക്ക് കയറി അവന് ഓടിച്ചു കൊണ്ടേയിരുന്നതാണെന്നും വാന് നിര്ത്തണമെന്നായിരുന്നെങ്കില് അവനു കഴിയുമായിരുന്നുവെന്നും അയാള് പോലീസിനോട് പറഞ്ഞു.
ഈ അതീവ ദുഖകരമായ സാഹചര്യത്തെ ധീരതയോടെയും പ്രൊഫഷണലിസത്തോടെയും നേരിട്ട പോലീസുദ്യോഗസ്ഥര്ക്കും ടൊറന്റോയിലെ ജനങ്ങള്ക്കും നന്ദി പറഞ്ഞു കൊണ്ട് കനേഡിയന് പ്രധാനമന്ത്രി ജസ്റ്റിന് ട്രൂഡോ പ്രസ്താവനയിറക്കി. സാഹചര്യത്തെ ശ്രദ്ധയോടെ നിരീക്ഷിക്കുകയാണെന്നും കാനഡാ പൗരന്മാരുടെ സുരക്ഷ ഉറപ്പു വരുത്തുന്നതിനുള്ളതെല്ലാം ചെയ്യുമെന്നും അദ്ദേഹം പറഞ്ഞു.
https://www.facebook.com/Malayalivartha