ജസ്‌നയുടെ തിരോധാനത്തില്‍ നിര്‍ണായക വിവരങ്ങള്‍ സംഘത്തിന് ലഭിച്ചതായി സൂചന. 10 ദിവസത്തിനകം നിര്‍ണായക വിവരങ്ങള്‍ പുറത്തുവരുമെന്നാണ് അന്വേഷണ സംഘം വെളിപ്പെടുത്തുന്നത്. ജസ്‌ന രണ്ട് മൊബൈല്‍ ഫോണ്‍ ഉപയോഗിച്ചിരുന്നതായി പൊലീസിനു വിവരം ലഭിച്ചു. രണ്ടാമത്തെ ഫോണിലെ കോള്‍ രേഖകള്‍ കണ്ടെത്താനുള്ള ശ്രമം ഊര്‍ജിതമായാണ് നടക്കുന്നത്. രണ്ടാമത്തെ ഫോണ്‍ രേഖകള്‍ക്കായി സൈബര്‍ സെല്ലിന്റെ സഹായത്തോടെ അന്വേഷണം നടത്തുകയാണിപ്പോള്‍ അന്വേഷണ സംഘം. 

10 ദിവസത്തിനകം വ്യക്തമായ വിവരങ്ങള്‍ ലഭിക്കുമെന്നാണ് അന്വേഷണ സംഘത്തിന്റെ വിശ്വാസം. രണ്ടാമതൊരു ഫോണ്‍ ജസ്‌നക്കുണ്ടായിരുന്നു എന്ന വിവരമല്ലാതെ ഇതിന്റെ നമ്പര്‍ പൊലീസിന് ഇന്നുവരെ ലഭിച്ചിട്ടില്ല. ജസ്‌ന ഉപയോഗിച്ചിരുന്ന ഫോണിലെ സന്ദേശങ്ങളില്‍നിന്നാണ് രണ്ടാമത് ഒരു ഫോണ്‍കൂടി ഉണ്ടാകുമെന്ന സൂചന പൊലീസിന് ലഭിച്ചിരിക്കുന്നത്.

ഇതിന്റെ നമ്പര്‍ കണ്ടെത്താനുള്ള ശ്രമമാണ് ഇപ്പോള്‍ നടക്കുന്നത്. നമ്പര്‍ ലഭിച്ചാല്‍ അതിലെ കോള്‍ വിവരങ്ങളില്‍നിന്ന് ജസ്‌ന ജീവിച്ചിരിപ്പുണ്ടോ, ആരുടെയെങ്കിലും പ്രേരണയാലാണോ വീടുവിട്ടിറങ്ങിയത് എന്നീ കാര്യങ്ങളില്‍ വ്യക്തത വരും. വീട്ടുകാരും സഹപാഠികളും പറയുന്നത് ജസ്‌നക്ക് ഒരു ഫോണ്‍ മാത്രമേ ഉണ്ടായിരുന്നുള്ളൂ എന്നാണ്. അതും കീപാഡോടു കൂടിയ സാദാഫോണാണ്. ഇതില്‍നിന്നാണ് സഹപാഠിയായ യുവാവിന് അടക്കം മെസേജ് അയച്ചിരുന്നതും കോളുകള്‍ ചെയ്തിരുന്നതും.