രസീല രാജു കൊല്ലപ്പെട്ട കേസില്‍ കുറ്റപത്രം സമര്‍പ്പിച്ചു
ഇന്‍ഫോസിസ് പൂണെ ക്യാമ്പസിലെ ജീവനക്കാരി രസീല രാജു കൊല്ലപ്പെട്ട കേസില്‍ പോലീസ് കുറ്റപ്പത്രം സമര്‍പ്പിച്ചു. പൂണെ ഫസ്റ്റ് ക്ലാസ് ജുഡീഷ്യല്‍ മജിസ്‌ട്രേറ്റ് കോടതിയിലാണ് പോലീസ് കുറ്റപ്പത്രം സമര്‍പ്പിച്ചത്. കോഴിക്കോട് കുന്ദമംഗലം സ്വദേശിനിയായ രസീല രാജുവിനെ സുരക്ഷ ജീവനക്കാരനായ ബബന്‍ സൈകിയ കഴുത്ത് ഞെരിച്ചു കൊലപ്പെടുത്തിയെന്നാണ് കുറ്റപത്രത്തിലുള്ളത്.
കമ്പ്യൂട്ടര്‍ കേബിള്‍ കഴുത്തില്‍ ചുറ്റിയാണ് കൊലപ്പെടുത്തിയത്. കഴിഞ്ഞ ജനുവരി 30 നായിരുന്നു കേസിനാസ്പദമായ സംഭവം. രാത്രി ജോലി ചെയ്യുന്ന ഓഫീസ് കെട്ടിടത്തില്‍ ഒറ്റയ്ക്കായിരുന്ന രസീലയെ സുരക്ഷാ ജീവനക്കാരന്‍ മോശപ്പെട്ട രീതിയില്‍ നോക്കിയതാണ് പ്രശ്‌നത്തിന് തുടക്കം.
ബബന്‍ സൈകിയെക്കുറിച്ച് മേലുദ്യോഗസ്ഥരോട് പരാതിപ്പെടും എന്നു രസീല പറയുകയും തന്റെ ജോലി നഷ്ടപ്പെടും എന്ന് ഭയപ്പെട്ട് ബബന്‍ രസീലയെ കൊലപ്പെടുത്തുകയുമായിരുന്നു. മരിച്ചുവെന്ന് ഉറപ്പാക്കാനായി രസീലയുടെ മുഖം ചവിട്ടി വികൃതമാക്കിയെന്നും ബബന്‍ പോലീസിനോട് പറഞ്ഞിട്ടുണ്ട്.
കൊലപെടുത്തിയ ശേഷം രസീലയുടെ ഐഡി കാര്‍ഡ് ഉപയോഗിച്ചാണ് ഇയാള്‍ ഓഫീസില്‍ നിന്നും പുറത്തുകടന്നത്. ഓഫീസിലെ സിസിടിവി ദൃശ്യങ്ങളില്‍ നിന്നാണ് കൊല നടത്തിയത് ബബന്‍ സൈകിയയാണെന്ന് തെളിഞ്ഞത്. അതേസമയം പ്രതിയുടെ ജാമ്യാപേക്ഷയിന്മേല്‍ കോടതി ഉടന്‍ വാദം കേള്‍ക്കും. അഡ്വ. ബിഎ ആളുരാണ് പ്രതിക്കുവേണ്ടി കോടതിയില്‍ ഹാജരാകുന്നത്.
https://www.facebook.com/Malayalivartha
