വിവാഹ ആഘോഷങ്ങള് അതിരുവിട്ടതോടെ വധൂഗൃഹത്തില് കൂട്ടത്തല്ല്; വരന്റെ സുഹൃത്തുക്കള്ക്കെതിരെ കേസെടുത്തു
എടപ്പാളിലെ ഒരു വിവാഹ വീട്ടില് കഴിഞ്ഞ ദിവസമായിരുന്നു കേസിനാസ്പദമായ സംഭവം. മലപ്പുറം എടപ്പാള് കണ്ടനകത്ത് പ്രദേശത്തെ യുവാവും യുവതിയും തമ്മിലുള്ള വിവാഹ വേദിയിലാണ് പ്രശ്നങ്ങള് ആരംഭിച്ചത്. വിവാഹ സംഘം പുറപ്പെട്ടപ്പോള് മുതല് വരന്റെ സുഹൃത്തുക്കളുടെ സംഘം ഇവരെ ബൈക്കില് പിന്തുടരുകായായിരുന്നു. മദ്യലഹരിയിലായിരുന്നു ഇവരെന്നു ബന്ധുക്കള് പറഞ്ഞു. തുടര്ന്നു ബൈക്കിലെത്തിയ സംഘം വധുവിന്റെ ബന്ധുക്കള് അടക്കമുള്ളവരോടു കയര്ക്കുകയും തര്ക്കിക്കുകയും ചെയ്തിരുന്നു.
ഇവര് വധുവിനെയും വരനെയും അശ്ലീലം കലര്ന്ന വാക്കുകളിലൂടെ അപമാനിച്ചതോടെയാണ് പ്രശ്നങ്ങള് ആരംഭിച്ചത്. ഇവര്ക്കൊപ്പമുണ്ടായിരുന്ന ഒരു വിഭാഗം സ്ത്രീകള് ഇതിനെ ചോദ്യം ചെയ്തു. ഇതോടെ സുഹൃത്തുക്കളുടെ പരാക്രമം ഇവരോടായി. ഇതിനെച്ചൊല്ലി ഇരുകൂട്ടരും തമ്മില് വാക്കേറ്റവും തര്ക്കവുമുണ്ടായി.
ചില പുരുഷന്മാര് സംഭവം ചോദ്യം ചെയ്ത് രംഗത്ത് എത്തിയതോടെയാണ് തര്ക്കം വീണ്ടും ഗുരുതരമായത്. തുടര്ന്നു തര്ക്കം സംഘര്ഷത്തിലേയ്ക്കു കടന്നതോടെ വധുവും സംഭവംകണ്ടു നിന്ന വളാഞ്ചേരി കുന്നത് സ്വദേശിയും വധുവിന്റെ മാതൃസഹോദരിയുമായ അമിനക്കുട്ടി, കുന്നത്ത് ബീയ്യാത്തുട്ടി, ഒന്പതുകാരി ഫാത്തിമ ശബാന, ആമിനക്കുട്ടിയുടെ മകന് ഷബീബ്, ബന്ധു ശിബിലാല് എന്നിവര് പരുക്കേറ്റു.
സ്ത്രീകള് അടക്കമുള്ളവര് സംഘര്ഷം കണ്ട് ബോധരഹിതരായി വീണതോടെ തടിച്ചു കൂടിയ നാട്ടുകാര് യുവാക്കള്ക്കു നേരെ തിരിഞ്ഞു. സംഭവം പന്തിയല്ലെന്നു കണ്ട യുവാക്കളുടെ സംഘം ഉടന് തന്നെ ബൈക്കില് ഇവിടെ നിന്നു രക്ഷപെട്ടു. സംഭവത്തില് വധുവിന്റെ ബന്ധുക്കളുടെ പരാതിയില് വരന്റെ സുഹൃത്തുക്കളായ യുവാക്കള്ക്കെതിരെ പൊലീസ് കേസ് രജിസ്റ്റര് ചെയ്തിട്ടുണ്ട്.
https://www.facebook.com/Malayalivartha