നമ്മുടെ സ്വഭാവം, ഘടന എന്തിനു നമ്മുടെ ജീവന്റെ അല്ലെങ്കിൽ നിലനിൽപ്പിന്റെ തന്നെ അടിസ്ഥാനം ജീനുകളാണ് എന്ന് നമുക്കറിയാം. കാരണം ജനിതകഘടന അഥവാ ഡിഎൻഎയിലെ ആയിരക്കണക്കിനു ജീനുകളുടെ പ്രവർത്തനമാണ് നമ്മെ നിയന്ത്രിക്കുന്നത്. ഒരാളെ ആരോഗ്യവാക്കാനും രോഗിയാക്കുവാനുമെല്ലാം കഴിവുള്ളവയാണ് ജീനുകൾ. പാരമ്പര്യ വാഹകരാണ് ജീനുകൾ. ഡിഎൻഎ യിൽ വരുന്ന മാറ്റങ്ങളാണു കാൻസർ ഉൾപ്പെടെ പല അസുഖങ്ങൾക്കും കാരണമാകുന്നത്.

ജീനുകളിൽ ചിലത് അമിതമായി പ്രവർത്തിക്കുന്നവയായിരിക്കും മറ്റു ചിലത് മൃത കോശങ്ങൾ ആയിരിക്കും എന്നാൽ ചിലത് വൈകല്യങ്ങൾ സൃഷ്ടിക്കുന്നവ ആയിരിക്കും. ഇവയെ കണ്ടെത്തി നിയന്ത്രിക്കാനായാൽ നമ്മുടെ ആരോഗ്യ പ്രശ്നങ്ങൾക്ക് പരിഹാരമാകും. പക്ഷേ, ജനിതകഘടനയിൽനിന്നു കൃത്യമായി ഒരു ജീനിനെ പിടികൂടുകയെന്നതു വളരെ ദുഷ്കരമായ ദൗത്യമാണ്. എന്നാൽ മോളിക്യുലർ ഗവേഷണം ഇത് സാധ്യമാക്കുന്നുണ്ട്.

‘ക്രിസ്പർ’ (CRISPR– Clustered Regularly Inter spaced Short Palindromic Repeats) എന്ന പുതിയ ജീനോമിക്സ് സാങ്കേതികവിദ്യയിലൂടെ ജീനുകളെ കൃത്യമായി വിലയിരുത്താനും നിയന്ത്രിക്കാനും കഴിയും.

എന്താണ് ക്രിസ്പർ ടെക്നോളജി ?‌

പേരുപോലെതന്നെ ക്രിസ്പിയാണീ സാങ്കേതിക വിദ്യയും. ബാക്ടീരിയകൾക്കു വൈറസ് ബാധയേൽക്കുമ്പോൾ അവയെ പ്രതിരോധിക്കാൻ ഉപയോഗിക്കുന്ന വിദ്യയെ ചെറിയ മാറ്റങ്ങളോടെ ആവിഷ്കരിക്കുന്ന രീതിയാണ് ക്രിസ്‌പർ. ഈ സാങ്കേതികവിദ്യയുടെ മുഴുവൻ പേര് CRISPR cas9 എന്നാണ്. കാസ്-9 (Cas9) എന്ന എൻസൈം കൃത്യതയോടെ ഡിഎൻഎയെ മുറിച്ചു മാറ്റാൻ കഴിവുള്ളവയാണ്. ഏത് ജീൻ ആണോ നമ്മൾ വേർപെടുത്താൻ ഉദ്ദേശിക്കുന്നത് ആ ഭാഗത്തിന്റെ പകർപ്പ് (ആർഎൻഎ) കൂടെ ചേർത്താൽ മാത്രം മതി. കൃത്യതയോടെ നിർവഹിക്കും. ബീറ്റതലാസ്സീമിയപോലുള്ള പല പാരമ്പര്യരോഗങ്ങളും ഭ്രൂണാവസ്ഥയില്‍തന്നെ കൃത്യമായി എഡിറ്റിങ് നടത്തി അവയിലെ തകരാറുകള്‍ പരിഹരിക്കാന്‍ കഴിയുമെന്നാണ് ഗവേഷകര്‍ അവകാശപ്പെടുന്നത്.

വന്‍ സാധ്യതകള്‍ക്കൊപ്പം വിവാദങ്ങള്‍ക്കും വഴിയൊരുക്കുന്ന ഈ പരീക്ഷണം നടത്തിയത് പോര്‍ട്ട്ലാന്‍ഡിലെ ഓറിഗണ്‍ ഹെല്‍ത്ത് ആന്‍ഡ് സയന്‍സ് യൂണിവേഴ്സിറ്റിയില്‍ ഷൂഖ്റത് മിതാലിപോവിന്റെ നേതൃത്വത്തിലുള്ള ഗവേഷകരാണ്. എന്നാൽ ഈ സാങ്കേതികവിദ്യ ദുരുപയോഗം ചെയ്യപ്പെടാനുള്ള സാധ്യതയേറെയാണ്. അതിനാൽ ഇത്തരം പരീക്ഷണങ്ങൾ പല രാജ്യങ്ങളിലും നിരോധിച്ചിട്ടുണ്ട്. ഈ സാങ്കേതിക വിദ്യ വിജയകരമായി നടപ്പാക്കാനായാൽ ആരോഗ്യമേഖലയിൽ ഇതൊരു വൻ വിപ്ലവം തന്നെ സൃഷ്ടിച്ചേക്കാം.