മലയാളത്തിന്റെ മെഗാ സ്റ്റാർ മമ്മൂട്ടിയെ പറ്റി ഒരുപാട് പേര് ജാഡയാണെന്നും മറ്റും പറഞ്ഞിട്ടുണ്ട്. എന്നാൽ; അത് തിരുത്തി തന്റെ അനുഭവകഥയുമായി മുന്നോട്ട് വരുന്നവരും നിരവധിയാണ്. ഇപ്പോഴിതാ തന്റെ അനുഭവം തുറന്നു പറഞ്ഞിരിക്കുകയാണ് നടി പൗളി വില്‍സണ്‍.

അണ്ണന്‍ തമ്ബി എന്ന മമ്മൂട്ടി ചിത്രത്തിലൂടെ മലയാള സിനിമയിലേക്ക് എത്തിയ നടിയാണ് പൗളി വില്‍സണ്‍. പതിറ്റാണ്ടുകള്‍ നീണ്ട നാടകാഭിനയതിലൂടെയാണ് സിനിമയിലേക്ക് കടന്നു വന്നത്. ആദ്യകാലങ്ങളിലെ ചെറിയ വേഷങ്ങളില്‍ തുടങ്ങി പിന്നീട് മംഗ്ളീഷ്, ലീല, ഗപ്പി എന്നീ സിനിമകളിൽ ശ്രദ്ദേയമായ വേഷം ചെയ്തു. ഈ മ യൗവിലൂടെ സംസ്ഥാന പുരസ്‌കാരവും താരം നേടി.

ഇപ്പോഴിതാ മെഗാ സ്റ്റാര്‍ മമ്മൂട്ടിയെ കുറിച്ചുള്ള പൗളിയുടെ വാക്കുകള്‍ ശ്രദ്ദേയമാകുകയാണ്. പൗളിയുടെ വാക്കുകൾ ഇങ്ങനെ...

'എല്ലാവരും പറയും മമ്മൂക്ക ഭയങ്കര ഭീകരനാണെന്ന്. എനിക്കങ്ങനെ തോന്നിയിട്ടില്ല. ഒരുപരിചയവും ഇല്ലത്തവരോട് ആരും എന്താണെന്ന് ചോദിക്കില്ലല്ലോ? അതാണ് ആളുകള്‍ ഉദ്ദേശിക്കുന്നത്. പരിചയമുള്ളവരോടൊക്കെ മമ്മൂക്ക വളരെ ഫ്രീയാണ്. എല്ലാവരോടും നല്ല കമ്ബിനിയുള്ള ആളുതന്നെയാണ്. പിന്നെ അവരുടെ പൊസിഷന്‍ അനുസരിച്ച്‌ കുറച്ചൊക്കെ അങ്ങനെ തന്നെ നില്‍ക്കണം. ആരെയും കുറ്റം പറഞ്ഞിട്ട് കാര്യമില്ല.

ഇടയ്‌ക്ക് ഒരു സംഭവമുണ്ടായത്; വൈപ്പിനില്‍ വന്നപ്പോള്‍ മമ്മൂക്ക കാറിന്റെ ഡോര്‍ തുറന്നില്ലെന്ന് പറഞ്ഞ് ചിലര്‍ ഒരുപാട് ഒച്ചപ്പാടുണ്ടാക്കി. ജംഗാറില്‍ കയറാന്‍ വന്ന സമയത്ത് മമ്മൂക്ക കാറിന്റെ ചില്ല് തുറന്നില്ല. ഒടുവില്‍ തുറക്കെടോ എന്നുവരെയായി. ചില്ലു തുറന്നിരുന്നെങ്കിലോ? കൈയിട്ട് മമ്മൂക്കയെ പിടിച്ചേനെ. അതൊക്കെ ഒരു അസ്വസ്ഥതയല്ലേ? അതുകൊണ്ടുതന്നെയാണ് അവര്‍ ഇത്തരത്തില്‍ പെരുമാറുന്നത്. അല്ലാതെ ഏതു കൊച്ചുകുട്ടിയുടെ അടുത്തും കൂടാന്‍ പറ്റിയ സ്വഭാവമാണ് മമ്മൂക്കയുടേത്. ഉള്ളില്‍ ഒരുവെറുപ്പും ആരോടുമില്ല. എല്ലാവരോടും സ്‌നേഹത്തോട് തന്നെയാണ് അദ്ദേഹം പെരുമാറുന്നത്' എന്നും പൗളി വ്യക്തമാക്കി.