മിനിസ്‌ക്രീനിലൂടെ അഭിനയ രംഗത്തേക്ക് എത്തിയ മോളി കണ്ണമാലി ഏവർക്കും സുപരിചിതമായാത്ത ചാള മേരി എന്ന കഥാപാത്രത്തിലൂടെയാണ്. നിരവധി സീരിയലുകളിലും സിനിമകളിലും പ്രേക്ഷകരുടെ പ്രീതി നേടിയ കോമഡി കഥാപാത്രങ്ങളെ അവതരിപ്പിച്ച കലാകാരിയെ പ്രേക്ഷകർ ഇരുകൈ നീട്ടിയാണ് സ്വീകരിച്ചത്.

അഭിനയത്തിലെ വ്യത്യസ്തയും സംഭാഷണ ശൈലിയും തന്റേതായ അഭിനയ പാടവും കൈമുതലാക്കിയ കലാകാരിയെ മലയാളികൾക്ക് ഇഷ്ടമാണ്.

ബി​ഗ്സ്ക്രീനിലും മിനി സ്ക്രീനിലും പ്രേഷകരെ ചിരിപ്പിച്ച താരത്തിന്റെ യാഥർഥ ജീവിതം കയ്പു നിറഞ്ഞതാണ്. തന്റെ രോ​ഗവും അതിനെ തുടർന്നുണ്ടായ കടബാധ്യതയും മോളിയെ തളർത്തിയെന്നതും അവരുടെ ജീവിത സാഹചര്യവും ചിലർക്കെങ്കിലും അറിയാവുന്ന സത്യമാണ്.

കഴിഞ്ഞ ദിവസങ്ങളിൽ പ്രമുഖ മലയാളം ആരോ​ഗ്യമാസികയുടെ കവർ ചിത്രത്തിന് മോളി കണ്ണമാലി മോഡലായപ്പോൾ അതും മലയാളികൾ ഇരു കയ്യും നീട്ടി സ്വീകരിച്ചു. എന്നിരുന്നാലും രോ​ഗവസ്ഥമൂലം കഷ്ടപ്പെടുന്ന മോളി ഇന്നും സാമ്പത്തികമായി തളർന്ന അവസ്ഥയിലാണ് ജീവിക്കുന്നത്.

ഇടയ്‌ക്കൊക്കെ സിനിമകള്‍ ചെയ്യാറുണ്ടെങ്കിലും വലിയ പ്രതിഫലമൊന്നും കിട്ടാറില്ലെന്നും സിനിമകളില്‍ അഭിനയിച്ചാല്‍ ഇപ്പോഴും കിട്ടുന്നത് 10000 രൂപയാണെന്നും മോളി തുറന്നു പറയുന്നു.

ഒരു പ്രമുഖ ചാനലിന് നല്‍കിയ അഭിമുഖത്തിലാണ് മോളി തന്റെ ദുരിത ജീവിതം തുറന്നുപറഞ്ഞത്. ഒരേ സിനിമയിൽ പ്രവർത്തിക്കുമ്പോൾ മറ്റുള്ള നടിമാര്‍ക്ക് കിട്ടുന്ന പ്രതിഫലം പോലും തനിക്ക് കിട്ടാറില്ലെന്നും മോളി പറയുന്നു. ‍

തന്റെ മക്കള്‍ക്കും ജോലിയില്ലെന്നും അവരും കുടുംബം പുലര്‍ത്താന്‍ ഏറെ കഷ്ടപ്പെടുന്നുണ്ടെന്നും മോളി പറയുന്നു. തനിക്ക് ഒട്ടും വയ്യാഞ്ഞിട്ടും അസുഖവിവരം മക്കളെ അറിയിച്ചിട്ടില്ലെന്നും ആകെയുണ്ടായിരുന്ന വീടും ഇപ്പോള്‍ കൈയ്യിലില്ലെന്നും ആശുപത്രി ചെലവിനായി വീടിന്റെ ആധാരം പണയത്തിലാണെന്നും മോളി ‌ പറഞ്ഞു.

താരസംഘടനയായ അമ്മയില്‍ അംഗത്വമുണ്ടെങ്കില്‍ മാസം 5000 രൂപയെങ്കിലും കിട്ടും. എന്നാല്‍ തനിക്ക് അതില്‍ അംഗത്വമില്ലെന്നും പണം തന്നെയാണ് അവിടെയും പ്രശ്‌നമായി വന്നതെന്നും മോളി കൂട്ടിച്ചേര്‍ത്തു. അമ്മയില്‍ അംഗത്വമെടുക്കാന്‍ ഒന്നരലക്ഷം രൂപ കൊടുക്കണം.

പണമില്ലാത്തവര്‍ക്ക് അംഗത്വമെടുക്കാന്‍ കഴിയില്ലെന്നും സാമ്പത്തികമായി കഴിവില്ലാത്ത ആരും അമ്മയില്‍ ഇല്ലെന്നും മോളി വ്യക്തമാക്കി.