മലയാള നാടക – സിനിമ അഭിനേതാവും ചലച്ചിത്ര പിന്നണി ഗായകനുമായ പാപ്പുക്കുട്ടി ഭാഗവതർ അന്തരിച്ചു. 107 വയസ്സായിരുന്നു.

‘വേദമണി’ എന്ന സംഗീത നാടകത്തിലൂടെ ഏഴാമത്തെ വയസ്സിൽ അരങ്ങിലെത്തിയ ഇദ്ദേഹം പതിനേഴാം വയസ്സിൽ ആർട്ടിസ്റ്റ് പി.ജെ. ചെറിയാന്റെ ‘മിശിഹാചരിത്ര’ത്തിൽ മഗ്ദലന മറിയത്തിന്റെ വേഷമിട്ട് പ്രൊഫഷണൽ നടനായി. ഗായകൻ യേശുദാസിന്റെ പിതാവ് അഗസ്റ്റിൻ ജോസഫും ‘മിശിഹാചരിത്ര’ത്തിൽ അഭിനയിച്ചിരുന്നു.

പിന്നീട് ചങ്ങനാശേരിയിലുള്ള നാടകട്രൂപ്പുകള്‍ക്കൊപ്പം പ്രവര്‍ത്തിച്ച പാപ്പുക്കുട്ടി ഭാഗവതര്‍, തിക്കുറിശ്ശിയുടെ ‘മായ’ എന്ന നാടകത്തിൽ നായകവേഷത്തില്‍ എത്തി. തിക്കുറിശ്ശി സുകുമാരന്‍ നായര്‍ ആയിരുന്നു അതിലെ വില്ലന്‍. കോളിളക്കം സൃഷ്ടിച്ച ‘മായ’, ഒറ്റ വർഷം 290 സ്‌റ്റേജുകളിലാണ് അവതരിപ്പിക്കപ്പെട്ടത്.