സംഗീത ഇതിഹാസം എ.ആർ.റഹ്മാനെ പൊതു വേദിയിൽ വച്ച് സൽമാൻ ഖാൻ പരിഹസിച്ചതിന്റെ വിഡിയോ ആണ് ഇപ്പോൾ സമൂഹമാധ്യമങ്ങളിൽ വ്യാപകമായി പ്രചരിക്കുന്നത്. 2014–ൽ നടന്ന ഒരു ചടങ്ങിനിടെ, എ.ആർ.റഹ്മാനെ ഒരു ‘ശരാശരി സംഗീതസംവിധായകൻ’ എന്ന് സൽമാൻ‌ ഖാൻ ഹാസ്യരൂപേണ പരാമര്ശിക്കുകയായിരുന്നു. എ.ആർ.റഹ്മാൻ ഒരു അവറേജ് സംഗീതസംവിധായകൻ ആണെന്നും അത് എല്ലാവർക്കും അറിയാമല്ലോ എന്നുമായിരുന്നു സൽമാൻ ഖാൻ അന്ന് പറഞ്ഞത്. റഹ്മാനും അന്നത്തെ കേന്ദ്രമന്ത്രി കപിൽ സിബലും സംയുക്തമായി ഒരുക്കിയ ആൽബം റിലീസ് ചെയ്യാനെത്തിയ ചടങ്ങിനിടെയാണ് സൽമാൻ ഖാൻ ഇത്തരത്തിൽ പറഞ്ഞത്.

അതോടൊപ്പം വേദിയിൽ തനിക്കൊപ്പം നിന്ന റഹ്മാനെ നോക്കി, പറഞ്ഞതു ശരിയല്ലേ എന്നു സൽമാൻ ചോദിക്കുകയും ചെയ്തു. പ്രസ്താവന ശരിയാണെന്നു സമ്മതിക്കും വിധത്തിൽ തലയാട്ടുക മാത്രമാണ് അന്ന് റഹ്മാൻ ചെയ്തത് പോലും. പിന്നീട് റഹ്മാനുമായി ഹസ്തദാനം നടത്താനായി സൽമാൻ തുനിഞ്ഞെങ്കിലും അതിനു തയ്യാറാകാതെ കൈകൾ പോക്കറ്റിൽ വച്ചിരിക്കുന്ന എ.ആർ റഹ്മാനെ വിഡിയോയിൽ കാണാൻ സാധിക്കും. എന്നാൽ സംഭവത്തിനു ശേഷം റഹ്മാനൊപ്പം ജോലി ചെയ്യാന്‍‍ ആഗ്രഹമുണ്ടെന്നു സൽമാന്‍‌ ഖാൻ പറഞ്ഞുവെങ്കിലും എ.ആർ.റഹ്മാൻ അതിനോടും പ്രതികരിക്കാൻ തയ്യാറായില്ല. അതിനു പിന്നാലെ ഒരു മാധ്യമപ്രവർത്തകൻ ആ ചോദ്യം ആവർത്തിച്ചപ്പോൾ ‘ആദ്യം എനിക്കിഷ്ടപ്പെടുന്ന തരത്തിലുള്ള സിനിമകൾ സൽമാൻ ചെയ്യട്ടെ’ എന്നായിരുന്നു റഹ്മാന് പ്രതികരിച്ചത്.

അതോടൊപ്പം തന്നെ ഇതിനു മുൻപും സൽമാൻ പ്രമുഖരോട് അപമര്യാദയായി പെരുമാരിയിട്ടുണ്ട്. 2016–ൽ ഒരു പുരസ്കാര വേദിയിൽ വച്ച് ഗായകൻ അർജിത് സിങിന്റെ പെരുമാറ്റത്തിൽ അതൃപ്തി തോന്നിയ സൽമാൻ, തന്റെ ചിത്രത്തിൽ അർജിത് റെക്കോർഡിങ് പൂർത്തിയാക്കിയ ഒരു ഗാനം ഉപേക്ഷിക്കാൻ സംഗീത സംവിധായകനോട് ആവശ്യപ്പെടുകയും ചെയ്തിരുന്നു.