ഇംഗ്ലീഷ് ബിരുദത്തിനായി കൊല്‍ക്കത്തിയിലെ ഒരു കോളജില്‍ പ്രവേശനത്തിന് എത്തിയ വിദ്യാര്‍ത്ഥികളാണ് പ്രവേശന മെറിറ്റ് പട്ടിക കണ്ട് ഞെട്ടിയത്. ബോളിവുഡ് താരം സണ്ണി ലിയോണാണ് ലിസ്റ്റിലുള്ളത്. അശുതോഷ് കോളജ് വ്യാഴാഴ്ച ഓണ്‍ലൈനില്‍ പ്രസിദ്ധീകരിച്ച ബിഎ ഇംഗ്ലീഷ്(ഓണേഴ്‌സ്) പ്രവേശനത്തിനുള്ള ആദ്യ ലിസ്റ്റിലാണ് സണ്ണി ഒന്നാം സ്ഥാനത്തുള്ളത്. ആപ്ലിക്കേഷന്‍ ഐഡി, റോള്‍ നമ്പര്‍ എന്നിവ സഹിതമാണ് പേര് പട്ടികയില്‍ ഉള്‍പ്പെടുത്തിയിരിക്കുന്നത്. ഇതില്‍ നിന്നും പേരിന് പുറമെ പ്ലസ് ടു പരീക്ഷയില്‍ നാല് വിഷയങ്ങള്‍ക്ക് ഫുള്‍ മാര്‍ക്ക് നേടിയിട്ടുണ്ടെന്നും വ്യക്തമാക്കുന്നു. സണ്ണിയുടെ കോളജ് പ്രവേശനം വാര്‍ത്തകളില്‍ നിറഞ്ഞതോടെ താരം രസകരമായ പ്രതികരണവുമായി എത്തുകയും ചെയ്തിട്ടുണ്ട്. എല്ലാവരേയും അടുത്ത സെമസ്റ്ററില്‍ കാണാം, നിങ്ങള്‍ എന്റെ ക്ലാസിലുണ്ടാകുമെന്ന് പ്രതീക്ഷിക്കുന്നു എന്നായിരുന്നു താരം ട്വീറ്റ് ചെയ്തത്.

പോണ്‍ മേഖലയില്‍ നിന്നും ബോളിവുഡില്‍ എത്തിയ താരമാണ് സണ്ണി ലിയോണ്‍. നിരവധി ആരാധകരുള്ള താരമാണ് ഇപ്പോള്‍ സണ്ണി. മൂന്ന് മക്കളെയും ദത്തെടുത്ത് ഭര്‍ത്താവ് ഡാനിയല്‍ വെബ്ബറുമൊത്ത് സന്തുഷ്ട ജീവിതം നയിക്കുകയാണ് സണ്ണി. ഏതോ വിദ്യാര്‍ഥി മന:പൂര്‍വം തെറ്റായ അപേക്ഷ സമര്‍പ്പിച്ചതാണെന്നും ഇംഗ്ലീഷ് ഡിപ്പാര്‍ട്ട്‌മെന്റ് അധികൃതരോട് ഇക്കാര്യത്തില്‍ നടപടിയെടുക്കാന്‍ ആവശ്യപ്പെട്ടിട്ടുണ്ടെന്നും കോളേജ് അധികൃതര്‍ വിശദീകരണം നല്‍കി. ഇതിനു മുമ്പ് 2019ല്‍ ലോക്‌സഭാ തെരഞ്ഞെടുപ്പ് ഫലം പുറത്തുവന്നപ്പോള്‍ റിപ്പോര്‍ട്ടിങ്ങിനിടയില്‍ സണ്ണി ഡിയോള്‍ എന്നതിനു പകരം വാര്‍ത്താ ചാനലിലെ അവതാരകന്‍ അബദ്ധത്തില്‍ സണ്ണി ലിയോണ്‍ എന്നു പറഞ്ഞത് വലിയ ചര്‍ച്ചയായിരുന്നു. പിന്നീടു പുറത്തുവന്ന ട്രോളുകള്‍ നടി അടക്കമുള്ളവര്‍ ഷെയര്‍ ചെയ്തിരുന്നു.