ക്വാറന്റയിനും ആയൂര്‍വേദ ചികിത്സയും കഴിഞ്ഞ് താരം വീണ്ടും ക്യാമറയ്ക്ക് മുന്നിലെത്തുന്നു. എല്ലാവര്‍ഷവുമുള്ള ആയൂര്‍വേദ ചികിത്സ ഇക്കൊല്ലവും മുടക്കിയില്ല. തൃശൂര്‍ പൂമുള്ളിമനയിലാണ് വര്‍ഷങ്ങളായി കര്‍ക്കിടക മാസത്തില്‍ ചികിത്സയ്ക്ക് പോകുന്നത്. കോവിഡ് കാരണം ഇത്തവണ അത് ചിങ്ങത്തിലായി എന്ന് മാത്രമല്ല പെരുങ്ങോട്ടുകരയിലുള്ള ആയൂര്‍വേദ ഹെറിറ്റേജിലേക്ക് മാറ്റുകയും ചെയ്തു. സെപ്തംബര്‍ രണ്ടിനാണ് ചികിത്സയ്ക്ക് പോയത്. രണ്ടാഴ്ചയാണ് ചികിത്സ. 20ന് ദൃശ്യം രണ്ടിന്റെ ചിത്രീകരണം തുടങ്ങും. അതിന് മുമ്ബ് ക്വാറന്റയിനില്‍ പോകണമെന്ന് സംവിധായകന്‍ നിര്‍ദ്ദേശിച്ചിരുന്നു. ക്വാറന്റയിനും ചികിത്സയും ഒരുമിച്ചാക്കി. ലോക്ഡൗണിനെ തുടര്‍ന്ന് ചെന്നൈയില്‍ അകപ്പെട്ട താരം ജൂലായി 20നാണ് കൊച്ചിയിലെത്തിയത്. ശേഷം ക്വാറന്റയിനില്‍ പോയിരുന്നു. അത് കഴിഞ്ഞ് കോവിഡ് പരിശോധനയും നടത്തി. നെഗറ്റീവായിരുന്നു.

ആഗസ്റ്റ് ആദ്യം ചില പരസ്യചിത്രങ്ങളിലും ഒരു ചാനലിന്റെ ഓണപ്പരിപാടിയിലും പങ്കെടുത്തു. ലോക്ഡൗണിന് മുമ്ബ് ചിത്രീകരണം തുടങ്ങിയ റാം ഇനി അടുത്തവര്‍ഷമേ പൂര്‍ത്തിയാക്കൂ. വിദേശത്തും ഡല്‍ഹിയിലും ഷൂട്ടിംഗ് പ്ലാന്‍ ചെയ്ത സമയത്താണ് ലോക്ഡൗണ്‍ പ്രഖ്യാപിച്ചത്. ആ സമയത്താണ് സംവിധായകന്‍ ജിത്തുജോസഫും മോഹന്‍ലാലും ദൃശ്യത്തിന്റെ രണ്ടാംഭാഗം ചെയ്യാന്‍ തീരുമാനിച്ചത്. ലോക്ഡൗണ്‍ സമയത്താണ് തിരക്കഥ പൂര്‍ത്തിയാക്കിയത്. അതിനാല്‍ ആളും ആരവും ഇല്ലാത്ത സിനിമയാണ്. ആദ്യ ഭാഗത്തേത് പോലെ ക്രൈം ത്രില്ലറായിരിക്കില്ല. കുടുംബ ജീവിതത്തിനും ബന്ധങ്ങള്‍ക്കും പ്രാധാന്യം നല്‍കുന്ന സിനിമയായിരിക്കും. മീന, എസ്തര്‍ അനില്‍, അന്‍സിബ എന്നിവരും രണ്ടാം ഭാഗത്തില്‍ ഉണ്ടായിരിക്കും. വാഗമണ്ണിലാണ് ഷൂട്ടിംഗ്.