ഗായകന്‍ എസ്.പി ബാലസുബ്രഹ്മണ്യത്തിന്റെ ആരോഗ്യനില അതീവ ഗുരുതരമായി തുടരുന്നു. ചെന്നൈ എം.ജി.എം ആശുപത്രിയിലാണ് എസ്.പി.ബി ചികിത്സയില്‍ കഴിയുന്നത്. എസ്.പി ബാലസുബ്രഹ്മണ്യത്തിന്റെ ആരോഗ്യനില വഷളായതായി എം.ജി.എം ആശുപത്രി അധികൃതര്‍ പ്രസ്താവനയില്‍ അറിയിച്ചു. നേരത്തെ കോവിഡ് ബാധിതനായിരുന്ന അദ്ദേഹം രോഗമുക്തി നേടിയിരുന്നു. എന്നാല്‍ മറ്റ് ആരോഗ്യപ്രശ്‌നങ്ങള്‍ അലട്ടിയിരുന്നതിനാല്‍ ആശുപത്രി വിടാനായില്ല. ഇതിനിടെ കഴിഞ്ഞ 24 മണിക്കൂറിനിടെ എസ്.പി.ബിയുടെ ആരോഗ്യനില വഷളാവുകയായിരുന്നു.

ഇ.സി.എം.ഒയുടെയും മറ്റ് ജീവന്‍ രക്ഷാ ഉപകരണങ്ങളുടെയും സഹായത്തോടെയാണ് അദ്ദേഹത്തിന്റെ ജീവന്‍ നിലനിര്‍ത്തിയിരിക്കുന്നത്. കഴിഞ്ഞ 24 മണിക്കൂറിനിടെയാണ് അദ്ദേഹത്തിന്റെ ആരോഗ്യനില വിഷളായത്. വിദഗ്ദ്ധ ഡോക്ടര്‍മാരുടെ സംഘം അദ്ദേഹത്തിന്റെ ആരോഗ്യനില നിരീക്ഷിച്ചുകൊണ്ടിരിക്കുകയാണെന്നും ആശുപത്രി പ്രസ്താവനയില്‍ അറിയിച്ചു.
ഓഗസ്റ്റ് അഞ്ചിനാണ് എസ്.പി ബാലസുബ്രഹ്മണ്യത്തെ എം.ജി.എം ആശുപത്രിയില്‍ പ്രവേശിപ്പിച്ചത്. ആദ്യത്തെ ആഴ്ചയില്‍ തന്നെ അദ്ദേഹത്തിന് കോവിഡ് സ്ഥിരീകരിച്ചിരുന്നു. ഒരു മാസം നീണ്ട ചികിത്സയ്ക്ക് ശേഷം സെപ്റ്റംബര്‍ ഏഴിന് അദ്ദേഹം കോവിഡ് നെഗറ്റീവായി. എന്നാല്‍ ആശുപത്രി വിടാനായില്ല. എസ്.പി.ബി ആരോഗ്യനില വീണ്ടെടുക്കുകയും കിടക്കയില്‍ എഴുന്നേറ്റ് ഇരിക്കുകയും ചെയ്തതായി കഴിഞ്ഞ ദിവസം മകന്‍ വ്യക്തമാക്കിയിരുന്നു. ഇതിനിടെയാണ് വീണ്ടും ആരോഗ്യനില ഗുരുതരമായിരിക്കുന്നത്.