മലയാളികളുടെ ഉള്ളിൽ എപ്പോഴും നിറഞ്ഞു നിൽക്കുന്ന താരമാണ് സരയു മോഹന്‍. വെള്ളിത്തിരയിൽ മാത്രമല്ല പരമ്പരകളിലൂടെയും വളരെ കുറച്ച്‌ ചിത്രങ്ങള്‍ കൊണ്ടുതന്നെ പ്രേക്ഷകശ്രദ്ധ ഏറെ പിടിച്ചുപറ്റിയ താരത്തെ വളരെ പെട്ടന്നായിരുന്നു ആരാധകർ ഏറ്റെടുത്തത്. ഇപ്പോളിതാ കുട്ടിക്കാലത്തെ വാശികളെ കുറിച്ചുള്ള മനോഹരമായ ഓര്‍മ്മകള്‍ ആരാധകരുമായി പങ്കുവെക്കുകയാണ് താരം. ഈ പുഴയും കടന്ന് എന്ന സിനിമയില്‍ മഞ്ജു വാര്യര്‍ ധരിച്ച അതേ പാവാടയും ബ്ലൗസും വേണമെന്ന് പറഞ്ഞ് വാശി പിടിച്ച്‌ കരഞ്ഞതും അത് ധരിച്ച്‌ പാട്ടു പാടി നടന്നതിനെയും കുറിച്ചാണ് സരയു പറയുന്നത്.

സരയുവിന്റെ കുറിപ്പ്...

ഈ പുഴയും കടന്ന് സിനിമ കണ്ടപ്പോഴാണ് പാവാടയും ബ്ലൗസും വേണമെന്ന ആഗ്രഹം കുഞ്ഞുമനസ്സില്‍ തോന്നിയത്.. പിന്നെ വാശിയുടെയും അലറികരച്ചിലിന്റെയും മുഖം വീര്‍പ്പിച്ചു നടക്കലിന്റെയും ദിവസങ്ങള്‍. സമരം വിജയം കണ്ടു, പച്ചാളത്ത്, സിന്ദൂരം ടെസ്‌റ്റൈല്‍സില്‍ നിന്ന് ഓറഞ്ച് ബ്ലൗസും നീല പാവാടയും അമ്മ വാങ്ങി തന്നു.
പിന്നെ മഞ്ജുവാര്യര്‍ അടുക്കളയിലും മുറിയിലും എല്ലാം കാക്കകറുമ്ബന്‍ കണ്ടാല്‍ കുറുമ്ബന്‍ എന്ന് പാടി നടപ്പായി.

സ്‌കൂളില്‍ അതിട്ട് പാട്ടുപാടി (അന്ന് ഞാന്‍ പാട്ടുകാരിയും ആയിരുന്നു, പിന്നീട് മറ്റുള്ളവരോട് ചെയ്യുന്ന ക്രൂരതയുടെ ആഴം മനസിലാക്കി ഞാന്‍ സ്വയം ആ പരിപാടി നിര്‍ത്തി ) പാവാടയും ബ്ലൗസും വേറെ കുറേ വന്നു, സ്വപ്നത്തില്‍ പോലും വിചാരിക്കാത്ത അത്ര ഡ്രസ്സുകള്‍ കൈയില്‍ വന്ന് ചേര്‍ന്നു.

മഞ്ജു ചേച്ചി വീണ്ടും സിനിമയില്‍ എത്തി, ഞാനും കറങ്ങിതിരിഞ്ഞു സിനിമയുടെ ഓരത്ത് ചെന്നെത്തി, സിനിമകളില്‍, ഓണം ഫോട്ടോഷൂട്ടുകളില്‍ പല നിറങ്ങളില്‍ പാവാടയും ബ്ലൗസ്സുകളും ഇട്ടു, എന്നാലും ഓറഞ്ച് ബ്ലൗസ് കാണുമ്ബോള്‍ ഒരിഷ്ടമാണ്, ആദ്യമായി സ്വന്തമായതിനോടുള്ള ഒരു ഇഷ്ടമുണ്ടല്ലോ, ലത്.. ഓരോരോ ഭ്രാന്തുകള്‍!