മലയന്കുഞ്ഞ് എന്ന സിനിമയുടെ ചിത്രീകരണത്തിനിടെ സംഭവിച്ച അപകടത്തിന്റെ വിവരങ്ങള്‍ പങ്കുവെച്ച് ഫഹദ് ഫാസില്. ചിത്രത്തിന്റെ സംഭവിച്ച അപകടത്തില്‍ പറ്റിയ പരുക്കുകളില്‍ ഇന്നും സുഖം പ്രാപിച്ചു വരികയാണെന്ന് ഫഹദ് ഫേസ്ബുക്കില്‍ പങ്കുവെച്ച കുറിപ്പില്‍ പറഞ്ഞു. മൂക്കില്‍ മൂന്ന് തയ്യലുണ്ട്. 'മലയന്‍കുഞ്ഞ്' ചിത്രീകരണത്തിനിടെ ഉണ്ടായ അപകടത്തില്‍ നിന്ന് തലനാരിഴയ്ക്കാണ് രക്ഷപ്പെട്ടത് എന്ന് ഡോക്ടര്‍മാര്‍ പറയുന്നു. വീണപ്പോള്‍ മുഖം താഴെയടിക്കും മുമ്ബ് തന്നെ ഞാന്‍ കൈകള്‍ കുത്തി. 80 ശതമാനം പേര്‍ക്കും വീഴ്ചയുടെ മാനസിക ആഘാതത്തില്‍ അതിനു സാധിക്കുന്നതല്ല. പക്ഷേ മനസ്സാന്നിധ്യം കൈവെടിയാഞ്ഞതിനാല്‍ എനിക്കതു സാധിച്ചു. അങ്ങനെ മുന്‍പ് നിരവധി തവണ ഉണ്ടായതു പോലെ വീണ്ടുമൊരിക്കല്‍ കൂടി ജീവിതത്തില്‍ ഭാഗ്യം എന്നെ തുണച്ചു.'ഫഹദ് കുറിപ്പില്‍ പറയുന്നു.

തീയറ്ററില്‍ റിലീസ് ചെയ്യാന്‍ ആഗ്രഹിച്ചിരുന്ന തന്റെ 'മാലിക്' ഒടിടി പ്ലാറ്റ്‌ഫോമില്‍ റിലീസ് ചെയ്യുമെന്നും ഫഹദ് അറിയിച്ചു. 'ഞങ്ങളുടെ ഏറ്റവും വലിയ അഭിമാന പദ്ധതികളിലൊന്നായ 'മാലിക്' എന്ന ചിത്രം വളരെയധികം വിഷമത്തോടെയാണെങ്കിലും ഒടിടിയില്‍ റിലീസ് ചെയ്യാന്‍ തീരുമാനിച്ചിരിക്കുകയാണ്. ആ സിനിമയുമായി ബന്ധപ്പെട്ട എല്ലാവരുടെയും വര്‍ഷങ്ങള്‍ നീണ്ട പരിശ്രമത്തിന്റെ ഫലമാണത്. അടുത്ത കാലത്ത് ഒടിടിയില്‍ റിലീസ് ചെയ്ത എന്റെ മറ്റു സിനിമകള്‍ പോലെയല്ല മാലിക്. അവയൊക്കെ ആദ്യം മുതല്‍ക്കെ ഒടിടി റിലീസിനായി ഒരുക്കപ്പെട്ടതായിരുന്നെങ്കില്‍ മാലിക് തിയറ്ററില്‍ തന്നെ റിലീസ് ചെയ്യാനിരുന്നതാണ്. പക്ഷേ എല്ലാവരും ചേര്‍ന്നെടുത്ത ഈ തീരുമാനത്തോട് ഞാനും യോജിക്കുന്നു ഒപ്പം നിങ്ങളോരോരുത്തരോടും സിനിമ കാണണമെന്ന് അഭ്യര്‍ഥിക്കുകയും ചെയ്യുന്നു'
ഏഴുവര്‍ഷം മുമ്ബിറങ്ങിയ ബാംഗ്ലൂര് ഡെയ്‌സ് എന്ന ചിത്രത്തിന്റെ ഓര്മകളും നസ്രിയയുമായുള്ള പ്രണയനിമിഷങ്ങളും ഫഹദ് ഇംഗ്ലീഷിലുള്ള കുറിപ്പില്‍ പങ്കുവെക്കുന്നു. തനിക്കുണ്ടായ ചെറിയ നേട്ടങ്ങള്‍ക്ക് പോലും നസ്രിയ കാരണമായിട്ടുണ്ടെന്ന് ഫഹദ് പറയുന്നു.