തമിഴ്​ സൂപ്പര്‍താരം അജിത്തിനെതിരെ ആരോപണമുന്നയിച്ച്‌​ യുവതി വീടിന്​ മുന്നില്‍ ആത്മഹത്യക്ക്​ ശ്രമിച്ചു. തന്‍റെ ജോലി പോകാന്‍ കാരണം അജിത്താണെന്ന്​ ആരോപിച്ചാണ്​ യുവതി തീകൊളുത്തി ആത്മഹത്യക്ക്​ ശ്രമിച്ചത്​.

സംഭവം ഇങ്ങനെ : നഗരത്തിലെ സ്വകാര്യ ആശുപത്രിയില്‍ ജോലി ചെയ്യുന്ന ഫര്‍സാന എന്ന യുവതിയാണ്​ ആത്മഹത്യക്ക്​ ശ്രമിച്ചത്​. 2020ല്‍ അജിത്തും അദ്ദേഹത്തിന്‍റെ ഭാര്യയും ആശുപത്രി സന്ദര്‍ശിച്ചിരുന്നു. ഇവരുടെ വിഡിയോ ഫര്‍സാന ​സമൂഹമാധ്യമങ്ങളില്‍ പോസ്റ്റ്​ ചെയ്യുകയും വൈറലാകുകയും ചെയ്​തു. ഇതിനെത്തുടര്‍ന്ന്​ തൊഴില്‍ നിയമങ്ങള്‍ ലംഘിച്ചുവെന്ന്​ കാണിച്ച്‌​ ആശുപത്രി ഫര്‍സാനയെ പറഞ്ഞുവിട്ടു. തുടര്‍ന്ന്​ ഫര്‍സാന സഹായിക്കണമെന്നാവശ്യപ്പെട്ട്​ ശാലിനിയെ സന്ദര്‍ശിച്ചിരുന്നു.

തിങ്കളാഴ്​ച ഉച്ചക്ക്​ യുവതിയും സുഹൃത്തും അജിത്തിനെ കാണാനായി വീടിന്​ മുന്നിലെത്തി. പക്ഷേ സുരക്ഷ ഉദ്യോഗസ്ഥര്‍ അകത്തേക്ക്​ കയറ്റിയില്ല. ഇതിനെത്തുടര്‍ന്ന്​ തന്‍റെ ജോലി തെറിപ്പിച്ചത്​ അജിത്താണെന്ന്​ പറഞ്ഞ്​ ആത്മഹത്യക്ക്​ ശ്രമിക്കുകയായിരുന്നു. തീകൊളുത്താന്‍ ശ്രമിച്ച യുവതിയെ പൊലീസ്​ വെള്ളമൊഴിച്ച്‌​ രക്ഷപ്പെടുത്തുകയായിരുന്നു.