കീര്‍ത്തി സുരേഷിന്റെ പേരുപോലെ തന്നെ കീര്‍ത്തിയിലേക്ക് ഉയരുകയാണ് താരം....
തെന്നിന്ത്യ മുഴുവന്‍ കീര്‍ത്തി സുരേഷിന്റെ കീര്‍ത്തി പടരുകയാണ്. തെലുങ്ക് ചിത്രമായ മഹാനടിയിലൂടെ മികച്ച അഭിനേത്രിക്കുള്ള ദേശീയ പുരസ്‌കാരം നേടിയതോടെയാണ് കീര്‍ത്തിയുടെ താരമൂല്യം കുതിച്ചുയര്‍ന്നത്. സിനിമയിലെന്നപോലെ പരസ്യചിത്രങ്ങളിലും കീര്‍ത്തിയുടെ 'ബ്രാന്‍ഡ് വാല്യു' ഉയരേക്ക് തന്നെ. തെന്നിന്ത്യന്‍ ഭാഷകളിലെല്ലാം ഒരുപിടി മികച്ച പ്രോജക്ടുകളുണ്ട് കീര്‍ത്തിക്ക്.
തമിഴില്‍ രജനികാന്തിനോടൊപ്പം അണ്ണാത്തെയും മലയാളത്തില്‍ മോഹന്‍ലാലിനോടൊപ്പമഭിനയിച്ച മരയ്ക്കാര്‍ അറബിക്കടലിന്റെ സിംഹവുമാണ് റിലീസാകാനുള്ളത്. തെലുങ്കില്‍ ചിരഞ്ജീവിയോടൊപ്പമഭിനയിക്കുന്ന ഭോലാശങ്കര്‍ പൂര്‍ത്തിയായിക്കഴിഞ്ഞു. തമിഴ് ചിത്രമായ വേതാളത്തിന്റെ ഈ തെലുങ്ക് റീമേക്കില്‍ ചിരഞ്ജീവിയുടെ അനുജത്തി വേഷമാണ് കീര്‍ത്തിക്ക്. തെലുങ്കിലെ യുവ സൂപ്പര്‍താരം മഹേഷ് ബാബുവിന്റെ നായികയായി സര്‍ക്കാരുവാരി പേട്ട എന്ന തെലുങ്ക് ചിത്രത്തിലാണ് കീര്‍ത്തി ഇപ്പോഴഭിനയിക്കുന്നത്.
സ്‌പെയിനിലാണ് ചിത്രത്തിന്റെ ഷൂട്ടിംഗ് പുരോഗമിക്കുന്നത്. നായകന്‍ മഹേഷ്ബാബു ഒരുമാസത്തോളം കുടുംബത്തോടൊപ്പം യൂറോപ്യന്‍ രാജ്യങ്ങളിലുണ്ട്. ബുധനാഴ്ച രാത്രിയാണ് കീര്‍ത്തി സുരേഷ് സ്‌പെയിനിലെത്തിയത്. ബാര്‍സലോണയിലും സ്‌പെയിനിലെ നയനമനോഹരമായ മറ്റ് ലൊക്കേഷനുകളിലും ചിത്രത്തിലെ ഗാനങ്ങള്‍ ഉള്‍പ്പെടെയുള്ള സുപ്രധാന രംഗങ്ങള്‍ ചിത്രീകരിക്കും.
പരശുറാം പെട്‌ല സംവിധാനം ചെയ്യുന്ന ഈ ആക്ഷന്‍ എന്റര്‍ടെയ്നറില്‍ മഹേഷ്ബാബു അവതരിപ്പിക്കുന്ന തന്റെ കോര്‍പ്പറേറ്റ് ബോസിനെ പ്രണയിക്കുന്ന നാടന്‍ തെലുങ്ക് പെണ്‍കുട്ടിയുടെ വേഷമാണ് കീര്‍ത്തി സുരേഷിന്.മൈത്രി മൂവീ മേക്കേഴ്‌സ് നിര്‍മ്മിക്കുന്ന ചിത്രത്തിന്റെ ആദ്യ ഷെഡ്യൂള്‍ ദുബായിലാണ് ചിത്രീകരിച്ചത്. നവംബര്‍ പകുതിയോടെ തെലുങ്ക്ചിത്രത്തിന്റെ ചിത്രീകരണം പൂര്‍ത്തിയാക്കി കീര്‍ത്തി സുരേഷ് തലസ്ഥാനത്തേക്ക് തിരിച്ചെത്തും.തിരുവനന്തപുരത്ത് നവംബര്‍ പതിനഞ്ചിനാണ് ടൊവിനോ തോമസ് നായകനാകുന്ന വാശിയുടെ ചിത്രീകരണമാരംഭിക്കുന്നത്.
https://www.facebook.com/Malayalivartha
