കുഞ്ഞ് കരയാന്‍ കാരണം നീയാണെന്ന് കേള്‍ക്കുന്ന അമ്മയുടെ അവസ്ഥ ഭീകരമാണെന്ന് പേളി മാണി. ഒരു മാസികയ്ക്ക് നൽകിയ അഭിമുഖത്തിലാണ് താരത്തിന്റെ പ്രതികരണം. പ്രസവം കഴിഞ്ഞ് കുറച്ചുകാലത്തേക്കെങ്കിലും നമ്മുടെ മനസ്സ് വിഷമിപ്പിക്കാന്‍ സാധ്യതയുള്ളവരെ കാണരുതെന്ന് താരം പറയുന്നു. പ്രസവിച്ചപ്പോള്‍ നീ തടി വെച്ചല്ലോ, നിനക്ക് പാലില്ലല്ലോ എന്നൊക്കെ കമന്റ് അടിച്ച് വേദനിപ്പിക്കുന്നവരുണ്ട്.

ഒരു ദിവസം നില വല്ലാത്ത കരച്ചില്‍. അപ്പോള്‍ എന്റെ അടുത്ത് വന്നൊരു ബന്ധുവിന്റെ കമന്റ്. 'പാലില്ല, അതാണ് കൊച്ച് കരയുന്നത്.' ഞാനാണെങ്കില്‍ തൊട്ടുമുന്നേ പാല്‍ കൊടുത്തിട്ടേയുള്ളൂ. പക്ഷേ അവര്‍ ഇത് പറഞ്ഞപ്പോള്‍ എനിക്ക് വല്ലാത്ത വിഷമം വന്നു. ഞാന്‍ ഭയങ്കര കരച്ചിലായി. പ്രസവം കഴിഞ്ഞ് ഏഴോ എട്ടോ ദിവസമായിട്ടേയുള്ളൂ.

ജനിച്ച ഉടനെ കുഞ്ഞ് ചെറുതായി കരഞ്ഞാലും കൂടെ കരഞ്ഞുപോവുന്നവരാണ് അമ്മമാര്‍. അത്രയ്ക്കും സെന്‍സിറ്റീവായ കാലം. ഈയൊരു സമയത്ത് കുഞ്ഞ് കരയാന്‍ കാരണം നീയാണെന്ന് കേള്‍ക്കുന്ന അമ്മയുടെ അവസ്ഥ ഭീകരമാണ്. ഒരിക്കലും നെഗറ്റീവായൊരു കമന്റ് പറഞ്ഞ് പ്രസവിച്ച് കിടക്കുന്ന പെണ്ണിനെ വൈകാരികമായി വിഷമിപ്പിക്കരുതെന്നും താരം കൂട്ടിച്ചേർത്തു.

നല്ല അമ്മയാണ് എന്ന് വിശ്വസിക്കാനാണ് എല്ലാ അമ്മമാര്‍ക്കും ആഗ്രഹം. ഒരു അമ്മ ചെയ്യുന്നതിനെ മികച്ചത് എന്നുപറഞ്ഞ് എപ്പോഴും അഭിനന്ദിച്ചുകൊണ്ടിരിക്കണം. നീ ഇന്ന് എന്ത് നന്നായിട്ടാണ് കൊച്ചിനെ നോക്കിയത്, കൊച്ച് വളരെ ഹാപ്പിയാണ് നിന്റെ കൂടെ എന്നൊക്കെ പറഞ്ഞാല്‍ തന്നെ അമ്മയാവുന്ന കാലത്തുള്ള വിഷാദമൊക്കെ താനെ അകന്നുപോകുമെന്നും താരം പറയുന്നു.