നാളെ റിലീസിനൊരുങ്ങുന്ന മോഹന്‍ലാല്‍ ചിത്രം 'മരക്കാര്‍: അറബിക്കടിലിന്റെ സിംഹ'ത്തിന് ആശംസയുമായി മമ്മൂട്ടി. സോഷ്യല്‍ മീഡിയയിലൂടെ ആയിരുന്നു നടന്‍ മോഹന്‍ലാല്‍, പ്രിയദര്‍ശന്‍ ഉള്‍പ്പടെയുള്ളവര്‍ക്ക് ആശംസയുമായി മമ്മൂട്ടി എത്തിയത്.

'മരക്കാര്‍ അറബിക്കടലിന്റെ സിംഹം നാളെ ലോകമെമ്ബാടും റിലീസ് ചെയ്യുന്നു, പ്രിയപ്പെട്ട ലാലിനും പ്രിയനും അതിന്റെ പിന്നിലെ മുഴുവന്‍ ടീമിനും എല്ലാ ആശംസകളും നേരുന്നു', എന്നാണ് മമ്മൂട്ടി കുറിച്ചത്. പിന്നാലെ അദ്ദേഹത്തിന്റെ ആരാധകരും ആശംസകളുമായി രംഗത്തെത്തി.

പ്രിയദര്‍ശനും മോഹന്‍ലാലും ഒന്നിക്കുന്ന ബിഗ് ബജറ്റ് ചിത്രത്തിനായുള്ള കാത്തിരിപ്പിലാണ് ആരാധകരും സിനിമാസ്വാദകരും. ചിത്രം റിലീസ് ആകുന്നതോടെ മലായാള സിനിമയില്‍ പുതു ചരിത്രം കുറിക്കുമെന്നാണ് ആരാധകര്‍ ഒന്നടങ്കം പറയുന്നത്. ഈ അവസരത്തില്‍ താരങ്ങള്‍ അടക്കമുള്ള നിരവധി പേര്‍ ചിത്രത്തിന് ആശംസുമായി രംഗത്തെത്തുന്നുണ്ട്.

ലോകമാകമാനം 4100 സ്‌ക്രീനുകളിലാണ് മരക്കാര്‍ നാളെ പ്രദര്‍ശനത്തിനെത്തുന്നത്. റിലീസ് ദിനത്തില്‍ ആകെ 16,000 പ്രദര്‍ശനങ്ങള്‍ ഉണ്ടെന്നാണ് നിര്‍മ്മാതാക്കള്‍ അറിയിച്ചിരിക്കുന്നത്. ആഴ്ചകള്‍ക്കു മുന്‍പേ ചിത്രത്തിന്റെ ടിക്കറ്റ് ബുക്കിംഗ് ആരംഭിച്ചിരുന്നു. 2018 ഏപ്രില്‍ 28ന് പ്രഖ്യാപിച്ച ചിത്രമാണ് മൂന്നര വര്‍ഷങ്ങള്‍ക്കിപ്പുറം തിയറ്ററുകളില്‍ എത്തുന്നത്.