ബോളിവുഡ് താരമായ സല്‍മാന്‍ ഖാന്‍റെ പ്രോപ്പര്‍ട്ടികളിൽ ഒന്ന് നടന്‍ അടുത്തിടെ വാടകയ്ക്ക് കൊടുത്തു. സല്‍മാന്‍ ഖാന്‍ താമസിക്കുന്നതും വാടകയ്ക്ക് എടുത്തിരിക്കുന്ന ഒരു ഫ്ലാറ്റിലാണ്. സല്‍മാന്‍ ഖാന്‍ വളരെക്കാലമായി ബാന്ദ്രയിലെ ഗാലക്സി അപ്പാര്‍ട്ട്മെന്റിലാണ് താമസിക്കുന്നത്. അത് കൂടാതെ മറ്റ് നിരവധി പ്രോപ്പര്‍ട്ടികളിലും അദ്ദേഹം നിക്ഷേപിച്ചിട്ടുണ്ട്.

മുംബൈയിലുള്ള തന്റെ ഒരു പ്രോപ്പര്‍ട്ടി അദ്ദേഹം ആയുഷ് ദുവ എന്ന വ്യക്തിക്ക് പ്രതിമാസം 95,000 രൂപയ്ക്കാണ് അടുത്തിടെ വാടകയ്ക്ക് നല്‍കിയത്. മണി കണ്‍ട്രോള്‍ റിപ്പോര്‍ട്ട് പ്രകാരം, ശേഖരിച്ച വിവരങ്ങള്‍ അനുസരിച്ച്‌ ഡിസംബര്‍ 6 നാണ് ലീസ് ആന്‍ഡ് ലൈസന്‍സ് കരാര്‍ രേഖപ്പെടുത്തിയിരിക്കുന്നത്.

3 മാസത്തേക്കുള്ള കരാറാണ് അത്. ആയുഷിന് സല്‍മാന്‍ വാടകയ്ക്ക് കൊടുത്ത ഈ അപ്പാര്‍ട്ട്മെന്റ് ശിവ് അസ്താന് ഹൈറ്റ്സിന്റെ പതിനാലാം നിലയിലുള്ളതാണ്. മുംബൈയിലെ ബാന്ദ്ര വെസ്റ്റിലാണ് ഈ പ്രദേശം സ്ഥിതി ചെയ്യുന്നത്. 758 ചതുരശ്ര അടിയുള്ള അപ്പാര്‍ട്ട്മെന്റ് ആണിത്.

തന്റെ ഭാവി തലമുറകള്‍ക്ക് കൂടി സുഖമായി ജീവിക്കാനുള്ളത്ര സമ്ബാദ്യം അദ്ദേഹം ഇതിനകം സ്വന്തമാക്കിയിട്ടുണ്ട്. എന്നാല്‍ സിനിമ കൂടാതെ സല്‍മാന് മറ്റ് ചില ബിസിനസുകളും ഉണ്ട്. അതില്‍ പ്രധാനപ്പെട്ടത് റിയല്‍ എസ്റ്റേറ്റ് ബിസിനസാണ്. അതിലൂടെ മാത്രം വന്‍ തുകയാണ് സല്‍മാന്‍ ഖാന്‍ സമ്പാദിക്കുന്നത്.

റിയല്‍ എസ്റ്റേറ്റില്‍ സല്‍മാന് വളരെയധികം താല്പര്യമുണ്ട്. ജനുവരിയിലാണ് ബാന്ദ്രയിലെ ഗാലക്സി അപ്പാര്‍ട്ട്മെന്റില്‍ സല്‍മാന്‍ തന്റെ ഇപ്പോഴത്തെ അപ്പാര്‍ട്ട്മെന്റ് വാടകയ്‌ക്കെടുത്തത്. അവിടെയാണ് കുറേക്കാലമായി അദ്ദേഹം താമസിക്കുന്നത്. റിപ്പോര്‍ട്ടുകള്‍ പ്രകാരം, 139.40 ചതുരശ്ര മീറ്റര്‍ വിസ്തീര്‍ണ്ണമുള്ള രണ്ടാം നിലയിലെ അപ്പാര്‍ട്ട്മെന്റ് 25 ലക്ഷം രൂപ ഡെപ്പോസിറ്റ് നല്‍കി നാല് വര്‍ഷത്തേക്കാണ് വാടകയ്ക്ക് എടുത്തിരിക്കുന്നത്.

ഏതാനും മാസങ്ങള്‍ക്ക് മുമ്പ് ബാന്ദ്രയിലെ തന്റെ ആഢംബര ഡ്യൂപ്ലെക്സ് ഫ്ലാറ്റിനായി പ്രതിമാസം 8.25 ലക്ഷം രൂപയ്ക്കുള്ള വാടക കരാര്‍ അദ്ദേഹം പുതുക്കിയിരുന്നു. റിപ്പോര്‍ട്ടുകള്‍ പ്രകാരം, ഫ്ലാറ്റ് ഉടമകളായ ബാബാ സിദ്ധിഖ്, സീഷന്‍ സിദ്ധിഖ് എന്നിവരുമായുള്ള കരാറാണ് സല്‍മാന്‍ പുതുക്കിയത്. മഖ്ബ ഹൈറ്റ്സ് എന്നറിയപ്പെടുന്ന കെട്ടിടം 11 മാസത്തേക്കാണ് വാടകയ്ക്ക് നല്‍കിയിരിക്കുന്നത്.