മലയാളികളുടെ പ്രിയപ്പെട്ട താരങ്ങളില്‍ ഒരാളാണ് ശരണ്യ മോഹൻ. ശാലീന സുന്ദരിയായി വന്ന് മലയാളികളുടെ പ്രിയങ്കരിയായി മാറുകയായിരുന്നു താരം. വിവാഹം കഴിഞ്ഞതോട് കൂടി അഭിനയത്തില്‍ നിന്നും ചെറിയ ഇടവേളകള്‍ നടി എടുക്കുകയും ചെയ്തു. ഇതിനിടയില്‍ ശരീരഭാരം കൂടിയതിന്റെ പേരില്‍ നിരവധി വിമര്‍ശനങ്ങള്‍ നടിയ്ക്ക് നേരിടേണ്ടതായിട്ടും വന്നിരുന്നു.

പ്രസവശേഷം ശരീരഭാരം കൂടിയ ശരണ്യ ഒരു പൊതുപരിപാടിയല്‍ പങ്കെടുക്കാന്‍ എത്തിയപ്പോഴായിരുന്നു കളിയാക്കലുകള്‍. പിന്നീട് ഞെട്ടിക്കുന്ന മേക്കോവര്‍ നടത്തി താരം കൈയ്യടി നേടി . തന്റെ വിശേഷങ്ങള്‍ സാമൂഹ്യമാധ്യമത്തില്‍ ഷെയര്‍ ചെയ്യാറുണ്ട്. ശരണ്യ മോഹൻ തന്റെ ഫോട്ടോയ്‍ക്ക് ക്യാപ്ഷനായി എഴുതിയ കുറിപ്പാണ് ഇപ്പോള്‍ സാമൂഹ്യമാധ്യമത്തില്‍ ചര്‍ച്ചയാകുന്നത്.

കഴിഞ്ഞ ദിവസം താരസംഘടനയായ അമ്മയുടെ വാര്‍ഷിക ജനറല്‍ ബോഡി യോഗത്തില്‍ പങ്കെടുക്കാന്‍ ഭര്‍ത്താവും ഡോക്ടറുമായ അരവിന്ദിനൊപ്പമാണ് ശരണ്യ എത്തിയത്. അവിടെ നിന്നുമെടുത്തൊരു ഫോട്ടോ സോഷ്യല്‍ മീഡിയയിലൂടെ പോസ്റ്റ് ചെയ്യുകയും ചെയ്തു. എന്നാല്‍ ചിത്രത്തിന് ക്യാപ്ഷനായി നല്‍കിയ കാര്യങ്ങളാണ് ചർച്ചയായത്.

ഭര്‍ത്താവ് അരവിന്ദിനോട് സംസാരിക്കുന്നതുപോലെയാണ് കുറിപ്പ്. പുതിയ ഫോട്ടോ ചരിഞ്ഞ് നിന്ന് എടുക്കാമെന്ന് ശരണ്യ പറയുകയാണ്. ഇല്ലെങ്കില്‍ നാളെ ഗര്‍ഭിണിയാണെന്ന തരത്തിലുള്ള വാര്‍ത്തകള്‍ വരുമെന്നാണ് നടി പറയുന്നത്.

തന്റെ വയറിനെ കുറിച്ച് ആള്‍ക്കാര്‍ എന്തൊക്കെയാണ് പറയാൻ സാധ്യതയെന്ന് ശരണ്യ സൂചിപ്പിക്കുന്നു. ഗര്‍ഭകാലത്തുണ്ടാകുന്ന സ്വാഭാവികമായ ഒരു അവസ്ഥയാണ് അതെന്നും കുറിപ്പിലൂടെ ശരണ്യ മോഹൻ വ്യക്തമാക്കുന്നു.

ശരണ്യ മോഹന്റെ ഫെയ്സ് ബുക്കിന്റെ പൂർണ്ണരൂപം..........

Me : " ചേട്ടാ, ഞാൻ ഒന്ന് ചരിഞ്ഞു നിന്നോട്ടെ "

Him :" എന്തിനു? "

Me : "ഇല്ലേൽ.. നാളെ കഥ ഇറങ്ങും.. ഞാൻ പ്രെഗ്നന്റ് ആണെന്നും പറഞ്ഞു "

Him: " അറിവില്ലാത്തതു കൊണ്ടല്ലേ.. പ്രെഗ്നൻസി സമയത്തു ഉണ്ടാകുന്ന Diastasis recti എന്ന അവസ്ഥ പോകാൻ സമയം എടുക്കും എന്നും അതിനെ പറ്റി നീ ഒരു അവബോധം പോസ്റ്റ്‌ ഇട് "

Me : "അപ്പോൾ ഡയലോഗ് വരും പോയി exercise ചെയ്യാൻ.. ഇവിടെ തല കുത്തി നിക്കുന്നത് എനിക്കല്ലേ അറിയൂ.. "

Him : "അറിവില്ലാത്തതു കൊണ്ടല്ലേ..നീ ഈ ഫോട്ടോ ഇട്ടു തന്നെ പോസ്റ്റ്‌ ചെയ്തു ഒരു ലിങ്ക് കൂടെ കൊടുക്കു "

Me : "ഓക്കേ ചേട്ടാ.. അത് പോട്ടെ.. നിങ്ങൾ എന്തിനാ വയർ അകത്തേക്ക് വയ്ക്കണേ?"

Him: " ഇനി ഞാൻ പ്രെഗ്നന്റ് ആണെന്ന് ആർക്കേലും തോന്നിയാലോ.."