ഇരുപത്തിയൊന്ന് വര്‍ഷത്തെ കാത്തിരിപ്പിനൊടുവില്‍ ഹര്‍നാസ് സന്ധു വിശ്വസുന്ദരിപ്പട്ടം നേടിയിരിക്കുകയാണ്. രാജ്യം മുഴുവന്‍ ലോകസുന്ദരിയെ അഭിനന്ദിക്കുമ്പോള്‍ ചില വിമര്‍ശനങ്ങളും ഹര്‍നാസിനെതിരെ ഉയര്‍ന്നിരുന്നു.

വിശ്വസുന്ദരിപ്പട്ടം കിട്ടിയത് ഹര്‍നാസിന്റെ മുഖം സുന്ദരമായതുകൊണ്ട് മാത്രമാണെന്നായിരുന്നു വിമര്‍ശനം. ഇപ്പോഴിതാ ഇത്തരം വിമര്‍ശനങ്ങളോട് പ്രതികരിച്ചുകൊണ്ട് രംഗത്തെത്തിയിരിക്കുകയാണ് ഹര്‍നാസ്. ഈ നേട്ടത്തിന് വേണ്ടി എത്രമാത്രം പ്രയത്‌നിച്ചിട്ടുണ്ടെന്ന് തനിക്ക് മാത്രമേ അറിയുകയുള്ളൂവെന്നും, വാദപ്രതിവാദങ്ങള്‍ക്ക് പകരം തന്റെ കഴിവെന്താണെന്ന് അവരെ ബോദ്ധ്യപ്പെടുത്താന്‍ കഠിനമായി പരിശ്രമിക്കാനാണ് തീരുമാനമെന്നും ഹര്‍നാസ് പ്രതികരിച്ചു.

ഇത്തരം സ്റ്റീരിയോടൈപ്പുകളെ തകര്‍ക്കാനാണ് തന്റെ ശ്രമം. ഒരു ഒളിമ്പിക് വിജയത്തിന് സമാനമാണിത്. രാജ്യത്തെ പ്രതിനിധീകരിക്കുന്ന കായിക താരങ്ങളെ പ്രശംസിക്കുന്ന നമുക്ക് എന്തുകൊണ്ട് ഒരു സൗന്ദര്യ മത്സര വിജയിയെ പ്രശംസിക്കാന്‍ കഴിയുന്നില്ലെന്നും ലോകസുന്ദരി ചോദിക്കുന്നു.

ചണ്ഡിഗഢ് സ്വദേശിയായ ഹര്‍നാസ് പഞ്ചാബിലാണ് ജനിച്ചു വളര്‍ന്നത്. മിസ് ചണ്ഡീഗഢ് 2017, മിസ് മാക്‌സ് എമേര്‍ജിംഗ് സ്റ്റാര്‍ ഇന്ത്യ 2018, ഫെമിന മിസ് ഇന്ത്യ പഞ്ചാബ് 2019 എന്നീ നേട്ടങ്ങള്‍ സ്വന്തമാക്കിയിരുന്നു. മോഡലായ ഹര്‍നാസ് ഏതാനും പഞ്ചാബി സിനിമകളിലും അഭിനയിച്ചിട്ടുണ്ട്. വിശ്വസുന്ദരിപ്പട്ടം കിട്ടിയതിന് ശേഷം സിനിമകളില്‍ നിരവധി അവസരങ്ങളും തേടിയെത്തുന്നുണ്ട്. ശക്തമായ സ്ത്രീകഥാപാത്രങ്ങള്‍ ചെയ്യാനാണ് തനിക്ക് താല്‍പര്യമെന്ന് അവര്‍ വ്യക്തമാക്കി.