ഇരയാക്കപ്പെടലില്‍ നിന്നും അതിജീവനത്തിലേക്കുള്ള തന്‍റെ യാത്രയെക്കുറിച്ച് ആക്രമിക്കപ്പെട്ട നടി ഒരു കുറിപ്പ് പങ്കുവെച്ചിരുന്നു.ഇന്‍സ്റ്റഗ്രാമിലൂടെ നടി പങ്കുവെച്ച ഈ കുറിപ്പിന് പിന്നാലെ സിനിമാലോകത്ത് നിന്ന് നിരവധിപേരാണ് നടിയെ പിന്തുണച്ച് കൊണ്ട് രം​ഗത്തെത്തിയത്. ഇപ്പോഴിതാ നടിയെ പിന്തുണച്ച് എത്തിയിരിക്കുകയാണ് മലയാളത്തിലെ യുവഗായികമാർ. യുവഗായികമാരായ സിത്താര കൃഷ്ണകുമാർ, റിമി ടോമി, നടിയുടെ അടുത്ത സുഹൃത്തുകൂടിയായ സയനോര എന്നിവരാണ് പിന്തുണയറിയിച്ച് രംഗത്തെത്തിയത്.

നടിയുടെ കുറിപ്പ് സോഷ്യൽ മീഡിയയിൽ പങ്കിട്ടുകൊണ്ടാണ് ഈ യുവ ഗായികമാരും പിന്തുണ പ്രഖ്യാപിച്ചിരിക്കുന്നത്. എന്നും നിന്റെ കൂടെ’ എന്നു കുറിച്ചുകൊണ്ടാണ് സയനോര കുറിപ്പ് പങ്കുവച്ചത്. ‘നിസ്സംശയം അവൾക്കൊപ്പം’ എന്നാണ് സിതാരയുടെ കുറിപ്പ്. റിമി ടോമിയും നടിയുടെ പോസ്റ്റ് പങ്കുവച്ചു കൊണ്ടാണ് പിന്തുണ പ്രഖ്യാപിച്ചിരിക്കുന്നത്.

കഴിഞ്ഞ ദിവസം സിനിമയിലെ യുവ നാ​യിക നായകൻമാരും മുൻനിര താരങ്ങളായ മമ്മൂട്ടിയും മോഹൻലാലും നടിക്ക് പൂർണ്ണ പിന്തുണയുമായി രം​ഗത്തെത്തിയിരുന്നു. ഒപ്പമുണ്ടെന്ന് മമ്മൂട്ടികുറിച്ചപ്പോൾ ബഹുമാനമെന്നാണ് മോഹൻലാൽ കുറിച്ചത്. ദുൽഖർ, പൃഥ്വിരാജ്, ടൊവിനോ തോമസ്, കുഞ്ചാക്കോ ബോബന്‍, ആഷിക്ക് അബു, ബാബുരാജ്, അന്ന ബെന്‍, ആര്യ, സ്മൃതി കിരണ്‍, സുപ്രിയ മേനോന്‍ പൃഥ്വിരാജ്, ഫെമിന ജോര്‍ജ്, മൃദുല മുരളി, നിമിഷ സജയന്‍, പൂര്‍ണിമ ഇന്ദ്രജിത്ത്, ഐശ്വര്യ ലക്ഷ്മി തുടങ്ങി നിരവധി പേർ നടിക്ക് ഐക്യദാർഢ്യം അറിയിച്ചിട്ടുണ്ട്.

നടി പങ്കുവച്ച ഇൻസ്റ്റഗ്രാം പോസ്റ്റ് ഇങ്ങനെയായിരുന്നു :

ഈ യാത്ര ഒരിക്കലും എളുപ്പമായിരുന്നില്ല. ഇരയാക്കപ്പെടലിൽ നിന്നും അതിജീവനത്തിലേക്കുള്ള ഈ യാത്ര. 5 വർഷമായി എൻറെ പേരും വ്യക്തിത്വവും, എനിക്ക് സംഭവിച്ച അതിക്രമത്തിനടിയിൽ അടിച്ചമർത്തപ്പെട്ടിരിക്കുകയാണ്. കുറ്റം ചെയ്‍തത് ഞാൻ അല്ലെങ്കിലും എന്നെ അവഹേളിക്കാനും നിശബ്‍ദയാക്കാനും ഒറ്റപ്പെടുത്താനും ഒരുപാട് ശ്രമങ്ങൾ ഉണ്ടായിട്ടുണ്ട്.

എന്നാൽ അപ്പോളൊക്കെയും ചിലരൊക്കെ നിശബ്‍ദത ഭേദിച്ച് മുന്നോട്ട് വന്നു, എനിക്കുവേണ്ടി സംസാരിക്കാൻ. എൻറെ ശബ്‍ദം നിലയ്ക്കാതിരിക്കാൻ. ഇന്ന് എനിക്കുവേണ്ടി നിലകൊള്ളുന്ന ഇത്രയും ശബ്‍ദങ്ങൾ കേൾക്കുമ്പോൾ ഞാൻ തനിച്ചല്ലെന്ന് തിരിച്ചറിയുന്നു. നീതി പുലരാനും തെറ്റ് ചെയ്‍തവർ ശിക്ഷിക്കപ്പെടാനും, ഇങ്ങനെയൊരനുഭവം മറ്റാർക്കും ഉണ്ടാവാതെയിരിക്കാനും ഞാൻ ഈ യാത്ര തുടർന്നുകൊണ്ടേയിരിക്കും. കൂടെ നിൽക്കുന്ന എല്ലാവരുടെയും സ്‍നേഹത്തിന് ഹൃദയം നിറഞ്ഞ നന്ദി.

എന്നായിരുന്നു നടി പങ്കുവെച്ച കുറിപ്പ്. എന്തായാലും ആക്രമിക്കപ്പെട്ടിട്ട് ഏകദേശം 5 വർഷത്തിലേക്ക് കടക്കുമ്പോൾ ഇതുവരെ പിന്തുണക്കാത്തവർ തനിക്ക് ഒപ്പം ഇപ്പോഴെങ്കിലും എത്തിയതിൽ മനസ് നിറയെ സന്തോഷത്തിലായിരിക്കും പ്രമുഖ നടി എന്ന് നമ്മൾക്ക് പ്രത്യാശിക്കാം.